ܐܵܦܸܢ ܡܫܝܼܚܵܝܹ̈ܐ ܡܼܢ ܫܲܒ݂ܛܵܐ ܠܵܬܝܼܢܵܝܵܐ ܠܵܐ ܝܠܲܝܗܝ ܫܒ݂ܘܿܩ ܡܼܢ ܚܕܵܐ ܡܢܵܬܐ ܙܥܘܿܪܬܐ ܡܼܢ ܡܫܝܼܚܵܝܹ̈ܐ ܕܥܝܼܪܵܐܩ: ܐܸܠܵܐ ܝܼܠܲܝܗܝ ܒܐܲܣܘܼܖܹ̈ܐ ܩܡܝܼܛܹ̈ܐ ܒܲܡܗܘܼܡܢܹ̈ܐ ܩܵܬ݂ܘܿܠܝܼܩܵܝܹ̈ܐ: ܟܲܠܕܵܝܹ̈ܐ ܘܐ݇ܣܘܼܖ̈ܝܵܝܹܐ ܘܐܵܖܸ̈ܡܢܵܝܹܐ ܘܝܲܘܢܵܢܵܝܹ̈ܐ ݂ ܕܠܵܐ ܦܘܼܫܵܟ݂ܐ ܟܲܠܕܵܝܹ̈ܐ ܝܼܠܲܝܗܝ ܣܘܿܓ݂ܐܵܐ ܕܲܡܫܝܼܚܵܝܹ̈ܐ ܓܲܘ ܥܝܼܪܵܐܩ: ܘܲܠܦܘܼܬ ܚܘܼܫܒܵܢܵܐ ܐ݇ܚܵܪܵܝܵܐ ܕܥܵܡܘܿܖܹ̈ܐ ܒܫܲܢ݇ܬܐ ܕ1987: ܡܸܢܝܵܢܵܐ ܕܟܲܠܕܵܝܹ̈ܐ ܩܵܪܹܒ݂ ܗ݇ܘܵܐ ܠـ(750000) ܐܲܠܦܹ̈ܐ: ܒܲܠܩܘܼܒ݂ܠ (300000) ܐܲܠܦܹ̈ܐ ܐܵܬ݂ܘܿܖ̈ܵܝܹܐ (ܥܹܕܬܐ ܕܡܲܕܢܚܵܐ ܘܥܹܕܬܐ ܥܲܬܝܼܩܬܐ) ݂ ܡܸܢܝܵܢܵܐ ܕܲܡܫܝܼܚܵܝܹ̈ܐ ܓܲܘ ܟܢܘܼܫܝܹ̈ܐ ܥܝܼܖ̈ܵܩܵܝܹܐ ܡܵܛܹܐ ܗ݇ܘܵܐ ܠـ(8% ): ܐܸܠܵܐ ܒܫܲܢ݇ܬܐ ܕ2018 ܟܡܵܐ ܝܠܹܗ ܡܸܢܝܵܢܲܝܗܝ ؟ܡܫܲܪܪܝܼ ܡܲܘܕܥܵܢ̈ܘܵܬܐ ܕܩܲܡ ܟܵܢܫܝܼܠܗ݇ܘܿܢ ܡܓܲܖ̈ܬܵܢܹܐ ܕ(ܡܝܼܙܘܿܦܘܿܬܵܡܝܵܐ) ܒܘܼܕ ܫܘܼܚܠܵܦܵܐ ܘܒܘܼܨܵܪܵܐ ܕܲܡܛܹܐ ܠܹܗ ܠܟܠܲܝܗܝ ܫܲܒ݂ܛܹ̈ܐ ܕܦܝܼܫܠܗ݇ܘܿܢ ܣܥܝܼܖܹ̈ܐ ܘܚܸܙܝܹ̈ܐ ݂ ܦܝܼܫܬܐ ܝܠܵܗ̇ ܐܡܝܼܪܬܐ ܕܐܝܼܬ ܒܨܝܼܪ ܡܼܢ 400000 ܐܲܠܦܹ̈ܐ ܡܼܢ ܟܲܠܕܵܝܹ̈ܐ ܕܥܝܼܪܵܐܩ: ܕܝܼܠܲܝܗܝ ܦܖ̈ܝܼܣܹܐ ܒܲܝܢܵܬ݂ ܒܲܓ݂ܕܵܕ ܘܟܘܼܪܕܸܣܬܵܐܢ ܘܫܸܛܚܵܐ ܕܢܝܼܢܘܹܐ ܘܒܲܨܪܵܐ ݂ ܡܼܢ ܫܲܪܝܘܼܬܐ ܕܥܝܼܪܵܐܩ ܒܫܲܢ݇ܬܐ ܕ1932: ܠܵܐ ܫܠܹܐ ܠܗ݇ܘܿܢ ܬܫܝܼܥܵܬ̈ܐ (مصائب) ܕܩܲܡ ܚܵܙܝܼܠܗ݇ܘܿܢ ܡܫܝܼܚܵܝܹ̈ܐ ܓܲܘ ܥܝܼܪܵܐܩ ݂ ܘܠܵܐ ܝܗ݇ܘܵܐ ܫܘܼܪܵܝܵܐ ܕܕܵܪܵܐ ܕܥܸܣܪܝܼܢ ܘܚܲܕ ܒܸܫ ܛܵܒ݂ܵܐ: ܒܥܸܠܬܐ ܕܲܨܦܵܚܬܐ ܕܐܵܡܹܝܖ̈ܟܵܝܹܐ ܒܫܲܢ݇ܬܐ ܕ2003: ܘܲܚܨܵܪܵܐ ܪܲܒܵܐ ܕܦܝܼܫܠܹܗ ܣܝܼܡܵܐ ܥܲܠ ܥܝܼܪܵܐܩ ܒܝܲܕ ܐܸܡ̈ܘܵܬܐ ܡܚܲܝܕܹ̈ܐ: ܝܲܬܝܼܪ ܠܥܸܢܦܵܐ ܕܡܵܦܝܵܐ ܐܸܣܠܵܡܵܝܹ̈ܐ: ܘܲܪܕܘܼܦܝܲܝܗܝ ܠܲܟܢܘܼܫܝܹ̈ܐ ܡܫܝܼܚܵܝܹ̈ܐ ܡܼܢ ܥܸܕܵܢ ܢܦܵܠܬܐ ܕܛܲܟ݂ܣܵܐ ܕܨܲܕܵܐܡ ܚܘܼܣܲܝܢ ݂

ܡܼܢ ܫܲܢ݇ܬܐ ܕ1235: ܡܫܘܼܕܸܪܹܗ ܦܵܦܵܐ (ܓܪܝܼܓܘܿܪܝܼ ܬܫܝܼܥܵܝܵܐ) ܠܚܲܕ ܡܼܢ ܠܸܘܝܹ̈ܐ ܕܩܲܕܝܼܫܵܐ ܕܘܿܡܝܼܢܝܼܟ ܠܡܲܕܢܚܵܐ: ܕܲܡܛܹܐ ܠܹܗ ܠܒܹܝܬ ܢܲܗܖ̈ܝܼܢ ܒܫܲܢ݇ܬܐ ܕ1237: ܘܦܝܼܫܬܐ ܝܠܵܗ̇ ܐܡܝܼܪܬܐ ܕܐ݇ܙܸܠܠܹܗ ܠܒܲܓ݂ܕܵܕ ܒܙܲܒ݂ܢܵܐ ܕܐܝܼܬ ܗ݇ܘܵܐ ܬܲܚܠܘܼܦܵܐ (الخليفة)ܥܲܒܵܣܵܝܵܐ ݂

ܒܝܲܘܡܵܐ ܕ(6) ܒܐܝܼܠܘܿܠ 1632: ܦܝܼܫܠܵܗ̇ ܡܫܘܼܬܐܲܣܬܐ ܡܲܪܥܝܼܬܐ ܠܵܬܝܼܢܵܝܬܐ ܕܒܲܓ݂ܕܵܕ: ܐܝܼܡܲܢ ܕܫܘܼܠܛܸܢܵܗ̇ ܡܲܠܟܘܼܬܐ ܕ(ܦܵܪܹܣ) ܥܲܠ ܦܢܝܼܬܐ: ܘܲܡܕܝܼܢ݇ܬܐ ܕ(ܐܲܨܦܵܗܵܐܢ) ܝܼܗ݇ܘܵܐ ܩܸܢܛܪܘܿܢܵܗ̇ ܪܘܼܚܵܢܵܝܵܐ ݂ ܒܗܵܕܹܐ ܡܕܝܼܢ݇ܬܐ ܢܲܩܝܼܦܬܐ ܠܐܸܡܦܪܵܛܘܿܪܘܼܬܐ ܦܵܪܣܵܝܬܐ: ܡܛܘܼܘܸܪܘܼܢ ܚܲܝܠܵܘܵܬܐ ܐܘܿܖ̈ܘܿܦܵܝܹܐ ܘܟܘܼܪܣܝܵܐ ܫܠܝܼܚܵܝܵܐ: ܚܘܼܦܵܛܲܝܗܝ ܕܸܒܠܘܿܡܵܣܵܝܵܐ ܘܬܲܘܕܝܼܬܵܢܵܝܵܐ ܬܚܘܿܬ ܫܘܼܠܛܵܢܵܐ ܦܵܪܣܵܝܵܐ: ܘܲܦܪܝܼܫܵܐܝܼܬ ܒܙܲܒ݂ܢܵܐ ܕܫܲܐܗ ܥܲܒܵܣ ܩܲܕܡܵܝܵܐ (1587 ـ 1629) ݂ ܓ̰ܵܐܢ ܬ݂ܵܕܝܘܿܣ ܝܼܗ݇ܘܵܐ ܐܲܦܸܣܩܘܿܦܵܐ ܩܲܕܡܵܝܵܐ ܓܲܘ ܐܲܨܦܵܗܵܐܢ: ܘܦܝܼܫܠܹܗ ܪܫܝܼܡܵܐ (ܬܝܼܡܘܿܬܝܘܿ ܦܹܝܪܹܝܙ): ܡܼܢ ܪܲܒܵܢܘܼܬܐ ܟܲܪܡܠܵܝܬܐ ܐܸܨܦܵܢܵܝܬܐ ܐܲܝܟ݂ ܡܥܲܕܪܵܢܵܐ ܐܸܠܹܗ: ܐܝܼܢܵܐ ܠܵܐ ܡܘܼܢܬܹܐ ܠܹܗ ܐܵܦܠܵܐ ܚܲܕ ܡܸܢܲܝܗܝ ܒܟܘܼܪܣܝܵܐ ܐܲܦܸܣܩܘܿܦܵܝܵܐ[1] ݂ ܒܲܪܢܵܪܕ ܕܝܼ ܣܵܢܬ ܬܝܼܪܝܼܙ (ܓ̰ܵܐܢ ܕܘܿܦܵܠ) ܡܼܢ ܪܲܒܵܢܘܼܬܐ ܟܲܪܡܠܵܝܬܐ: ܝܼܗ݇ܘܵܐ ܐܲܦܸܣܩܘܿܦܵܐ ܠܵܬܝܼܢܵܝܵܐ ܩܲܕܡܵܝܵܐ ܕܲܡܛܹܐ ܠܹܗ ܣܘܼܥܪܵܢܵܐܝܼܬ ܠܒܲܓ݂ܕܵܕ ݂ ܒܫܲܢ݇ܬܐ ܕ1642: ܡܙܘܼܝܸܚܠܹܗ ܒܩܘܼܕܵܫܵܐ ܐܲܠܵܗܵܝܵܐ ܡܼܢ ܩܕܵܡ ܕܥܵܪܬܹܗ ܠܦܲܪܢܣܵܐ ݂ ܚܙܹܐ ܠܹܗ ܕܵܪܵܐ ܕ(17) ܡܛܵܝܬܐ ܕܫܘܼܕܵܖܹ̈ܐ ܠܵܬܝܼܢܵܝܹ̈ܐ ܠܐܲܬ݂ܪܵܐ ܕܒܹܝܬ ܢܲܗܖ̈ܝܼܢ (ܥܝܼܪܵܐܩ) ݂ ܒܫܲܢ݇ܬܐ ܕ1636: ܦܬܸܚܠܗ݇ܘܿܢ ܖ̈ܲܒܵܢܵܐ ܟܲܦܘܿܫܵܝܹ̈ܐ ܩܸܢܛܪܘܿܢܲܝܗܝ ܩܲܕܡܵܝܵܐ ܓܲܘ ܡܲܘܨܸܠ: ܘܲܦܪܸܣܠܗ݇ܘܿܢ ܠܚܘܼܦܵܛܲܝܗܝ ܣܘܼܒܵܖ̈ܵܝܹܐ ܓܲܘ ܒܲܓ݂ܕܵܕ ܒܹܝܬ ܕܵܪܵܐ ܕ(17) ܠܕܵܪܵܐ ܕ(18) ݂

ܒܝܲܘܡܵܐ ܕ(21) ܒܟܵܢܘܿܢ ܩܲܕܡܵܝܵܐ ܫܲܢ݇ܬܐ ܕ1743: ܦܝܼܫܠܹܗ ܣܝܼܡܵܐ ܐܝܼܡܵܢܘܿܐܹܝܠ ܕܝܼ ܣܵܐܢ ܐܲܠܒܸܪܬ (ܓ̰ܵܐܢ ܟܠܘܿܕ ܒܵܠܝܼܬ: ܝܼܕܝܼܥܵܐ ܒܫܸܡ ܕܘܿܡ ܐܝܼܡܵܢܘܼܐܹܝܠ ܒܵܠܝܼܬ ܣܵܐܢ ܐܲܠܒܸܪܬ ܕܝܼ ܣܵܐܢ ܐܲܢܛܘܵܢ (1702 ـ 1773): ܐܲܝܟ݂ ܐܲܦܸܣܩܘܿܦܵܐ ܕܟܘܼܪܣܝܵܐ ܕܒܵܒܸܠ: ܘܦܝܼܫܠܹܗ ܐܲܦܸܣܩܘܿܦܵܐ ܕܠܵܬܝܼܢ ܓܲܘ ܒܲܓ݂ܕܵܕ ݂ ܟܵܗܢܵܐ ܝܗ݇ܘܵܐ ܕܥܹܕܬܐ ܕܒܲܓ݂ܕܵܕ ܡܼܢ ܫܲܢ݇ܬܐ ܕ1728: ܘܦܝܼܫܠܹܗ ܪܫܝܼܡܵܐ ܩܲܢܨܠܵܐ (قنصل) ܕܲܦܪܲܢܣܵܐ ܓܲܘ ܒܲܓ݂ܕܵܕ ܒܫܲܢ݇ܬܐ ܕ1741 ܡܼܢ ܩܕܵܡ ܕܦܵܐܹܫ ܗ݇ܘܵܐ ܐܲܦܸܣܩܘܿܦܵܐ ݂ ܒܢܹܐ ܠܹܗ ܚܲܕ ܒܲܝܬܐ ܩܵܐ ܡܸܣܟܹܢܹ̈ܐ ܘܠܵܐ ܡܵܨܝܵܢܹ̈ܐ: ܘܲܚܕܵܐ ܡܲܕܪܲܫܬܐ ܘܚܲܕ ܩܸܢܛܪܘܿܢ ܩܵܐ ܐܲܦܸܣܩܘܿܦܘܼܬܐ ݂ ܡܝܼܬ ܠܹܗ ܓܲܘ ܒܲܓ݂ܕܵܕ ܒܫܲܢ݇ܬܐ ܕ1773 ܒܵܬܲܪ ܕܲܛܦܹܐ ܠܹܗ ܒܡܲܪܥܵܐ ܕܫܲܪܥܘܼܛܵܐ ݂

ܒܫܲܢ݇ܬܐ ܕ1820: ܦܝܼܫܠܹܗ ܣܝܼܡܵܐ ܦܹܝܝܪ ܐܲܠܟܣܲܢܕܲܪ ܟܘܼܦܪܝܼ (1770 ـ 831) ܠܕܲܪܓ݂ܵܐ ܕܐܲܦܸܣܩܘܿܦܵܐ ܠܵܬܝܼܢܵܝܵܐ ܕܒܵܒܸܠ ݂ ܐܝܼܬ ܗ݇ܘܵܐ ܠܹܗ ܚܲܕ ܕܘܼܪܵܐ ܪܲܒܵܐ ܘܐܸܣܵܝܵܐ ܒܥܘܼܕܪܵܢܵܐ ܕܚܘܼܝܵܕܵܐ ܕܥܹܕܬܐ ܟܲܠܕܵܝܬܐ ܥܲܡ ܪܗܘܿܡܵܐ ݂ ܘܐܵܦ ܦܝܼܫܠܹܗ ܪܫܝܼܡܵܐ ܩܲܢܨܠܵܐ ܠܦܲܪܢܣܵܐ ܓܲܘ ܒܲܓ݂ܕܵܐ ܒܫܲܢ݇ܬܐ ܕ1823: ܘܲܡܚܘܼܡܹܐ ܠܹܗ ܠܲܫܩܵܠ ـ ܝܗܵܒ݂ܵܐ ܕܸܒܠܘܿܡܵܣܵܝܹ̈ܐ ܘܬܲܘܕܝܼܬܵܢܵܝܹ̈ܐ ܦܸܖ̈ܝܹܐ ݂ ܡܝܼܬ ܠܹܗ ܒܫܲܢ݇ܬܐ ܕ1831: ܘܦܝܼܫܠܹܗ ܕܟ݂ܝܼܪܵܐ ܐܲܝܟ݂ ܚܲܕ ܐܲܦܸܣܩܘܿܦܵܐ ܕܡܝܼܪܵܐ (رائع): ܘܚܲܕ ܓܲܒ݂ܪܵܐ ܝܲܨܝܼܦܵܐ ܒܡܸܣܟܹܢܹ̈ܐ ܘܲܟܦܝܼܢܹ̈ܐ ܒܥܸܕܵܢܹ̈ܐ ܕܟܸܦܢܵܐ ܘܫܲܪܥܘܼܛܵܐ: “ܚܲܕ ܓܲܒ݂ܪܵܐ ܩܲܕܝܼܫܵܐ“ ܐܲܝܟ݂ ܕܦܝܼܫܠܹܗ ܡܫܘܼܡܗܵܐ ܒܝܲܕ ܪܹܫ ܐܲܦܸܣܩܘܿܦܹ̈ܐ ܕܠܵܬܝܼܢܵܝܹ̈ܐ ܕܝܲܘܡܵܢܵܐ ܓܲܘ ܒܲܓ݂ܕܵܕ: ܕܝܼܠܹܗ ܒܫܸܪܫܵܐ ܡܼܢ ܐܲܬ݂ܪܵܐ ܕܠܸܒ݂ܢܵܢ (ܓ̰ܵܐܢ ܒܸܢܝܵܡܹܝܢ ܣܠܹܝܡܵܢ) ݂

__________

[1] ܚܙܝܼ: “ܥܹܕܬܐ ܓܲܘ ܥܝܼܪܵܐܩ ݂ ܐܵܪܵܐ ܐܝܼܬ ܕܲܥܬܝܼܕ ܩܵܐ ܡܫܝܼܚܵܝܹ̈ܐ ܕܥܝܼܪܵܐܩ؟ ܐܵܪܵܐ ܒܸܕ ܗܵܘܹܐ ܕܲܥܬܝܼܕ ܩܵܐ ܫܠܵܡܵܐ؟”: ܦܝܼܪܢܵܢܕܘܿ ܦܝܼܠܘܿܢܝܼ: ܡܸܫܬܲܐܠܵܢܵܐ ܕܲܡܫܲܕܪܘܼܬ݂ ܣܘܼܒܵܪܵܐ ܠܥܲܡܡܹ̈ܐ ݂ ܐܝܼܙܓܲܕܵܐ ܦܵܦܵܝܵܐ ܕܕܲܥܒܲܪ ܓܲܘ ܥܝܼܪܵܐܩ: ܡܓ݂ܠܬܐ ܕ(ܐܲܦܵܩ ܘܲܐܲܦܟܵܪ): ܡܸܢܝܵܢܵܐ ܕ(6 ـ 2018): ܦܝܼܫܠܹܗ ܦܪܝܼܣܵܐ ܒܝܲܕ (ܐܘܿܦܲܪ ܕܘܿܪܝܵܐܢ): ܬܸܫܪܝܼܢ ܬܪܲܝܵܢܵܐ 2018: ܦ 99 ݂

ܦܝܼܫܠܵܗ̇ ܒܢܝܼܬܐ ܥܹܕܬܐ ܕܩܲܕܝܼܫܵܐ ܝܲܘܣܸܦ ܕܠܵܬܝܼܢܵܝܹ̈ܐ ܓܲܘ ܒܲܓ݂ܕܵܕ ܒܚܘܼܬܵܡܵܐ ܕܕܵܪܵܐ ܕ(19) ܥܲܠ ܐܲܪܥܵܐ ܕܝܼܗ݇ܘܵܐ ܚܕܵܐ ܡܲܕܪܲܫܬܐ ܛܥܝܼܢܬܐ ܝܵܬ ܫܸܡܵܐ ܡܼܢ ܫܲܢ݇ܬܐ ܕ1737 ݂

ܒܫܲܢ݇ܬܐ ܕ1871: ܘܲܒܛܲܝܒܘܼܬܐ ܕܐܲܒ݂ܵܗܵܬ̈ܐ ܟܲܖ̈ܡܠܵܝܹܐ: ܦܝܼܫܠܵܗ̇ ܒܢܝܼܬܐ ܥܹܕܬܐ ܕܩܲܕܝܼܫܵܐ ܝܲܘܣܸܦ ܓܲܘ ܒܲܓ݂ܕܵܕ ܒܵܬܲܪ ܚܲܡܫܵܐ ܫܸܢܹ̈ܐ ܡܼܢ ܦܘܼܠܚܵܢܵܐ: ܘܝܼܗ݇ܘܵܐ ܡܛܲܦܘܿܣܹܐ (ܡܲܬ݂ܘܿܠܹܐ) ܠܟܵܬܸܕܪܵܐܝܼܵܐ ܠܵܬܝܼܢܵܝܬܐ ܓܲܘ ܒܲܓ݂ܕܵܕ ݂ ܒܐܵܕܵܪ ܫܲܢ݇ܬܐ ܕ1917: ܒܥܸܕܵܢܵܐ ܕܲܦܠܵܫܵܐ ܬܹܒܹܝܠܵܝܵܐ ܩܲܕܡܵܝܵܐ: ܐܝܼܡܲܢ ܕܝܼܗ݇ܘܵܐ ܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ܬܚܘܿܬ ܡܕܲܒܪܵܢܘܼܬܐ ܕܐܸܡܦܪܵܛܘܿܪܘܼܬܐ ܥܘܼܬ݂ܡܵܢܵܝܬܐ: ܟܒܸܫܠܵܗ̇ ܚܲܝܠܵܘܵܬ̈ܐ ܬܘܼܖ̈ܟܵܝܹܐ ܥܘܼܬ݂ܡܵܢܵܝܹ̈ܐ ܥܲܠ ܥܹܕܬܐ ܠܵܬܝܼܢܵܝܬܐ ܕܩܲܕܝܼܫܵܐ ܝܲܘܣܸܦ: ܘܩܲܡ ܡܫܲܚܠܸܦܵܐ ܠܵܗ̇ ܠܒܹܝܬ ܟܖ̈ܝܼܗܹܐ ݂

ܒܵܬܲܪ ܬܒ݂ܵܪܬܐ ܕܐܸܡܦܪܵܛܘܿܪܘܼܬܐ ܥܘܼܬ݂ܡܵܢܵܝܬܐ ܘܲܥܪܵܩܬܐ ܕܬܘܼܖ̈ܟܵܝܹܐ: ܦܝܼܫܠܵܗ̇ ܥܹܕܬܐ ܕܘܼܟܵܐ ܠܲܣܓ݂ܵܕܵܐ: ܘܦܝܼܫܠܵܗ̇ ܡܚܘܼܕܲܬ݂ܬܐ ܒܫܲܢ݇ܬܐ ܕ1923 ݂

 ܒܫܲܢ݇ܬܐ ܕ1942 ـ 1943: ܡܙܘܼܝܸܚܠܗ݇ܘܿܢ ܦܵܠܚܹ̈ܐ ܦܘܿܠܲܢܕܵܝܹ̈ܐ ܕܝܼܗ݇ܘܵܘ ܓܲܘ ܒܲܓ݂ܕܵܕ: ܒܩܘܼܕܵܫܵܐ ܐܲܠܵܗܵܝܵܐ ܓܲܘ ܗܵܕܹܐ ܥܹܕܬܐ ܥܲܡ ܪܵܥܝܵܐ ܡܠܲܘܝܵܐ ܥܲܡܲܝܗܝ: ܡܲܛܪܵܢ ܝܲܘܣܸܦ ܓܘܿܠܝܼܢܵܐ: ܘܣܵܗܹܕ ܥܲܠ ܗܵܕܹܐ ܚܕܵܐ ܟܬܝܼܒ݂ܬܐ ܡܼܢ (ܒܪܘܿܢܙܵܐ: ܢܚܵܫܵܐ) ܥܲܠ ܓܘܼܕܵܢܹ̈ܐ ܕܥܹܕܬܐ ݂

ܒܬܸܫܥܝܼܢܵܝܵܬܐ ܕܕܵܪܵܐ ܕܥܸܣܪܝܼܢ: ܦܝܼܫܠܵܗ̇ ܝܗܝܼܒ݂ܬܐ ܥܹܕܬܐ ܕܩܲܕܝܼܫܵܐ ܝܲܘܣܸܦ ܕܠܵܬܝܼܢܵܝܹ̈ܐ ܒܐܝܼܙܦܵܐ (قرض) ܩܵܐ ܩܘܼܒܛܵܝܹ̈ܐ (ܐܲܖ̈ܬ݂ܘܿܕܘܿܟܣܵܝܹܐ) ܐܸܬܝܹ̈ܐ ܡܼܢ ܡܸܨܪܹܝܢ ܠܥܝܼܪܵܐܩ ܒܫܲܢ݇ܬܐ ܕ1976: ܘܝܼܗ݇ܘܵܐ ܚܲܕ ܫܲܒ݂ܛܵܐ ܡܫܝܼܚܵܝܵܐ ܐܵܢܲܢܩܵܝܵܐ ܓܲܘ ܒܲܓ݂ܕܵܕ ܕܲܣܢܝܼܩܹ̈ܐ ܝܗ݇ܘܵܘ ܠܕܘܼܟܵܐ ܕܲܣܓ݂ܵܕܵܐ ݂ ܩܝܼܡܠܗ݇ܘܿܢ ܩܘܼܒܛܵܝܹ̈ܐ ܒܬܘܼܪܵܨܵܐ ܕܥܹܕܬܐ ܕܩܲܕܝܼܫܵܐ ܝܲܘܣܸܦ ܕܦܝܼܫܬܐ ܝܗ݇ܘܵܐ ܡܫܘܼܬܐܲܣܬܐ ܘܣܝܼܡܬܐ ܩܵܐ ܟܢܘܼܫܝܵܐ ܠܵܬܝܼܢܵܝܵܐ: ܒܢܹܐ ܠܗ݇ܘܿܢ ܚܲܕ ܣܸܬܪܵܐ ܠܲܦܪܵܫܵܐ ܡܲܕܒܚܵܐ ܡܼܢ ܗܲܝܟܠܵܐ ݂

ܣܒܸܠܠܵܗ̇ ܥܹܕܬܐ ܕܩܲܕܝܼܫܵܐ ܝܲܘܣܸܦ ܕܦܝܼܫܠܵܗ̇ ܡܫܘܼܬܐܲܣܬܐ ܠܟܢܘܼܫܝܵܐ ܠܵܬܝܼܢܵܝܵܐ ܡܼܢ ܚܙܘܼܩܝܵܐ ܘܲܡܫܲܢܲܝܬܐ ܕܲܡܫܝܼܚܵܝܹ̈ܐ ܠܕܘܼܟܵܢܹ̈ܐ ܘܡܲܫܖ̈ܝܵܬܐ ܚܲܕܬܹ̈ܐ ܕܒܲܓ݂ܕܵܕ: ܫܒ݂ܘܿܩ ܡܼܢ ܣܩܵܕܵܐ ܕܒܐܝܼܬܵܝܵܐ ܝܠܹܗ ܡܼܢ ܛܘܼܘܵܪܵܐ ܕܫܘܼܩܵܐ ܚܕܵܪ ܒܸܢܝܵܢܵܐ ݂ ܘܥܲܡ ܗܵܕܹܐ: ܠܗܵܫܵܐ ܝܼܠܵܗ̇ ܚܲܕ ܡܼܢ ܝܲܕܥܹ̈ܐ ܘܢܝܼܫܵܢܩܹ̈ܐ ܐܲܬ݂ܖ̈ܵܝܹܐ ܓܲܘ (ܥܲܩܕܸܠܢܲܨܵܪܵܐ): ܡܫܪܝܼܬܐ ܥܲܬܝܼܩܬܐ ܕܲܡܫܝܼܚܵܝܹ̈ܐ ܓܲܘ ܒܲܓ݂ܕܵܕ ݂

ܥܹܕܬܐ ܕܩܲܕܝܼܫܵܐ ܝܲܘܣܸܦ ܕܠܵܬܝܼܢܵܝܹ̈ܐ ܓܲܘ ܒܲܓ݂ܕܵܕ: ܝܼܠܵܗ̇ ܒܲܕܡܘܼܬ݂ ܚܲܕ ܒܸܢܝܵܢܵܐ ܥܲܠ ܐܸܣܟܹܝܡܵܐ ܨܠܝܼܒ݂ܵܝܵܐ: ܐܝܼܬ ܠܹܗ ܚܕܵܐ ܩܘܼܒܬܐ ܦܲܠܓܘܿ ܓܠܘܿܠܬܐ ܫܲܦܝܼܪܬܐ ܥܲܡ ܚܕܵܐ ܡܲܢܕܘܼܪܬܐ ܚܘܼܕܪܵܢܵܝܬܐ: ܘܟܵܘܵܬ̈ܐ ܥܲܠ ܫܲܘܝܘܼܬܐ ܕܓܘܼܠܦܵܐ ܕܥܹܕܬܐ ܕܡܵܛܝܵܐ ܪܵܡܘܼܬܵܗ̇ ܠ(32) ܡܝܼܬܖܹ̈ܐ: ܥܵܠܹܐ ܠܵܗ̇ ܚܲܕ ܦܘܼܢܣܵܐ (فانوس) ܒܲܙܢܵܐ ܬܡܝܼܢܵܝܵܐ ܕܐܝܼܬ ܒܪܹܫܹܗ ܚܲܕ ܨܠܝܼܒ݂ܵܐ ݂ ܡܼܢ ܪܸܚܩܵܐ ܡܵܨܹܝܚ ܕܚܵܙܹܝܚ ܠܥܹܕܬܐ ܓܲܠܝܵܐܝܼܬ: ܐܲܝܟ݂ ܚܕܵܐ ܡܢܵܪܬܐ ܓܲܘ ܡܲܫܪܝܼܬܐ ݂

ܫܲܘܝܘܼܬܐ ܕܐܸܣܹ̈ܐ ܕܥܹܕܬܐ ܕܩܲܕܝܼܫܵܐ ܝܲܘܣܸܦ ܓܲܘ ܒܲܓ݂ܕܵܕ ܒܝܲܘܡܵܢܵܐ: ܝܼܠܲܝܗܝ ܩܲܠܝܼܠܵܐܝܼܬ ܒܸܫ ܟܘܼܦܵܢܹ̈ܐ ܡܼܢ ܫܲܘܝܘܼܬ݂ ܥܵܠܘܿܠܵܐ ܪܹܫܵܝܵܐ: ܒܥܸܠܬܐ ܕܲܢܚܵܬܵܐ ܕܐܲܪܥܵܐ ݂

ܦܝܼܫܠܵܗ̇ ܒܢܝܼܬܐ ܗܵܕܹܐ ܩܵܝܹܡܬܐ ܕܘܼܟ݂ܪܵܢܵܝܬܐ ܘܚܲܝܠܵܢܬܐ ܘܝܲܪܝܼܟ݂ܬܐ ܡܼܢ ܛܝܼܢܵܐ ܡܦܲܚܪܵܐ (ܡܒܘܼܫܠܵܐ): ܝܼܠܵܗ̇ ܚܕܵܐ ܐܘܼܪܚܵܐ ܥܲܬܝܼܩܬܐ ܠܒܸܢܝܵܢܵܐ ܓܲܘ ܐܲܬ݂ܪܵܐ ܕܒܹܝܬ ܢܲܗܖ̈ܝܼܢ: ܚܕܵܐ ܐܘܼܪܚܵܐ ܝܼܪܝܼܬ݂ܬܐ ܡܼܢ ܐܲܒ݂ܵܗܵܬܐ ܩܕܝܼܡܵܝܹ̈ܐ: ܘܦܝܼܫܠܵܗ̇ ܡܘܼܦܠܲܚܬܐ ܓܲܘ ܒܢܵܝܬܐ ܕܒܵܬܹ̈ܐ ܘܡܲܣܓ݂ܕܹ̈ܐ ܘܥܹܕܵܬܐ ܘܩܲܨܖܹ̈ܐ ܓܲܘ ܒܲܓ݂ܕܵܕ ݂ ܓܘܼܕܵܢܹ̈ܐ ܕܡܵܛܝܵܐ ܚܠܝܼܡܘܼܬܲܝܗܝ ܠܐܲܪܒܥܵܐ ܡܝܼܬܖܹ̈ܐ: ܟܹܐ ܡܥܲܕܪܝܼ ܠܲܢܛܵܪܵܐ ܩܲܪܝܼܪܘܼܬܐ ܕܒܸܢܝܵܢܵܐ ܒܩܲܝܛܵܐ ܘܫܲܚܝܼܢܘܼܬܐ ܒܣܸܬܘܵܐ ݂ ܟܠܲܝܗܝ ܬܲܖ̈ܥܵܢܹܐ ܘܟܵܘܵܬ݂ܐ ܘܩܸܛܖܹ̈ܐ ܡܒܲܩܠܹ̈ܐ (مدببة) ܝܢܵܐ: ܘܲܡܬܲܪܨܝܼ ܚܲܕ ܐܸܣܟܹܝܡܵܐ ܡܲܚܵܪܵܝܵܐ ܦܪܝܼܫܵܐ ܘܲܩܦܝܼܣܵܐ ܡܼܢ ܐܸܣܟܹܝܡܵܐ ܥܲܒܵܣܵܝܵܐ ܘܡܲܥܒܕܵܢ̈ܘܵܬܹܗ ݂

ܥܹܕܬܐ ܕܩܲܕܝܼܫܵܐ ܝܲܘܣܸܦ ܕܠܵܬܝܼܢܵܝܹ̈ܐ ܓܲܘ ܒܲܓ݂ܕܵܕ: ܝܵܗܒ݂ܵܐ ܒܵܠܵܗ̇ ܡܼܢ ܓܲܪܒܝܵܐ ܡܲܕܢܚܵܝܵܐ (ܓܘܼܕܵܐ ܕܙܲܡܵܖܹ̈ܐ ܘܲܓܸܢܝܵܢܵܐ ܕܡܲܕܒܚܵܐ) ܠܬܲܝܡܢܵܐ ܡܲܥܪܒ݂ܵܝܵܐ (ܡܲܥܠܵܢܵܐ ܕܦܵܬܐ ܕܥܹܕܬܐ) ݂ ܦܪܝܼܫܵܐ ܝܠܹܗ ܓܘܼܕܵܐ ܕܙܲܡܵܖܹ̈ܐ ܕܥܹܕܬܐ ܡܼܢ ܗܲܝܟܠܵܐ ܕܥܹܕܬܐ: ܒܡܸܨܥܵܝܘܼܬܐ ܕܚܲܕ ܣܸܬܪܵܐ ܡܬܘܼܪܨܵܐ ܡܼܢ ܠܘܼܚܹ̈ܐ ܕܫܝܼܫܵܐ ܚܘܵܪܵܐ ܣܢܝܼܕܹ̈ܐ ܒܓܘܼܕܵܐ ܕܓܸܢܝܵܢܵܐ ܡܒܲܝܢܵܐ ܕܐܝܼܬ ܓܲܘ ܡܲܕܒܚܵܐ ݂ ܒܓܲܪܒܝܵܐ ܡܲܥܪܒ݂ܵܝܵܐ ܐܲܝܟ݂ ܬܲܝܡܢܵܐ ܡܲܕܢܚܵܝܵܐ: ܟܹܐ ܚܵܬܡܝܼ ܕܖ̈ܵܥܹܐ ܕܓܘܼܠܦܵܢܹ̈ܐ ܕܥܹܕܬܐ ܒܐܵܘܵܢܹ̈ܐ ܙܥܘܿܖܹ̈ܐ ܩܵܐ ܨܠܘܿܬܐ ݂ ܘܥܲܠ ܓܹܒܵܐ ܐ݇ܚܪܹܢܵܐ ܕܥܹܕܬܐ: ܐܝܼܬ ܚܲܕ ܒܹܐܡܵܐ ܪܵܡܵܐ ܫܵܓ݂ܹܠ ܟܠܹܗ ܦܸܬ݂ܘܵܐ ܕܒܸܢܝܵܢܵܐ ܒܪܹܫ ܡܲܥܠܵܢܵܐ ܬܲܝܡܢܵܝܵܐ ܡܲܥܪܒ݂ܵܝܵܐ ݂

ܨܒ݂ܵܥܵܐ ܓܵܘܵܝܵܐ ܕܥܹܕܬܐ ܘܗܿܘ ܕܐܝܼܬ ܒܩܘܼܒܬܐ ܚܪܝܼܒ݂ܵܐ ܝܠܹܗ ܘܲܣܢܝܼܩܵܐ ܠܥܲܡܠܹ̈ܐ ܕܪܘܼܡܵܡܵܐ ܪܲܒܵܐ: ܘܐܵܦ ܘܵܠܹܐ ܕܦܵܝܫܝܼ ܡܬܘܼܖ̈ܨܹܐ ܨܸܠܦܹ̈ܐ (ܟ̰ܸܠܦܹ̈ܐ) ܒܲܖ̈ܵܝܹܐ ܠܲܡܫܲܪܘܿܪܹܐ ܕܒ݂ܵܪܬܐ ܕܒܸܢܝܵܢܵܐ ܡܼܢ ܟܠܲܝܗܝ ܓܹܒܵܢܹ̈ܐ: ܕܠܵܐ ܕܵܠܦܝܼ ܡܲܝܵܐ ܠܓܵܘܵܐ ܕܥܹܕܬܐ ݂

ܐܝܼܬ ܓܲܘ ܕܵܪܬܐ ܕܥܹܕܬܐ ܪܵܒܵܐ ܩܲܒ݂ܖ̈ܵܬܐ ܕܐܲܒ݂ܵܗܵܬܐ ܘܐ݇ܚܘܿܢܵܘܵܬܐ ܟܲܖ̈ܡܠܵܝܹܐ: ܘܕܲܝܖ̈ܵܝܹܐ ܘܕܲܝܖ̈ܵܬܐ (ܖ̈ܲܒܵܢܹ̈ܐ ܘܖ̈ܲܒܵܢܝܵܬܐ): ܕܲܥܒܸܕܠܗ݇ܘܿܢ ܬܸܫܡܸܫܬܐ ܩܵܐ ܥܹܕܬܐ ܓܲܘ ܒܲܓ݂ܕܵܕ ݂ ܣܵܗܕܹ̈ܐ (ܩܵܝܹܡܝܵܬܐ) ܕܩܲܒ݂ܖ̈ܵܬܐ ܣܢܝܼܩܹ̈ܐ ܝܠܲܝܗܝ ܠܬܘܼܖ̈ܵܨܹܐ ܫܲܪܝܼܖܹ̈ܐ ܘܩܲܛܝܼܢܹ̈ܐ: ܘܡܼܢ ܩܲܒ݂ܖ̈ܵܬܐ ܝܲܬܝܼܪ ܐܵܢܲܢܩܵܝܹ̈ܐ: ܝܼܠܹܗ ܩܲܒ݂ܪܵܐ ܕܕܲܝܪܵܝܵܐ ܘܒܵܨܘܿܝܵܐ ܘܝܲܠܝܼܦܵܐ (ܐܲܢܣܬܵܐܣ ܟܲܪܡܠܵܝܵܐ) ݂ ܠܕܸܦܢܵܐ ܕܥܹܕܬܐ ܐܝܼܬ ܕܲܝܪܵܐ ܟܲܪܡܠܵܝܵܐ ܘܡܲܕܪܲܫܬܐ ܕܩܲܕܝܼܫܵܐ ܝܲܘܣܸܦ ݂ ܘܲܒܥܸܠܬܐ ܕܲܚܦܵܪܬܐ ܘܲܡܛܵܝܬܐ ܕܥܵܠܘܿܠܵܐ ܕ(ܐܲܠܚܘܼܠܵܦܵܐܐ) ܠܫܲܘܝܘܼܬܐ ܕܥܹܕܬܐ: ܦܝܼܫܠܗ݇ܘܿܢ ܐܲܠܝܼܨܹ̈ܐ ܖ̈ܲܒܵܢܹܐ ܕܲܡܫܲܢܝܼ ܠܓܹܒܵܐ ܐ݇ܚܪܹܢܵܐ ܕܢܲܗܪܵܐ ܕܕܸܩܠܵܬ: ܘܐܵܦ ܡܲܕܪܲܫܬܐ ܡܫܘܼܢܹܐ ܠܵܗ̇ ܠܚܲܕ ܒܸܢܝܵܢܵܐ ܚܲܕܬܐ ܓܲܘ ܡܲܫܪܝܼܬܐ ܕ(ܥܸܠܘܝܼܵܐ: ܗܲܝ ܐܲܠܘܲܗܕܵܐ) ݂

ܘܥܹܕܬܐ ܕܩܲܕܝܼܫܵܐ ܝܲܘܣܸܽܦ ܕܠܵܬܝܼܢܵܝܹ̈ܐ ܓܲܘ ܒܲܓ݂ܕܵܕ: ܪܵܒܵܐ ܣܢܝܼܩܬܐ ܝܠܵܗ̇ ܠܪܘܼܡܵܡܵܐ ܓܡܝܼܪܵܐ ݂