ܬܲܫܥܝܼܬܐ ܕܲܡܫܝܼܚܵܝܘܼܬܐ ܓܲܘ ܕܵܘܹܝܕܝܼܵܐ ܘܓܲܘ ܡܵܬܘܵܬܐ ܐ݇ܚܖܹ̈ܢܹܐ ܕܓܲܘ ܦܢܝܼܬܐ: ܕܵܡܝܵܢܬܐ ܝܠܵܗ̇: ܐܝܼܬܘܼܬܐ ܩܲܕܝܼܡܬܐ ܕܫܲܒ݂ܛܵܐ ܝܗܘܼܕܵܝܵܐ: ܚܲܪܬܐ ܣܘܼܒܵܪܵܐ ܒܲܡܫܝܼܚܵܝܘܼܬܐ ܒܐܘܼܪܚܵܐ ܕܡܵܪܝ ܬܐܘܿܡܵܐ ܫܠܝܼܚܵܐ ( ܪܵܒܵܐ ܡܸܬܗܲܘܝܵܢܝܼܬܐ ܝܠܵܗ̇ ܕܝܼܠܹܗ ܬܵܐܕܵܘܸܣ ܝܼܕܝܼܥܵܐ ܓܲܘ ܐܹܘܲܢܓܲܠܝܼܘܿܢܹ̈ܐ ܒܝܲܗܘܼܕܵܐ): ܘܡܵܪܝ ܐܲܕܲܝ ܘܡܵܪܝ ܡܵܐܪܝܼ ݂ ܦܝܼܫܠܹܗ ܝܼܕܝܼܥܵܐ ܕܵܪܵܐ ܡܫܝܼܚܵܝܵܐ ܪܒ݂ܝܼܥܵܝܵܐ ܒܲܩܖ̈ܵܝܵܬܐ ܣܲܓܝܼܐܹ̈ܐ: ܘܬܘܼܢܵܝܹ̈ܐ ܥܲܡܡܵܝܹ̈ܐ ܕܲܡܬܲܢܝܼ ܠܚܲܝܹ̈ܐ ܕܣܵܗܕܹ̈ܐ ܕܦܝܼܫܠܗ݇ܘܿܢ ܖ̈ܕܝܼܦܹܐ ܒܝܲܕ ܡܲܠܟܵܐ ܦܵܪܣܵܝܵܐ ܫܵܒܘܼܪ ܬܪܲܝܵܢܵܐ ݂ ܘܓܲܘ ܗܵܢ ܡܸܬܚܵܐ ܝܲܪܝܼܟ݂ܵܐ ܡܼܢ ܡܫܝܼܚܵܝܘܼܬܐ ܒܟ݂ܝܼܪܵܝܬܐ: ܦܝܼܫܠܗ݇ܘܿܢ ܓܲܠܝܹ̈ܐ ܩܸܠܵܝܵܬ̈ܐ ܘܦܝܼܫܠܗ݇ܘܿܢ ܦܖ̈ܝܼܣܹܐ ܕܘܼܟܵܢܹ̈ܐ ܕܲܣܓ݂ܵܕܵܐ: ܘܲܕܪܝܼܓܵܐܝܼܬ ܦܝܼܫܠܗ݇ܘܿܢ ܡܫܘܼܬܐܸܣܹ̈ܐ ܥܹܕܵܬ̈ܐ ܘܕܲܝܖܹ̈ܐ ܐ݇ܣܘܼܖ̈ܝܵܝܹܐ ݂

ܓܲܘ ܡܸܬܚܵܐ ܕܗܵܠܹܝܢ ܕܵܖܹ̈ܐ ܝܲܖ̈ܝܼܟ݂ܐ ܠܥܲܕ ܢܦܵܠܬܐ ܕܐܸܡܦܪܵܛܘܿܪܘܼܬܐ ܥܘܼܬ݂ܡܵܢܵܝܬܐ: ܖ̈ܵܓ݂ܘܿܠܹܐ ܘܛܘܼܖ̈ܵܢܹܐ ܕܒܹܝܬ ܢܲܗܖ̈ܝܼܢ ܚܒ݂ܝܼܨܹ̈ܐ ܝܗ݇ܘܵܘ ܘܲܟܖ̈ܝܼܟ݂ܐ ܒܗܲܝܡܵܢܘܼܬܐ ܡܫܝܼܚܵܝܬܐ: ܘܝܼܗ݇ܘܵܘ ܒܹܝܬ ܓܲܘܣܵܐ ܠܥܹܕܬܐ ܕܡܲܕܢܚܵܐ ݂

ܕܵܪܵܐ ܕ(17) ܘܲܦܪܝܼܫܵܐܝܼܬ ܕܵܪܵܐ ܕ(18): ܝܼܗ݇ܘܵܐ ܟܲܗܝܼܢܵܐ ܩܵܐ ܫܘܼܕܵܖܹ̈ܐ ܩܵܬ݂ܘܿܠܝܼܩܵܝܹ̈ܐ: ܘܫܘܼܢܵܝܵܐ ܕܲܡܗܘܼܡܢܹ̈ܐ ܡܼܢ ܥܹܕܬܐ ܕܡܲܕܢܚܵܐ ܠܥܹܕܬܐ ܟܲܠܕܵܝܬܐ[1] ݂ ܘܲܒܫܲܢ݇ܬܐ ܕ1913 ܡܸܢܝܵܢܲܝܗܝ ܡܵܛܹܐ ܗ݇ܘܵܐ ܠ(300) ܟܲܠܕܵܝܹ̈ܐ[2] ݂

ܡܫܘܼܚܠܸܦܠܵܗ̇ ܐܵܕܫܵܢܵܝܘܼܬܐ ܬܲܘܕܝܼܬܵܢܵܝܬܐ ܘܐܘܼܡܬܵܢܵܝܬܐ: ܠܗܸܢܝܵܢܵܐ ܕܩܘܼܖ̈ܕܵܝܹܐ ܒܚܘܼܬܵܡܵܐ ܕܕܵܪܵܐ ܕ(19): ܘܫܘܼܪܵܝܵܐ ܕܕܵܪܵܐ ܕ(20): ܡܼܢ ܒܵܬܲܪ ܦܲܖ̈ܡܵܢܹܐ ܕ(ܣܲܝܦܘܿ)^[3]: ܕܦܝܼܫܠܗ݇ܘܿܢ ܥܒ݂ܝܼܕܹ̈ܐ ܥܲܠ ܡܫܝܼܚܵܝܹ̈ܐ ܒܝܲܕ ܐܸܡܦܪܵܛܘܿܪܘܼܬܐ ܥܘܼܬ݂ܡܵܢܵܝܬܐ: ܘܠܵܐ ܗܘܹܐ ܠܗ݇ܘܿܢ ܐܲܝܟܲܢ̈ܘܵܬܲܝܗܝ ܛܵܒܹ̈ܐ ܘܒܲܣܝܼܡܹ̈ܐ ܬܚܘܿܬ ܫܘܼܠܛܵܢܵܐ ܥܝܼܪܵܩܵܝܵܐ ܒܵܬܲܪ ܫܲܪܝܘܼܬܐ ܕܥܝܼܪܵܐܩ ܒܫܲܢ݇ܬܐ ܕ1932 ݂

__________

[1] ܚܙܝܼ:(ܥܹܕܬܐ ܟܲܠܕܵܝܬܐ ܩܵܬ݂ܘܿܠܝܼܩܵܝܬܐ: ܒܹܝܬ ܐܸܬܡܵܠܝ ܘܐܸܕܝܘܿܡ) ݂ ܩܦܝܼܣܵܐ ܡܼܢ ܡܓ݂ܠܬܐ ܩܸܬ݂ܘܿܠܝܼܩܵܝܬܐ ܦܵܦܵܝܬܐ ܠܫܲܢ݇ܬܐ ܕ 1914: ܐܲܒ݂ܵܐ ܓ̰ܘܼܙܹܝܦ ܬܘܼܦܲܢܟܲܓ̰ܝܼ: 1913 ݂

[2] ܝܵܬ ܡܲܒܘܼܥܵܐ

[3] ܫܸܡܵܐ ܐ݇ܣܘܼܪܝܵܝܵܐ ܠܐܲܒܝܼܕܘܼܬܐ ܟܢܘܼܫܝܵܝܬܐ ܕܐܵܬܘܿܖ̈ܵܝܹܐ ܟܲܠܕܵܝܹ̈ܐ ܐ݇ܣܘܼܖ̈ܝܵܝܹܐ ܒܝܲܕ ܐܸܡܦܪܵܛܘܿܪܘܼܬܐ ܥܘܼܬ݂ܡܵܢܵܝܬܐ ܒܫܸܢܹ̈ܐ 1915 ـ 1918 ݂

ܒܫܘܼܪܵܝܵܐ ܕܲܫܬܝܼܢܵܝܵܬܐ: ܘܡܼܢ ܩܕܵܡ ܬܠܵܬܐ ܐܲܣܵܖܹ̈ܐ ܡܼܢ ܦܠܵܫܹ̈ܐ ܐܲܡܝܼܢܵܝܹ̈ܐ ܒܲܝܢܵܬ݂ ܛܲܟ݂ܣܵܐ ܥܝܼܪܵܩܵܝܵܐ ܘ(ܦܹܫܡܲܪܓܵܐ) ܩܘܼܪܕܵܝܬܐ: ܐܝܼܬ ܗ݇ܘܵܐ ܩܘܼܪܒܵܐ ܠ(450) ܝܼܩܖ̈ܵܬܐ ܟܲܠܕܵܝܹ̈ܐ ܘܝܵܬ ܡܸܢܝܵܢܵܐ ܝܼܩܖ̈ܵܬܐ ܐܵܬܘܿܖ̈ܵܝܹܐ ܬܵܒܘܿܥܹ̈ܐ ܠܥܹܕܬܐ ܕܡܲܕܢܚܵܐ[1] ݂

ܣܒܸܠܠܗ݇ܘܿܢ (عانوا) ܟܢܘܼܫܝܹ̈ܐ ܡܫܝܼܚܵܝܹ̈ܐ: ܘܐܵܦ ܘܝܵܪܬܘܼܬܐ ܕܲܡܫܝܼܚܵܝܹ̈ܐ ܥܲܡܘܼܩܵܐܝܼܬ ܡܼܢ ܦܠܵܫܹ̈ܐ ܕܓܲܘ ܟܘܼܪܕܸܣܬܵܐܢ ܕܥܝܼܪܵܐܩ: ܘܲܦܪܝܼܫܵܐܝܼܬ ܒܫܲܢ݇ܬܐ ܕ1988: ܒܥܸܕܵܢ ܣܘܼܥܖ̈ܵܢܹܐ ܕ(ܐܲܢܦܵܐܠ): ܕܡܘܼܚܖܸ̈ܒ݂ܠܗ݇ܘܿܢ ܪܵܒܵܐ ܡܵܬܘܵܬܐ ܘܲܡܒܘܼܖ̈ܒܸܙܠܗ݇ܘܿܢ ܥܵܡܘܿܖ̈ܲܝܗܝ: ܘܦܝܼܫܠܵܗ̇ ܫܡܝܼܛܬܐ ܝܵܪܬܘܼܬܲܝܗܝ ܒ(ܒܘܿܡܒܹ̈ܐ ܘܓܵܖ̈ܘܿܦܹܐ ܡܝܼܟܵܢܝܼܟܵܝܹ̈ܐ)[2] ݂ ܓܲܘ ܦܢܝܼܬܐ ܛܘܼܪܵܝܬܐ ܕ(ܒܲܗܕܝܼܢܵܢ): ܐܲܝܟܵܐ ܕܟܹܐ ܢܵܦܠܵܐ ܡܵܬܐ ܕ(ܕܵܘܹܝܕܝܼܵܐ): ܦܝܼܫܠܗ݇ܘܿܢ ܡܘܼܚܖܸ̈ܒܹܐ ܘܲܬܠܝܼܚܹ̈ܐ ܠܵܐ ܒܵܨܘܿܪܵܐ ܡܼܢ (30) ܡܵܬܘܵܬܐ ܟܲܠܕܵܝܹ̈ܐ ܘ(40) ܥܹܕܵܬܐ ܡܼܢ ܫܲܢ݇ܬܐ ܕ1902 [3] ݂ ܘܗܵܕܟ݂ܵܐ ܦܝܼܫܠܵܗ̇ ܬܠܝܼܚܬܐ ܥܹܕܬܐ ܥܲܬܝܼܩܬܐ ܕܡܵܪܝ ܝܘܿܚܲܢܵܢ ܕܓܲܘ ܕܵܘܹܝܕܝܼܵܐ ܒܫܲܢ݇ܬܐ ܕ1988: ܘܦܝܼܫܠܗ݇ܘܿܢ ܐܲܠܝܼܨܹ̈ܐ ܐ݇ܢܵܫܹ̈ܐ ܕܡܵܬܐ ܕܥܵܪܩܝܼ ݂ ܪܵܒܵܐ ܡܸܢܲܝܗܝ ܡܚܹܐ ܠܗ݇ܘܿܢ ܒܹܝܬ ܓܲܘܣܵܐ ܘܐ݇ܙܸܠܠܗ݇ܘܿܢ ܠܬܲܝܡܢܵܐ ܡܲܕܢܚܵܝܵܐ ܕܬܘܼܪܟܝܼܵܐ: ܡܼܢ ܩܕܵܡ ܕܚܲܕܟܡܵܐ ܡܸܢܲܝܗܝ ܦܵܝܫܝܼ ܛܖ̈ܝܼܕܹܐ ܒܐܲܡܝܼܢܘܼܬ݂ܐ: ܘܲܕܥܵܪܬܐ ܕܚܲܕܟܡܵܐ ܐ݇ܚܖ̈ܵܢܹܐ ܐܝܼܡܲܢ ܕܲܦܪܸܩܠܗ݇ܘܿܢ ܥܲܡܠܹ̈ܐ ܒܥܸܠܕܒ݂ܵܒ݂ܵܝܹ̈ܐ ݂

ܦܝܼܫܠܵܗ̇ ܒܢܝܼܬܐ ܥܹܕܬܐ ܚܕܲܬܐ ܕܡܵܪܝ ܝܘܿܚܲܢܵܢ ܡܲܥܡܕܵܢܐ ܓܲܘ (ܕܵܘܹܝܕܝܼܵܐ) ܒܫܲܢ݇ܬܐ ܕ1991: ܒܙܲܒ݂ܢܵܐ ܕܪܹܫ ܐܲܦܸܣܩܘܿܦܹ̈ܐ ܕܵܘܝܼܕ ܒܲܦܪܘܿ: ܪܹܫܵܢܵܐ ܥܒ݂ܝܼܪܵܐ ܕ(ܟܵܪܝܼܬܵܐܣ) ܕܥܝܼܪܵܐܩ ݂

ܩܝܼܡܠܹܗ ܫܘܼܬܐܵܣܵܐ ܕ(ܟܵܪܝܼܬܵܐܣ) ܕܥܝܼܪܵܐܩ ܒܥܘܼܕܪܵܢܵܐ ܕܲܒܢܵܝܬܐ ܕ(24) ܒܵܬܹ̈ܐ ܓܲܘ ܕܵܘܹܝܕܝܼܵܐ: ܘܒܵܬܲܪܟܸܢ (40) ܒܵܬܹ̈ܐ ܒܡܲܚܫܲܚܬܐ ܘܥܘܼܕܪܵܢܵܐ ܕܘܲܙܝܪܪܵܐ ܥܒ݂ܝܼܪܵܐ ܕܓܲܘ ܟܘܼܪܕܸܣܬܵܐܢ ܕܥܝܼܪܵܐܩ ܡܝܲܩܪܵܐ ܣܵܪܓܝܼܣ ܐܵܓ݂ܵܓ̰ܵܐܢ ݂

ܡܲܚܝܲܝܬܐ ܕܗܵܕܹܐ ܡܵܬܐ: ܝܼܠܹܗ ܚܲܕ ܪܸܡܙܵܐ ܠܚܘܼܕܵܬܐ ܡܫܝܼܚܵܝܵܐ ܓܲܘ ܟܘܼܪܕܸܣܬܵܐܢ ܕܥܝܼܪܵܐܩ ݂ ܠܥܲܕ ܚܙܝܼܪܵܢ 2019: ܐܝܼܬ ܗ݇ܘܵܐ (50) ܝܼܩܖ̈ܵܬܐ ܒܸܚܝܵܝܵܐ ܓܲܘ ܕܵܘܹܝܕܝܼܵܐ: ܘܐܝܼܬ ܗ݇ܘܵܐ (25) ܝܼܩܖ̈ܵܬܐ ܡܼܢ ܗܵܕܹܐ ܡܵܬܐ ܓܲܘ ܬܲܘܬܵܒ݂ܘܼܬܐ[4] ݂

__________

[1] ܚܙܝܼ: “ܟܬܵܒ݂ܵܐ ܟܘܿܡܵܐ ܕܨܲܕܵܐܡ ܚܘܼܣܲܝܢ”: ܛܲܒ݂ܥܵܐ ܕ(ܟܪܝܼܣ ܟܘܿܬܫܝܼܪܵܐ): ܦ 394 ݂

[2] ܝܵܬ ܡܲܒܘܼܥܵܐ: ܦ 396 ݂

[3] ܝܵܬ ܡܲܒܘܼܥܵܐ ݂

[4] ܦܝܼܫܠܗ݇ܘܿܢ ܟܢܝܼܫܹ̈ܐ ܐܲܢܲܝ ܡܲܘܕܥܵܢ̈ܘܵܬܐ ܒܐܘܼܪܚܵܐ ܕܝܲܗܠܵܐ ܕ(ܡܝܼܙܘܿܦܘܿܬܵܡܝܵܐ): ܓܲܘ ܕܵܘܹܝܕܝܼܵܐ ܒܝܘܿܡ 14 ܒܐܝܼܵܪ 2019 ݂

ܢܵܦܠܵܐ ܥܹܕܬܐ ܕܩܲܕܝܼܫܵܐ ܝܘܿܚܲܢܵܢ ܡܲܥܡܕܵܢܵܐ ܒܲܚܕܵܐ ܡܫܘܼܚܬܐ (مساحة) ܣܟܝܼܪܬܐ: ܐܝܼܬ ܓܵܘܵܗ̇ ܚܕܲܐ ܓܲܢܬܐ ܙܥܘܿܪܬܐ: ܦܝܼܫܠܹܗ ܒܸܢܝܐ ܓܵܘܵܗ̇ ܚܲܕ ܒܸܢܝܵܢܵܐ ܕܸܡܝܵܐ ܠܲܡܥܲܪܬܐ ܕ(ܠܘܿܪܕ) ܠܐܝܼܩܵܪܵܐ ܕܡܲܪܝܲܡ ܒܬܘܼܠܬܐ ݂

ܥܹܕܬܐ ܝܼܠܵܗ̇ ܚܲܕ ܒܸܢܝܵܢܵܐ ܙܥܘܿܪܵܐ ܡܼܢ ܫܡܸܢܬܐ ܦܲܪܙܠܵܝܬܐ: ܐܝܼܬ ܥܲܠ ܫܸܛܚܵܗ̇ ܬܪܹܝܢ ܨܠܝܼܒܹ̈ܐ ܕܡܲܚܙܝܼ ܠܐܸܣܟܹܝܡܵܗ̇ ܡܫܝܼܚܵܝܵܐ ݂ ܡܲܚܵܪܘܼܬܐ ܐܲܪܕܸܟ݂ܠܵܝܬܐ ܓܵܘܵܝܬܐ: ܝܼܠܵܗ̇ ܒܲܕܡܘܼܬ݂ ܚܲܕ ܐܵܘܵܢܵ ܡܵܪܹܐ ܬܠܵܬ ܡܢܵܘܵܬܐ ܦܖ̈ܝܼܫܹܐ ܡܸܚܕܵܕܹ̈ܐ ܒܥܲܡܘܼܕܹ̈ܐ ܡܲܢܕܘܼܖ̈ܬܵܢܵܝܹܐ ݂ ܩܘܼܕܵܫ ܩܘܼܕܫܹܐ ܪܵܡܵܐ ܝܠܹܗ ܩܲܠܝܼܠܵܐܝܼܬ ܡܼܢ ܫܲܘܝܘܼܬ݂ ܐܲܪܥܵܐ: ܘܝܼܠܹܗ ܦܪܝܼܫܵܐ ܡܼܢ ܗܲܝܟܠܵܐ ܒܚܲܕ ܬܲܪܥܵܐ ܬܠܝܼܬܲܝ̈ ܩܸܫܬܵܬ݂ܐ ݂ ܟܵܘܵܬ݂ܵܐ ܕܥܹܕܬܐ ܦܝܼܫܠܗ݇ܘܿܢ ܡܣܲܩܠܹ̈ܐ ܒܣܸܬܖܹ̈ܐ ܡܨܲܒܬܹ̈ܐ (مزخرفة) ܒܬܘܼܩܵܢܹ̈ܐ ܘܣܘܼܟܵܡܹ̈ܐ ܬܲܘܕܝܼܬܵܢܵܝܹ̈ܐ ݂