ܠܦܘܼܬ݂ ܝܘܼܒܵܠܹ̈ܐ: ܦܝܼܫܠܵܗ̇ ܣܗܝܼܕܬܐ ܩܲܕܝܼܫܬܐ ܡܸܣܟܹܢܬܐ ܥܲܠ ܐܝܼܕܵܬܐ ܕܦܵܖ̈ܣܵܝܹܐ ܒܥܸܕܵܢ ܪܕܘܼܦܝܵܐ ܕܲܠܩܘܼܒ݂ܠ ܡܫܝܼܚܵܝܘܼܬܐ: ܒܝܲܕ ܡܲܠܟܵܐ ܣܵܣܵܢܵܝܵܐ ܝܲܙܕܓ݂ܝܼܪܕ ܬܪܲܝܵܢܵܐ (438 ـ 457) ݂ ܘܦܝܼܫܠܵܗ̇ ܕܟ݂ܝܼܪܬܐ ܡܸܣܟܹܢܬܐ ܓܲܘ ܚܲܕ ܟܬܵܒ݂ܵܐ ܡܣܲܩܡܵܐ ܒܫܲܢ݇ܬܐ ܕ1777: ܕܦܝܼܫܠܹܗ ܟܬܝܼܒ݂ܵܐ ܓܲܘ (ܐܵܪܵܕܸܢ) ܕܝܼܠܵܗ̇ ܚܕܵܐ ܡܵܬܐ ܛܘܼܪܵܝܬܐ ܓܲܘ ܟܘܼܪܕܸܣܬܵܐܢ ܕܥܝܼܪܵܐܩ ݂

ܚܫܸܒ݂ܠܹܗ ܡܲܠܟܵܐ ܦܵܪܣܵܝܵܐ: ܕܲܡܫܝܼܚܵܝܹ̈ܐ ܝܼܠܲܝܗܝ ܒܥܸܠܕܒ݂ܵܒܹ̈ܐ ܐܸܠܹܗ ܡܼܢ ܓܵܘܵܐ ܕܐܲܬܪܵܐ ܓܲܘ ܦܠܵܫܹܗ ܕܲܠܩܘܼܒ݂ܠ ܐܸܡܦܪܵܛܘܿܪܘܼܬܐ ܪܗܘܿܡܵܢܵܝܬܐ ܡܲܕܢܚܵܝܬܐ ܕܲܚܦܸܩܠܵܗ̇ ܠܲܡܫܝܼܚܵܝܘܼܬܐ ݂ ܠܵܐ ܡܘܼܢܬܹܐ ܠܹܗ ܝܲܙܕܓ݂ܝܼܪܕ ܬܪܲܝܵܢܵܐ ܠܲܦܪܵܩܵܐ ܡܼܢ ܡܫܝܼܚܵܝܘܼܬܐ ܓܲܘ ܐܸܡܦܪܵܛܘܿܪܘܼܬܐ ܦܵܪܣܵܝܬܐ: ܘܲܚܠܵܦ ܗܵܕܹܐ ܦܝܼܫܠܹܗ ܡܛܲܘܪܵܐ ܫܘܼܒܵܚܵܐ ܘܓܲܐܝܘܼܬܐ ܕܣܵܗܕܹ̈ܐ ܠܥܲܕ ܝܲܘܡܵܢܵܐ: ܟܲܕ ܝܼܠܹܗ ܚܲܕ ܡܼܢ ܥܝܵܕܹ̈ܐ ܕܲܡܫܝܼܚܵܝܹ̈ܐ ܓܲܘ ܒܹܝܬ ܢܲܗܖ̈ܝܼܢ ݂

ܥܹܕܬܐ ܟܲܠܕܵܝܬܐ: ܝܼܠܵܗ̇ ܥܹܕܬܐ ܩܵܬ݂ܘܿܠܝܼܩܵܝܬܐ ܒܪܹܐ ܠܵܗ̇ ܒܕܵܪܵܐ ܕ(16) ܒܥܸܠܬܐ ܕܦܘܼܠܵܓ݂ܵܐ ܕܲܒܪܹܐ ܠܹܗ ܓܲܘ ܥܹܕܬܐ ܕܡܲܕܢܚܵܐ ܝܸܡܵܐ ݂ ܒܫܲܢ݇ܬܐ ܕ1552: ܪܵܒܵܐ ܐܲܦܸܣܩܘܿܦܹ̈ܐ ܒܓܲܪܒܝܵܐ ܕܥܝܼܪܵܐܩ (ܬܲܝܡܢܵܐ ܕܬܘܼܪܟܝܵܐ ܘܓܲܪܒܝܵܐ ܕܐܝܼܪܵܢ)^[1]: ܟܠܹܐ ܠܗ݇ܘܿܢ ܕܲܠܩܘܼܒ݂ܠ ܓܘܼܒܵܝܵܐ ܕܩܵܬ݂ܘܿܠܝܼܩܵܐ ܦܵܛܪܝܼܵܪܟܵܐ ܕܥܹܕܬܐ ܕܡܲܕܢܚܵܐ ܡܵܪܝ ܫܸܡܥܘܿܢ ܬܡܝܼܢܵܝܵܐ ܒܐܘܼܪܚܵܐ ܕܝܘܼܪܬܵܢܵܐ ݂ ܘܲܡܓܘܼܒܹܐ ܠܗ݇ܘܿܢ ܓܲܘ ܡܲܘܨܸܠ ܦܵܛܪܝܼܵܪܟܵܐ ܐ݇ܚܪܹܢܵܐ ܫܸܡܹܗ ܝܘܿܚܵܢܵܐ ܣܘܼܠܵܩܵܐ: ܪܹܫܵܢܵܐ ܕܕܲܝܪܵܐ ܕܪܲܒܵܢ ܗܘܿܪܡܝܼܙܕ ܕܓܲܘ ܐܲܠܩܘܿܫ: ܕܲܫܩܸܠܠܹܗ ܫܘܼܡܵܗܵܐ ܕܝܘܿܚܲܢܵܐ ܬܡܝܼܢܵܝܵܐ: ܘܲܚܙܸܩܠܹܗ ܠܪܗܘܿܡܵܐ ܕܡܲܘܕܹܐ ܒܗܲܝܡܵܢܘܼܬ݂ܐ ܩܵܬ݂ܘܿܠܝܼܩܵܝܬܐ ݂ ܒܝܲܘܡܵܐ ܕ(20) ܒܢܝܼܣܵܢ ܫܲܢ݇ܬܐ ܕ1553: ܦܝܼܫܠܹܗ ܣܝܼܡܵܐ ܣܘܼܠܵܩܵܐ ܒܝܲܕ ܦܵܦܵܐ ܝܘܿܠܝܘܿܣ ܬܠܝܼܬܵܝܵܐ: ܦܵܛܪܝܼܵܪܟܵܐ ܠܥܹܕܬܐ ܟܲܠܕܵܝܬܐ ܩܵܬ݂ܘܿܠܝܼܩܵܝܬܐ: ” ܒܵܬܲܪ ܕܦܝܼܫܠܵܗ̇ ܝܼܠܝܼܕܬܐ ܪܘܼܫܡܵܐܝܼܬ ܡܼܢ ܣܝܼܩܘܿܡ ܣܝܵܡܝܼܕܹܗ”^[2] ݂

ܒܲܕܥܵܪܬܵܐ ܠܐܸܡܦܪܵܛܘܿܪܘܼܬ݂ܐ ܥܘܼܬ݂ܡܵܢܵܝܬܐ: ܡܫܘܼܬܐܸܣܠܹܗ ܝܘܿܚܲܢܵܐ ܣܘܼܠܵܩܵܐ ܟܘܼܪܣܝܵܐ ܕܦܵܛܪܝܼܵܪܟܘܼܬܹܗ ܓܲܘ ܡܕܝܼܢ݇ܬܐ ܕܕܝܼܵܪܒܲܟܸܪ (ܬܲܝܡܢܵܐ ܡܲܕܢܚܵܝܵܐ ܕܬܘܼܪܟܝܵܐ ܕܝܲܘܡܵܢܵܐ): ܥܲܠ ܪܲܚܝܼܩܘܼܬ݂ܐ ܕ(400) ܟܠܡ ܓܲܪܒܝܵܐ ܡܲܥܪܒ݂ܵܝܵܐ ܕܕܲܝܪܵܐ ܕܪܲܒܵܢ ܗܘܿܪܡܝܼܙܕ ݂ ܘܓܲܘ ܚܲܕ ܟܘܼܬܵܫܵܐ ܦܬܝܼܚܵܐ ܥܲܡ ܡܡܲܪܝܵܢܹܗ (منافسه) ܡܵܪܝ ܫܸܡܥܘܿܢ ܬܡܝܼܢܵܝܵܐ: ܦܝܼܫܠܹܗ ܕܒ݂ܝܼܩܵܐ ܡܵܪܝ ܝܘܿܚܲܢܵܐ ܣܘܼܠܵܩܵܐ ܘܕܸܪܝܵܐ ܓܲܘ ܒܹܝܬ ܐܲܣܝܼܖܹ̈ܐ ܘܲܩܛܝܼܠܵܐ ܒܫܲܢ݇ܬܐ ܕ1555 ݂

ܚܲܕ ܕܵܪܵܐ ܡܼܢ ܩܕܵܡ ܒܪܵܝܬܐ ܕܥܹܕܬܐ ܟܲܠܕܵܝܬܐ: ܘܲܒܫܲܢ݇ܬܐ ܕ1445: ܚܲܕܟܡܵܐ ܡܗܘܼܡܢܹ̈ܐ ܕܥܹܕܬܐ ܕܡܲܕܢܚܵܐ ܓܲܘ ܐܲܬ݂ܪܵܐ ܕܩܘܼܒܪܸܣ ܡܚܘܼܝܸܕܠܗ݇ܘܿܢ ܥܲܡ ܟܘܼܪܣܝܵܐ ܕܪܗܘܿܡܵܐ: ܐܲܝܟܵܐ ܕܦܵܦܵܐ ܐܘܿܓ̰ܝܼܢ ܪܒ݂ܝܼܥܵܝܵܐ ܡܫܘܼܡܗܵܐ ܠܹܗ ܥܹܕܬܲܝܗܝ ܒܥܸܕܵܢܵܗ̇: ܒܫܸܡ ܥܹܕܬܐ ܟܲܠܕܵܝܬܐ ݂

ܠܗܲܠ ܕܵܪܵܐ ܕ(19): ܗܵܢ ܦܘܼܠܵܓܵܐ ܥܹܕܬܵܢܵܝܵܐ ܗܘܹܐ ܠܹܗ ܡܲܒܘܼܥܵܐ ܕܟܘܼܬܵܫܵܐ ܩܸܢܛܵܝܵܐ ܠܪܵܒܵܐ ܡܼܢ ܡܗܘܼܡܢܹ̈ܐ ܕܥܹܕܬܐ ܕܡܲܕܢܚܵܐ: ܕܲܡܓܘܼܒܹܐ ܠܗ݇ܘܿܢ ܡܚܲܝܕܘܼܬ݂ܐ ܘܫܲܘܬܵܦܘܼܬܐ ܥܲܡ ܪܗܘܿܡܵܐ ݂

ܒܫܲܢ݇ܬܐ ܕ1830: ܦܝܼܫܠܹܗ ܡܫܘܼܢܝܵܐ ܟܘܼܪܣܝܵܐ ܕܥܹܕܬܐ ܟܲܠܕܵܝܬܐ ܡܼܢ ܕܝܼܵܪܒܲܟܸܪ ܠܡܲܘܨܸܠ: ܡܼܢ ܩܕܵܡ ܕܦܵܐܹܫ ܗ݇ܘܵܐ ܡܓܲܒܝܵܐ ܡܝܼܛܪܵܦܘܿܠܹܝܛܵܐ ܝܘܿܚܲܢܵܐ ܗܘܿܪܡܝܼܙܕ ܠܕܲܪܓ݂ܵܐ ܕܦܵܛܪܝܼܵܪܟܘܼܬ݂ܐ: ܘܚܲܪܬܐ ܦܝܼܫܠܹܗ ܡܫܘܼܢܝܵܐ ܠܒܲܓ݂ܕܵܕ ܒܫܲܢ݇ܬܐ ܕ1950: ܒܙܲܒ݂ܢܵܐ ܕܡܵܪܝ ܝܲܘܣܸܦ ܫܒ݂ܝܼܥܵܝܵܐ ܓ݂ܲܢܝܼܡܵܐ ݂

ܕܠܵܐ ܦܘܼܫܵܟ݂ܵܐ: ܡܼܢ ܒܲܝܢܵܬ݂ ܣܘܿܓ݂ܐܵܐ ܕܲܡܫܝܼܚܵܝܹ̈ܐ ܥܝܼܖ̈ܵܩܵܝܹܐ ܕܡܸܢܝܵܢܲܝܗܝ ܝܼܗ݇ܘܵܐ 1200000 ܚܲܕ ܡܸܠܝܘܿܢ ܘܲܬܪܸܡܵܐܐ ܐܲܠܦܹ̈ܐ ܡܼܢ ܩܕܵܡ ܩܪܵܒ݂ܵܐ ܩܲܕܡܵܝܵܐ ܕܒܲܪܩܵܩܵܐ (الخليج) ܒܫܲܢ݇ܬܐ ܕ1991 ݂ ܡܸܢܝܵܢܵܐ ܕܟܲܠܕܵܝܹ̈ܐ ܩܵܪܹܒ݂ ܗ݇ܘܵܐ ܠـ (750000) ܐܲܠܦܹ̈ܐ: ܠܦܘܼܬ ܚܘܼܫܒܵܢܵܐ ܐ݇ܚܵܪܵܝܵܐ ܕܥܵܡܘܿܖܹ̈ܐ ܒܫܲܢ݇ܬܐ ܕ1987: ܒܲܠܩܘܼܒ݂ܠ (300000) ܐܲܠܦܹ̈ܐ ܐܵܬ݂ܘܿܖ̈ܵܝܹܐ (ܥܹܕܬܐ ܕܡܲܕܢܚܵܐ ܘܥܹܕܬܐ ܥܲܬܝܼܩܬܐ) ݂ ܡܸܢܝܵܢܵܐ ܕܲܡܫܝܼܚܵܝܹ̈ܐ ܓܲܘ ܟܢܘܼܫܝܹ̈ܐ ܥܝܼܖ̈ܵܩܵܝܹܐ ܡܵܛܹܐ ܗ݇ܘܵܐ ܠـ 8%  : ܐܸܠܵܐ ܒܫܲܢ݇ܬܐ ܕ2018 ܟܡܵܐ ܝܠܹܗ ܡܸܢܝܵܢܲܝܗܝ ؟

ܡܫܲܪܸܪܝܼ ܚܲܕܟܡܵܐ ܡܲܘܕܥܵܢ̈ܘܵܬ݂ܐ ܕܘܼܟܬܵܢܵܝܹ̈ܐ: ܕܦܝܼܫܠܗ݇ܘܿܢ ܡܟܲܢܫܹ̈ܐ ܒܐܘܼܪܚܵܐ ܕܡܲܓܖ̈ܬܵܢܹܐ (مراسلين) ܕܫܘܼܬܐܵܣܵܐ (ܝܲܗܠܵܐ) ܕܡܝܼܙܘܿܦܘܿܬܵܡܝܵܐ: ܥܲܠ ܫܘܼܚܠܵܦܵܐ ܕܝܼܡܘܿܓ݂ܪܵܦܵܝܵܐ ܕܲܫܡܸܥܠܲܢ ܡܼܢ ܐ݇ܢܵܫܹ̈ܐ ܘܦܲܖ̈ܨܘܿܦܹܐ: ܕܦܝܼܫܠܗ݇ܘܿܢ ܣܥܝܼܖ̈ܐ ܐܲܘ ܚܸܙܝܹ̈ܐ ܒܝܲܕ ܡܲܓܖ̈ܬܵܢܲܝܢ ܕܘܼܟܬܵܢܵܝܹ̈ܐ ݂ ܦܝܼܫܬܐ ܝܠܵܗ̇ ܐܡܝܼܪܬܐ ܕܐܸܕܝܘܿܡ ܐܝܼܬ݂ ܒܸܫ ܒܵܨܘܿܪܵܐ ܡܼܢ (400000) ܐܲܠܦܹ̈ܐ ܟܲܠܕܵܝܹ̈ܐ ܒܥܝܼܪܵܐܩ: ܡܒܘܼܖ̈ܒܸܙܹܐ ܒܹܝܬ݂ ܒܲܓ݂ܕܵܕ ܘܟܘܼܪܕܸܣܬܵܐܢ ܘܫܸܛܚܵܐ ܕܢܝܼܢܘܹܐ ܘܒܲܨܪܵܐ ݂ ܠܵܐ ܟܠܹܐ ܠܗ݇ܘܿܢ ܥܲܣ̈ܩܵܘܵܬ݂ܐ ܘܲܬܥܝܼ̈ܫܵܬ݂ܐ (مصائب): ܕܐܬܹܐ ܠܗ݇ܘܿܢ ܒܪܹܫ ܡܫܝܼܚܵܝܹ̈ܐ ܥܝܼܪܖ̈ܵܩܵܝܹܐ: ܡܼܢ ܝܘܿܡ ܫܲܪܝܘܼܬܹܗ (استقلاله) ܕܥܝܼܪܵܐܩ ܒܫܲܢ݇ܬܐ ܕ1932 ݂ ܘܲܒܫܘܼܪܵܝܵܐ ܕܕܵܪܵܐ ܕܥܸܣܪܝܼܢ ܘܚܲܕ: ܠܵܐ ܦܝܼܫܠܹܗ ܚܸܙܝܵܐ ܚܲܕ ܡܸܬܚܵܐ ܕܲܢܝܵܚܵܐ: ܡܼܢ ܨܦܵܚܬܐ ܐܵܡܹܝܪܟܵܝܬܐ ܒܫܲܢ݇ܬܐ ܕ2003: ܡܼܢ ܚܲܕ ܓܹܒܵܐ ܡܼܢ ܚܨܵܪܵܐ ܪܲܒܵܐ ܕܦܝܼܫܠܹܗ ܣܝܼܡܵܐ ܒܝܲܕ ܐܸܡ̈ܘܵܬ݂ܐ ܡܚܲܝܕܹ̈ܐ: ܘܥܸܢܦܵܐ ܕܣܝܼ̈ܥܵܬ݂ܐ ܡܝܼܠܝܼ̈ܫܝܵܬ݂ܐ ܐܸܣܠܵܡܵܝܹ̈ܐ: ܘܲܪܕܘܼܦܝܵܐ ܕܐܬܹܐ ܠܹܗ ܒܪܹܫ ܡܫܝܼܚܵܝܹ̈ܐ ܡܼܢ ܢܦܵܠܬܐ ܕܛܲܟ݂ܣܵܐ ܕܨܲܕܵܐܡ ܚܘܼܣܲܝܢ ݂

ܝܲܘܡܵܢܵܐ ܥܹܕܬܐ ܟܲܠܕܵܝܬܐ ܒܸܬܪܵܨܵܐ ܝܠܵܗ̇ ܡܼܢ ܡܗܘܼܡ̈ܢܵܗ̇ ܕܐܝܼܬ ܒܐܲܬ݂ܖ̈ܵܘܵܬ݂ܐ ܕܬܲܘܬܵܒ݂ܘܼܬܐ: ܓܲܘ ܐܘܼܚܕܵܢܹ̈ܐ ܡܚܲܝܕܹ̈ܐ ܕܐܵܡܹܝܪܟܵܐ: ܐܘܿܪܘܿܦܵܐ: ܐܘܿܣܬܪܵܠܝܵܐ: ܟܵܢܲܕܵܐ: ܢܝܘܿܙܠܲܢܕܵܐ: ܚܘܼܝܵܕܵܐ ܣܘܿܦܝܵܬܵܝܵܐ ܕܕܲܥܒܲܪ: ܘܲܦܪܝܼܫܵܐܝܼܬ ܓܲܘ ܪܘܼܣܝܵܐ ܘܐܘܿܟܪܵܢܝܵܐ ܘܓ̰ܘܿܪܓ̰ܝܵܐ (ܬܸܒܠܝܼܣܝܼ) ݂

__________

[1] ܒܕܵܪܵܐ ܕ(16): ܓܲܘ ܐܸܡܦܪܵܛܘܿܪܘܼܬ݂ܐ ܥܘܼܬ݂ܡܵܢܵܝܬܐ ܘܦܵܪܣܵܝܬܐ ݂

[2] ܡܼܢ (ܬܲܫܥܝܼܬܐ ܕܥܹܕܬܐ ܕܡܲܕܢܚܵܐ): ܪܝܼܡܘܹܢܕ ܠܘܿܟܘܿܙ: ܐܝܼܠܘܿܠ 1995: ܦ 328 ݂

ܚܲܕ ܦܸܣܩܵܐ ܥܲܠ ܬܲܫܥܝܼܬܐ ܕܲܡܫܝܼܚܵܝܹ̈ܐ ܕܡܲܘܨܸܠ:[1]

ܐܵܦܸܢ ܕܩܵܐܹܡ ܕܲܡܫܝܼܚܵܝܹ̈ܐ ܕܡܲܘܨܸܠ ܕܪܵܡܵܝܵܐ ܝܠܹܗ (مأساوي): ܐܸܠܵܐ ” ܒܸܕ ܦܵܝܫܵܐ ܡܲܘܨܸܠ ܚܕܵܐ ܡܕܝܼܢ݇ܬܐ ܡܫܝܼܚܵܝܬܐ “[2] ܐܲܝܟ݂ ܕܲܓܠܝܼܬܐ ܝܠܵܗ̇ ܡܼܢ ܬܲܫܥܝܼܬܵܗ̇ ܘܝܵܪܬܘܼܬܵܗ̇ ܥܲܬܝܼܩܬܐ ܘܕܵܖ̈ܵܝܬܐ ݂

ܘܐܵܦܸܢ ܕܐܲܦܸܣܩܘܿܦܘܼܬ݂ܐ ܩܲܕܡܵܝܬܐ ܡܫܘܼܬܐܸܣܬܐ ܝܗ݇ܘܵܐ ܒܫܲܢ݇ܬܐ ܕ(554)[3]: ܐܸܠܵܐ ܐܵܦ ܐܵܢܲܢܩܵܝܬܐ ܝܠܵܗ̇ ܕܡܲܬܒܲܚ ܓܲܘ ܒܵܠܲܢ: ܗܿܘ ܝܘܼܒܵܠܵܐ ܡܫܝܼܚܵܝܵܐ ܫܠܝܼܚܵܝܵܐ ܥܲܬܝܼܩܵܐ ݂ “ܬܠܵܬ ܥܹܕܵܬ̈ܐ ܐܝܼܬ ܠܗ݇ܘܿܢ ܐܝܼܩܵܪܵܐ ܕܦܝܼܫܠܗ݇ܘܿܢ ܡܫܘܼܬܐܸܣܹ̈ܐ ܓܲܘ ܒܵܬܹ̈ܐ ܕܦܝܼܫܬܐ ܝܠܵܗ̇ ܐܡܝܼܪܬܐ ܕܝܬܸܒ݂ܠܗ݇ܘܿܢ ܐܲܘ ܫܟܸܢܘܼܢ ܓܵܘܲܝܗܝ ܫܠܝܼܚܹ̈ܐ ܕܡܵܪܲܢ ݂ ܐܲܝܟܵܐ ܕܦܝܼܫܠܵܗ̇ ܒܢܝܼܬܐ ܥܹܕܬܐ ܕ(ܫܸܡܥܘܿܢ ܐܲܠ ـ ܨܲܦܵܐܐ) ـ ܦܝܼܫܠܵܗ̇ ܒܢܝܼܬܐ ܒܡܸܬܚܵܐ ܕܕܵܪܵܐ ܬܪܲܥܣܝܼܪܵܝܵܐ ܘܲܬܠܵܬܲܥܣܝܼܪܵܝܵܐ ـ ܓܲܘ ܡܲܘܬܒ݂ܵܐ (موقع)ܕܫܵܟܹܢ ܗ݇ܘܵܐ ܓܵܘܹܗ ܩܲܕܝܼܫܵܐ ܦܲܛܪܘܿܣ: ܒܥܸܕܵܢ ܚܙܘܼܩܝܹܗ ܠܒܵܒܸܠ: ܘܥܹܕܬܐ ܕܡܵܪܝ ܬ݂ܝܘܿܕܘܿܪܣ ܒܸܕ ܦܵܝܫܵܐ ܐܣܝܼܪܬܐ ܒܲܚܙܘܼܩܝܵܐ ܕܡܵܪܝ ܒܲܪܬ݂ܘܿܠܡܵܘܸܣ ݂ ܐܸܠܵܐ ܠܦܘܼܬ݂ ܫܠܝܼܚܵܐ ܡܵܪܝ ܬܐܘܿܡܵܐ ܟܲܕ ܗܿܘ ܒܐܘܼܪܚܹܗ ܠܗܸܢܕܘܿ: ܒܲܝܬܐ ܕܲܫܟܝܼܢܵܐ ܝܗ݇ܘܵܐ ܓܵܘܹܗ ܦܝܼܫܠܹܗ ܥܹܕܬܐ”[4] ݂ ܘܬܲܚܘܼܒܵܐܝܼܬ ܗܵܕܹܐ ܥܹܕܬܐ: ܝܼܠܵܗ̇ ܥܹܕܬܐ ܕܡܵܪܝ ܬܐܘܿܡܵܐ ܕܐ݇ܣܘܼܖ̈ܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ݂

ܒܸܕܥܵܪܵܐ ܝܠܵܗ̇ ܬܲܫܥܝܼܬܵܐ ܕܥܹܕܬܐ ܩܲܕܡܵܝܬܐ ܕܦܝܼܫܠܵܗ̇ ܚܙܝܼܬܐ ܓܲܘ ܢܝܼܢܘܹܐ (ܝܲܘܡܵܢܵܐ ܡܲܘܨܸܠ ܡܲܕܢܚܵܝܬܐ) ܠܫܲܢ݇ܬܐ ܕ570: ܘܦܵܝܫܵܐ ܕܟ݂ܝܼܪܬܐ ܓܲܘ ܬܲܫܥܝܼܬܐ ܣܥܲܪܕܵܝܬܐ (ܢܸܣܛܘܿܪܢܵܝܬܐ) ܒܫܸܡ ܥܹܕܬܐ ܕܡܵܪܝ ܐܹܫܲܥܝܵܐ ݂ ܘܒܲܫܪܵܪܵܐ: ܐܵܗܵܐ ܡܫܲܪܘܿܪܹܐ ܝܠܵܗ̇ ܠܥܲܬܝܼܩܘܼܬ݂ ܐܝܼܬܘܼܬܐ ܕܲܟܢܘܼܫܝܵܐ ܡܫܝܼܚܵܝܵܐ ܒܗܵܕܹܐ ܦܢܝܼܬܐ ݂ ܒܕܵܪܵܐ ܫܒ݂ܝܼܥܵܝܵܐ: ܐܵܦ ܥܹܕܬܐ ܕܡܵܪܝ ܬܐܘܿܡܵܐ ܢܲܩܝܼܦܬܐ ܠܟܢܘܼܫܝܵܐ ܐ݇ܣܘܼܪܵܝܵܐ ܐܲܪܬ݂ܘܿܕܘܿܟܣܵܝܵܐ: ܝܼܕܝܼܥܬܐ ܝܗ݇ܘܵܐ ܬܘܼܒ݂ ݂ ܘܕܲܝܪܵܐ ܕܡܵܪܝ ܓܲܒ݂ܪܝܼܐܹܝܠ ܡܼܢ ܕܵܪܵܐ ܫܒ݂ܝܼܥܵܝܵܐ ܘܒܵܬܪܹܗ: ܝܼܗ݇ܘܵܐ ܩܸܢܛܪܘܿܢ ܕܲܚܕܵܐ ܡܲܕܪܲܫܬܐ ܬܹܐܘܿܠܘܿܓ݂ܵܝܬܐ ܘܠܝܼܬܘܿܪܓ̰ܵܝܬܐ ܪܲܒܬܐ ܕܥܹܕܬܐ ܕܡܲܕܢܚܵܐ ݂ ܥܹܕܬܐ ܟܲܠܕܵܝܬܐ ܕ(ܐܲܠܛܵܗܝܼܪܵܐ: ܒܛܝܼܢܘܼܬܐ ܕܠܵܐ ܡܘܼܡܵܐ): ܦܝܼܫܠܵܗ̇ ܒܢܝܼܬܐ ܒܕܘܼܟܬܐ ܕܗܵܢ ܕܲܝܪܵܐ ܒܕܵܪܵܐ ܕ(18)[5] ݂

ܘܒܲܥܒ݂ܘܿܪܝܵܐ ܕܙܲܒ݂ܢܹ̈ܐ ܘܕܵܖܹ̈ܐ: ܘܥܲܡ ܛܘܼܘܵܪܵܐ ܕܲܟܢܘܼܫܝܹ̈ܐ ܘܟܘܼܬܵܫܹ̈ܐ ܓܲܘ ܡܲܘܨܸܠ: ܐܬܹܐ ܠܗ݇ܘܿܢ ܠܲܡܫܲܬܐܘܿܣܹܐ ܥܹܕܵܬ̈ܐ ܣܲܓܝܼܐܵܬ݂ܵܐ ܒܫܘܼܡܵܗܹ̈ܐ ܡܫܲܚܠܦܹ̈ܐ: ܚܒ݂ܵܫܵܐ ܐܵܦ ܥܹܕܵܬ̈ܐ ܕܐܵܖܸ̈ܡܢܵܝܹܐ ܘܠܵܬܝܼܢܵܝܹ̈ܐ ݂

ܚܵܒ݂ܹܫ ܗܵܢ ܦܸܣܩܵܐ ܡܼܢ ܬܲܫܥܝܼܬܐ ܕܲܡܫܝܼܚܵܝܹ̈ܐ ܓܲܘ ܡܲܘܨܸܠ: ܐܬܵܝܬܐ ܕܡܲܫܠܡܵܢܘܼܬ݂ܐ ܘܲܦܪܵܣܬܵܗ̇ ݂ ܢܦܸܠܠܵܗ̇ ܡܲܘܨܸܠ ܒܫܲܢ݇ܬܐ ܕ641: ܘܦܝܼܫܠܗ݇ܘܿܢ ܡܫܝܼܚܵܝܹ̈ܐ ܕܡܲܘܨܸܠ ܡܼܢ (ܐ݇ܢܵܫܲܝ̈ ܗܲܝܡܵܢܘܼܬܐ (ܕܼܸܡܵܐ): أهل ذمة): ܥܲܡ ܚܲܕܟܡܵܐ ܙܸܕܩܹ̈ܐ ܡܬܲܚܡܹ̈ܐ: ܘܘܵܠܝܵܬܹ̈ܐ ܐܲܠܝܼܨܹ̈ܐ ܠܲܥܒ݂ܵܕܵܐ ܕܒܵܥܝܵܐ ܠܗ݇ܘܿܢ ܘܛܵܠܒܵܐ ܠܗ݇ܘܿܢ ܗܝܼܵܝܘܼܬܲܝܗܝ ܬܲܘܕܝܼܬܵܢܵܝܬܐ ݂ ܗܵܢܵܐ ܩܵܐܹܡ ܗܘܹܐ ܠܹܗ ܐܲܡܝܼܢܵܐ ܠܗܲܠ ܕܵܪܵܐ ܬܫܲܥܣܝܼܪܵܝܵܐ: ܘܲܚܬܸܡܠܹܗ ܓܲܘ ܐܸܡܦܪܵܛܘܿܪܘܼܬ݂ܐ ܥܘܼܬ݂ܡܵܢܵܝܬܐ ܒܫܲܢ݇ܬܐ ܕ1855 ݂ ܘܐܵܦܸܢ ܕܗܵܢ ܪܸܥܝܵܢܵܐ ܡܒܲܣܬܪܵܐ ܝܠܹܗ: ܦܝܼܫܠܗ݇ܘܿܢ ܡܫܝܼܚܵܝܹ̈ܐ ܘܝܗܘܼܕܵܝܹ̈ܐ ܝܼܕܝܼܥܹ̈ܐ ܒܩܵܐܹܡܲܝܗܝ (ܕܼܸܡܵܝܵܐ): ܘܦܝܼܫܠܹܗ ܗܵܢ ܪܸܥܝܵܢܵܐ ܡܬܲܚܘܿܡܹܐ ܠܗܲܘܢܵܐ ܡܲܫܠܡܵܢܵܐ: ܘܲܡܫܲܠܛܘܿܢܹܐ ܠܚܲܝܹ̈ܐ ܓܵܘܵܢܵܝܹ̈ܐ: ܒܩܘܼܪܒܵܐ (تقريبًا) ܓܲܘ ܟܠܲܝܗܝ ܐܲܬ݂ܖ̈ܵܘܵܬ݂ܐ ܕܡܲܫܠܡܵܢܹ̈ܐ ݂ ܘܲܥܕܲܡܵܐ ܠܝܲܘܡܵܢܵܐ: ܚܲܝܠܵܢܵܐ ܝܠܹܗ ܩܵܢܘܿܢܵܐܝܼܬ ܗܵܢ ܪܸܥܝܵܢܵܐ ܓܲܘ ܐܲܬ݂ܪܵܐ ܕܐܝܼܪܵܢ ݂

ܒܕܵܪܵܐ ܬܪܲܥܣܝܼܪܵܝܵܐ ܘܬܠܵܬܲܥܣܝܼܪܵܝܵܐ: ܒܙܲܒ݂ܢܵܐ ܕܲܣܠܘܿܩܵܝܹ̈ܐ: ܡܫܘܼܠܛܸܢܘܼܢ ܐܲܬܵܒܟܵܝܹ̈ܐ ܠܟܠܲܝܗܝ ܦܸܢ̈ܝܵܬܐ ܕܡܝܼܙܘܿܦܘܿܬܵܡܝܵܐ: ܘܲܥܒܸܕܠܗ݇ܘܿܢ ܠܡܲܘܨܸܠ ܩܸܢܛܪܘܿܢ ܕܫܘܼܠܛܵܢܵܐ ݂ ܒܗܵܢܵܐ ܙܲܒ݂ܢܵܐ: ܐ݇ܣܘܼܖ̈ܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܕܦܝܼܫܠܗ݇ܘܿܢ ܖ̈ܕܝܼܦܹܐ ܓܲܘ ܬܲܟܪܝܼܬ: ܥܪܸܩܠܗ݇ܘܿܢ ܠܫܸܛܚܵܐ ܕܢܝܼܢܘܹܐ ܘܲܠܡܲܘܨܸܠ: ܐܲܝܟܵܐ ܕܲܡܫܘܼܬܐܸܣܠܗ݇ܘܿܢ ܟܢܘܼܫܝܲܝܗܝ ܕܝܼܠܵܢܵܝܵܐ: ܘܲܒܢܹܐ ܠܗ݇ܘܿܢ ܠܥܹܕܬܐ ܕܡܵܪܝ ܐܲܚܵܐ ܕܝܸܡܹܗ (ܚܘܿܕܹܝܢܝܼ) ݂ ܒܚܘܼܬܵܡܵܐ ܕܕܵܪܵܐ ܕܥܸܣܪܝܼܢ: ܒܥܸܠܬܐ ܕܛܲܘܦܵܢܹ̈ܐ ܕܲܗܘܹܐ ܠܗ݇ܘܿܢ ܒܡܲܫܪܝܼܬܐ ܕܲܢܦܝܼܠܬܐ ܝܗ݇ܘܵܐ ܓܵܘܵܗ̇ ܥܹܕܬܐ: ܡܲܝܵܐ ܡܟܘܼܣܹܐ ܠܗ݇ܘܿܢ ܠܥܹܕܬܐ ܕܦܝܼܫܬܐ ܝܗ݇ܘܵܐ ܒܢܝܼܬܐ ܒܲܚܕܵܐ ܐܲܪܥܵܐ ܒܸܫ ܟܘܿܦܵܢܬܐ ܡܼܢ ܫܲܘܝܘܼܬܐ ܕܐܲܪܥܵܐ ܥܝܵܕܵܝܬܐ ݂ ܠܗܵܕܹܟ݂ ܦܝܼܫܠܵܗ̇ ܫܒ݂ܝܼܩܬܐ ܥܹܕܬܐ ܘܲܬܠܝܼܚܬܐ: ܘܦܝܼܫܠܵܗ̇ ܒܢܝܼܬܐ ܚܕܵܐ ܥܹܕܬܐ ܚܕܲܬܐ ܒܪܹܫ ܗܿܝ ܥܲܬܝܼܩܬܐ ݂ ܘܡܼܢ ܛܵܒ݂ܘܼܬ݂ ܓܲܕܵܐ: ܦܝܼܫܠܹܗ ܡܫܘܼܢܝܵܐ ܬܲܪܥܵܐ ܡܲܠܟܵܝܵܐ ܕܲܓܠܝܼܦܵܐ ܝܗ݇ܘܵܐ (منحوت)ܐܲܘ ܢܓ݂ܝܼܪܵܐ ܥܲܠ ܐܸܣܟܹܝܡܵܐ ܕܐܲܬܵܒܟܵܝܹ̈ܐ: ܘܲܕܡܫܘܼܡܸܗ ܠܹܗ ܐܲܒ݂ܵܐ ܦܝܼܝܹܗ ܒـ ” ܡܲܪܓܵܢܝܼܬܐ ܕܲܓܠܝܼܦܘܼܬ݂ܐ ܡܫܝܼܚܵܝܬܐ ܒܕܵܪܵܐ ܬܠܵܬܲܥܣܝܼܪܵܝܵܐ “[6] ݂

ܒܵܬܲܪ ܫܘܼܠܛܵܢܵܐ ܕܐܲܬܵܒܟܵܝܹ̈ܐ: ܡܨܹܐ ܠܹܗ ܡܓܘܿܠܵܝܵܐ (ܗܘܿܠܵܟܘܿ ܚܵܐܢ) ܕܫܲܠܛܸܢ ܥܲܠ ܡܲܘܨܸܠ: ܐܸܠܵܐ ܠܵܐ ܥܒܸܕܠܹܗ ܓܵܘܵܗ̇ ܡܵܐ ܕܲܥܒܸܕܠܹܗ ܡܼܢ ܚܪܵܒ݂ܵܐ ܘܲܢܚܵܪܵܐ ܓܲܘ ܒܲܓ݂ܕܵܕ ܒܫܲܢ݇ܬܐ ܕ1258: ܘܗܵܕܹܐ ܒܛܲܝܒܘܼܬ݂ܐ ܕܕܲܝܵܢܵܐ ܡܗܝܼܪܵܐ ܕܲܡܕܝܼܢ݇ܬܐ (ܠܘܼܠܘܼ): ܕܝܼܗ݇ܘܵܐ ܡܼܢ ܫܸܪܫܵܐ ܐܵܪܸܡܢܵܝܵܐ[7] ݂ ܘܥܲܡ ܗܵܕܹܐ: ܕܵܪܵܐ ܢܲܩܝܼܦܵܐ (ܕܒܵܬܪܹܗ) ܝܼܗ݇ܘܵܐ ܕܪܵܡܵܝܵܐ ݂ ” ܖ̈ܕܘܼܦܝܹܐ ܥܲܠ ܡܫܝܼܚܵܝܹ̈ܐ ܡܛܹܐ ܠܗ݇ܘܿܢ ܠܪܹܫܲܝܗܝ (ܠܕܲܖ̈ܓ݂ܲܝܗܝ ܥܸܠܵܝܵܐ) ܒܙܲܒ݂ܢܵܐ ܕ(ܬܝܼܡܘܿܪܠܸܢܟ): ܗܿܘ ܕܲܨܦܸܚܠܹܗ ܓܲܝܣܹܗ ܠܡܲܕܢܚܵܐ ܡܸܨܥܵܝܵܐ ܒܫܸܢܹ̈ܐ ܩܲܕܡܵܝܹ̈ܐ ܕܕܵܪܵܐ ܐܲܪܒܲܥܣܝܼܪܵܝܵܐ: ܘܲܟܣܸܚܠܹܗ ܠܥܵܡܘܿܖܹ̈ܐ ܡܫܝܼܚܵܝܹ̈ܐ ݂ ܠܲܝܬ ܥܹܕܬܐ ܡܫܝܼܚܵܝܬܐ ܡܲܕܢܚܵܝܬܐ ܕܲܚܙܹܐ ܠܵܗ̇ ܖ̈ܕܘܼܦܝܹܐ ܘܩܸܛܠܹ̈ܐ ܐܲܝܟ݂ ܥܹܕܬܐ ܕܡܲܕܢܚܵܐ ܝܸܡܵܐ: ܟܢܘܼܫܝܵܐ ܡܫܝܼܚܵܝܵܐ ܥܝܼܪܵܩܵܝܵܐ ܚܫܝܼܚܵܐ ܝܠܹܗ ܕܛܵܠܹܒ ܘܩܵܪܹܐ ܠܙܸܕܩܵܐ ܕܣܵܗܕܘܼܬ݂ܐ “[8] ݂

ܒܫܲܢ݇ܬܐ ܕ1516: ܢܦܸܠܠܵܗ̇ ܡܲܘܨܸܠ ܠܓܵܗܵܐ ܩܲܕܡܵܝܬܐ ܒܐܝܼܕܵܐ ܕܬܘܼܖ̈ܵܟܵܝܹܐ ܥܘܼܬ݂ܡܵܢܵܝܹ̈ܐ: ܐܸܠܵܐ ܒܕܵܪܵܐ ܢܲܩܝܼܦܵܐ ܦܪܸܣܠܗ݇ܘܿܢ ܫܘܼܠܛܵܢܲܝܗܝ ܕܲܡܬܸܚܠܹܗ ܠܐܲܪܒܲܥ ܕܵܖܹ̈ܐ ܓܲܘ ܐܲܬ݂ܪܵܐ ܕܒܹܝܬ ܢܲܗܖ̈ܝܼܢ: ܒܵܬܲܪ ܟܒ݂ܵܫܬܐ ܕܒܲܓ݂ܕܵܕ ܒܫܲܢ݇ܬܐ ܕ1638 ܒܝܲܕ ܫܲܠܝܼܛܵܐ ܡܘܼܪܵܐܕ ܪܒ݂ܝܼܥܵܝܵܐ ݂

ܡܲܘܨܸܠ ܒܕܵܪܵܐ ܫܬܲܥܣܝܼܪܵܝܵܐ: ܝܼܗ݇ܘܵܐ ܩܸܢܛܪܘܿܢ ܪܲܒܵܐ ܕܡܲܥܒ̇ܕܵܢܘܼܬ݂ܐ ܡܫܝܼܚܵܝܬܐ: ܒܗܿܝ ܕܝܼܗ݇ܘܵܐ ܕܘܼܟܬܐ ܕܲܒܪܹܐ ܠܹܗ ܓܵܘܵܗ̇ ܦܘܼܠܵܓ݂ܵܐ ܓܲܘ ܥܹܕܬܐ ܕܡܲܕܢܚܵܐ: ܥܲܡ ܓܘܼܒܵܝܵܐ ܕܝܘܿܚܲܢܵܐ ܣܘܼܠܵܩܵܐ ܦܵܛܪܝܼܵܪܟܵܐ ܩܲܕܡܵܝܵܐ ܠܥܹܕܬܐ ܟܲܠܕܵܝܬܐ ݂ ܝܼܗ݇ܘܵܐ ܪܹܫܵܢܵܐ ܕܕܲܝܪܵܐ ܕܪܲܒܵܢ ܗܘܿܪܡܝܼܙܕ ܕܓܲܘ ܐܲܠܩܘܿܫ: ܕܲܫܩܸܠܠܹܗ ܫܘܼܡܵܗܵܐ ܕܝܘܿܚܲܢܵܐ ܬܡܝܼܢܵܝܵܐ: ܘܲܚܙܸܩܠܹܗ ܠܪܗܘܿܡܵܐ ܕܡܲܘܕܹܐ ܒܗܲܝܡܵܢܘܼܬ݂ܐ ܩܵܬ݂ܘܿܠܝܼܩܵܝܬܐ ݂ ܒܝܲܘܡܵܐ ܕ(20) ܒܢܝܼܣܵܢ ܫܲܢ݇ܬܐ ܕ1553: ܦܝܼܫܠܹܗ ܣܝܼܡܵܐ ܣܘܼܠܵܩܵܐ ܒܝܲܕ ܦܵܦܵܐ ܝܘܿܠܝܘܿܣ ܬܠܝܼܬܵܝܵܐ: ܦܵܛܪܝܼܵܪܟܵܐ ܩܵܐ ܥܹܕܬܐ ܟܲܠܕܵܝܬܐ ܩܵܬ݂ܘܿܠܝܼܩܵܝܬܐ: ” ܗܿܝ ܕܦܝܼܫܠܵܗ̇ ܝܼܠܝܼܕܬܐ ܪܘܼܫܡܵܐܝܼܬ ܡܼܢ ܣܝܼܩܘܿܡ ܣܝܵܡܝܼܕܹܗ”[9] ݂ ܡܼܢ ܒܵܬܲܪ ܕܝܼܵܪܒܲܟܪ (ܬܲܝܡܢܵܐ ܡܲܕܢܚܵܝܵܐ ܕܬܘܼܪܟܝܵܐ ܕܝܲܘܡܵܢܵܐ): ܘܡܼܢ ܩܕܵܡ ܒܲܓ݂ܕܵܕ (1950): ܦܝܼܫܠܹܗ ܡܫܘܼܬܐܸܣܵܐ ܟܘܼܪܣܝܵܐ ܕܥܹܕܬܐ ܟܲܠܕܵܝܬܐ ܓܲܘ ܡܲܘܨܸܠ ܒܫܲܢ݇ܬܐ ܕ1830: ܥܲܡ ܓܘܼܒܵܝܵܐ ܕܝܘܿܚܲܢܵܐ ܗܘܿܪܡܝܼܙܕ ܬܡܝܼܢܵܝܵܐ ܡܝܼܛܪܵܦܘܿܠܹܝܛܵܐ ܕܡܲܘܨܸܠ: ܠܕܲܪܓ݂ܵܐ ܕܦܵܛܪܝܼܵܪܟܘܼܬܐ ܕܥܹܕܬܐ ܟܲܠܕܵܝܬܐ ݂

ܒܫܲܢ݇ܬܐ ܕ1743: ܡܫܘܼܬܸܦܠܗ݇ܘܿܢ ܡܫܝܼܚܵܝܹ̈ܐ ܕܡܲܘܨܸܠ ܒܟܲܫܝܼܪܘܼܬ݂ܐ ܓܲܘ ܣܘܼܬܵܪܵܐ ܕ(42) ܝܲܘܡܵܢܹ̈ܐ ܕܲܚܨܵܪܵܐ ܕܡܲܘܨܸܠ: ܕܲܥܒܸܕܠܹܗ (ܢܵܕܹܪ ܫܵܐܗ ܦܵܪܣܵܝܵܐ): ܗܿܘ ܕܲܓܢܸܒ݂ ܠܹܗ ܘܲܣܠܸܒ ܠܹܗ ܠܫܸܛܚܵܐ ܕܢܝܼܢܘܹܐ ܡܼܢ ܩܕܵܡ ܗܵܢ ܚܨܵܪܵܐ ݂ ܘܦܵܫܵܐ (ܡܕܲܒܪܵܢܵܐ) ܕܡܲܘܨܸܠ (ܚܘܿܣܲܝܢ ܐܲܠ ـ ܓ̰ܲܠܝܼܠܝܼ) ܕܲܙܟܹܐ ܠܹܗ ܓܲܘ ܦܠܵܫܵܐ ܒܥܘܼܕܪܵܢܵܐ ܓܲܠܝܵܐ ܘܦܵܥܘܿܠܵܐ ܕܲܡܫܝܼܚܵܝܹ̈ܐ ܕܡܲܘܨܸܠ:” ܩܢܹܐ ܠܹܗ ܠܚܲܕ ܦܘܼܣܩܵܢܵܐ (ܦܲܪܡܵܐܢ) ܠܗܸܢܝܵܢܵܐ ܕܥܹܕܵܬ̈ܐ ܕܡܲܘܨܸܠ “[10] ݂ ܒܫܲܢ݇ܬܐ ܕ1744: ܦܝܼܫܠܗ݇ܘܿܢ ܒܸܢܝܹ̈ܐ ܬܲܪܬܹܝܢ ܥܹܕܵܬ̈ܐ ܓܲܘ ܡܲܘܨܸܠ: ܚܕܵܐ ܩܵܐ ܥܹܕܬܐ ܟܲܠܕܵܝܬܐ: ܘܐ݇ܚܪܬܐ ܩܵܐ ܥܹܕܬܐ ܐ݇ܣܘܼܪܵܝܬܐ ܐܲܪܬ݂ܘܿܕܘܿܟܣܵܝܬܐ ݂ ܘܡܼܢ ܓܹܒܵܐ ܐ݇ܚܪܢܐ: ܦܝܼܫܠܗ݇ܘܿܢ ܡܚܘܼܕܸܬܹ̈ܐ ܘܡܘܼܥܡܸܖܹ̈ܐ ܥܹܕܵܬ̈ܐ ܕܦܝܼܫܠܗ݇ܘܿܢ ܡܘܼܚܖܸ̈ܒ݂ܐ ܒܡܲܦܩܵܝܵܬ݂ܐ (ܒܘܼܡܒܹ̈ܐ) ݂

ܚܙܹܐ ܠܹܗ ܕܵܪܵܐ ܫܒܲܥܣܝܼܪܵܝܵܐ ܦܘܼܬܵܚܵܐ ܕܫܘܼܕܵܖܹ̈ܐ ܠܵܬܝܼܢܵܝܹ̈ܐ ܓܲܘ ܐܲܬ݂ܪܵܐ ܕܒܹܝܬ݂ ܢܲܗܖ̈ܝܼܢ (ܥܝܼܪܵܐܩ ܕܝܲܘܡܵܢܵܐ) ݂ ܦܬܸܚܠܗ݇ܘܿܢ ܖ̈ܲܒܵܢܹܐ ܟܲܦܘܼܫܵܝܹ̈ܐ ܠܩܸܢܛܪܘܿܢܲܝܗܝ ܩܲܕܡܵܝܵܐ ܓܲܘ ܡܲܘܨܸܠ ܒܫܲܢ݇ܬܐ ܕ1636 ݂ ܘܐܲܒ݂ܵܗܵܬ݂ܐ ܕܘܿܡܢܝܼܟܵܝܹ̈ܐ ܡܛܹܐ ܠܗ݇ܘܿܢ ܡܼܢ ܐܲܬ݂ܪܵܐ ܕܪܗܘܿܡܵܐ ܒܫܲܢ݇ܬܐ ܕ1750: ܘܒܵܬܪܲܝܗܝ ܐܬܹܐ ܠܗ݇ܘܿܢ ܐ݇ܚܖ̈ܢܐ: ܡܼܢ ܐܲܬ݂ܪܵܐ ܕܲܦܪܲܢܣܵܐ ܒܫܲܢ݇ܬܐ ܕ1859 ݂ ܒܚܵܝܘܿܪܘܼܬܲܝܗܝ: ܦܝܼܫܠܵܗ̇ ܒܢܝܼܬܐ ܥܹܕܬܐ ܠܵܬܝܼܢܵܝܬܐ ܪܲܒܬܐ ܒܫܸܡ (ܡܵܪܬܐ ܕܫܵܥܬܐ):” ܥܲܠ ܐܸܣܟܹܝܡܵܐ ܒܝܼܙܲܢܛܵܝܵܐ ܒܹܝܬ ܫܲܢ݇ܬܐ ܕ1866 ܠܫܲܢ݇ܬܐ ܕ1873″ [11] ݂ ܘܲܒܫܲܢ݇ܬܐ ܕ1880: ܝܗܸܒ݂ܠܵܗ̇ ܐܸܡܦܪܵܛܘܿܪܬܐ (ܐܘܿܓ̰ܝܼܢܝܵܐ ܕܝܼ ܡܘܿܢܬܝܼܓ̰ܘܿܬ): ܒܲܪ݇ܬ݂ ܙܲܘܓܵܐ ܕܢܵܦܸܠܝܘܿܢ ܬܠܝܼܬܵܝܵܐ: ܗܿܝ ܫܵܥܬܐ ܡܫܲܡܲܗܬܐ ܐܲܝܟ݂ ܕܵܫܢܵܐ ܠܥܹܕܬܐ: ܘܦܝܼܫܠܵܗ̇ ܡܪܘܼܟܲܒ݂ܬܐ ܒܒܘܼܪܓܵܐ ܩܲܕܡܵܝܵܐ ܕܙܲܓܵܐ ܕܦܝܼܫܠܹܗ ܒܸܢܝܵܐ ܓܲܘ ܐܲܪܥܵܐ ܕܥܝܼܪܵܐܩ ݂ ܘܩܘܼܪܒܵܐ ܠܲܬܠܵܬܐ ܕܵܖܹ̈ܐ: ܗܲܕܵܡܹ̈ܐ ܕܲܡܫܲܕܪܘܼܬ݂ܐ ܕܐܲܒ݂ܵܗܵܬ݂ܐ ܕܘܿܡܢܝܼܟܵܝܹ̈ܐ ܒܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ܘܟܘܼܪܕܸܣܬܵܐܢ ܘܐܲܪܡܝܼܢܝܵܐ: ܝܼܗ݇ܘܵܘ ܡܼܢ ܥܵܒ݂ܘܿܕܹ̈ܐ ܘܦܵܥܘܿܠܹ̈ܐ ܖܹ̈ܫܵܝܹܐ ܘܲܣܦܝܼܖܹ̈ܐ ܘܣܲܗܵܕܹ̈ܐ ܠܬܲܫܥܝܼܬܐ ܕܲܡܫܝܼܚܵܝܘܼܬ݂ܐ ܓܲܘ ܥܝܼܪܵܐܩ: ܘܐܵܦ ܣܲܗܵܕܹ̈ܐ ܠܩܸܢܛܹ̈ܐ ܕܚܵܙܝܼܠܗ݇ܘܿܢ ܡܫܝܼܚܵܝܹ̈ܐ ܓܲܘ ܡܲܕܢܚܵܐ ܩܘܼܪܒܵܐ ݂

ܢܘܼܩܕܵܐ (ܢܘܼܩܙܵܐ) ܕܫܘܼܚܠܵܦܵܐ: ܒܪܹܐ ܠܹܗ ܒܫܸܢܹ̈ܐ ܕ1915 ـ 1918: ܒܥܸܕܵܢ ܐܲܒܝܼܕܘܼܬܐ ܟܢܘܼܫܝܵܝܬܐ ܕܐܵܖܸ̈ܡܢܵܝܹܐ ܘܐܵܬ݂ܘܿܖ̈ܵܝܹܐ ـ ܟܲܠܕܵܝܹ̈ܐ ܒܐܲܬ݂ܪܵܐ ܕܬܘܼܪܟܝܵܐ ܥܘܼܬ݂ܡܵܢܵܝܬܐ[12] ݂ ܚܲܕ ܡܸܢܝܵܢܵܐ ܪܵܒܵܐ ܡܸܢܲܝܗܝ ܕܲܦܪܸܩܠܗ݇ܘܿܢ ܡܼܢ ܡܲܘܬܐ: ܫܟܸܢܘܼܢ ܓܲܘ ܐܲܬ݂ܪܵܐ ܕܥܝܼܪܵܐܩ ܡܬܲܪܨܵܐ ܒܝܲܕ ܐܸܢܓܠܹܝܫܵܝܹ̈ܐ: ܘܝܲܬܝܼܪܵܐܝܼܬ ܓܲܘ ܡܲܘܨܸܠ: ܐܲܝܟܵܐ ܕܐܝܼܬ ܗ݇ܘܵܐ ܟܸܢܫܹ̈ܐ ܡܫܝܼܚܵܝܹ̈ܐ ܡܼܢ ܩܕܝܼܡ ݂ ܒܗܿܘ ܙܲܒ݂ܢܵܐ: ܒܟܵܢܘܿܢ ܬܪܲܝܵܢܵܐ ܕܫܲܢ݇ܬܐ ܕ1916: ܘܓܲܘ ܬܲܪܬܹܝܢ ܠܲܝ̈ܠܵܘܵܬ݂ܐ ܒܲܠܚܘܿܕ: ܦܝܼܫܠܗ݇ܘܿܢ ܩܛܝܼܠܹ̈ܐ (15000) ܐܲܠܦܹ̈ܐ ܐܵܖܸ̈ܡܢܵܝܹܐ ܡܘܼܥܖܸ̈ܩܹܐ ܠܡܲܘܨܸܠ ܘܦܸܢ̈ܝܵܬ݂ܐ ܕܒܲܫܒ݂ܵܒ݂ܘܼܬ݂ܵܗ̇ (ܚܵܕܹܪܘܵܢܵܗ̇): ܘܦܝܼܫܠܗ݇ܘܿܢ ܐܣܝܼܖܹ̈ܐ ܟܠ ܥܸܣܪܵܐ ܦܲܖ̈ܨܘܿܦܹܐ ܡܸܚܕܵܕܹ̈ܐ: ܘܲܡܖ̈ܘܼܦܝܹܐ ܓܲܘ ܢܲܗܪܵܐ ܕܕܸܩܠܵܬ ݂ ܘܲܚܫܝܼܚܬܐ ܝܠܵܗ̇ ܠܡܲܕܟ݂ܘܿܪܹܐ: ܕܲܩܕܵܡ ܗܵܢܵܐ ܓܘܼܢܚܵܐ ܒܝܘܿܡ (10) ܒܝܲܪܚܵܐ ܕܲܚܙܝܼܪܵܢ ܒܫܲܢ݇ܬܐ ܕ1915: ܡܫܘܼܕܸܪܹܗ ܩܲܢܨܠܵܐ (القنصل) ܐܲܠܡܵܢܵܝܵܐ ܓܲܘ ܡܲܘܨܸܠ (ܗܘܿܠܸܫܬܵܝܸܢ) ܠܐܝܼܙܓܲܕܵܐ ܕܐܲܬ݂ܪܹܗ ܒܲܪܩܝܼܬܐ ܕܒܐܝܼܬܵܝܵܐ ܝܠܵܗ̇:” 614 ܐܵܖܸ̈ܡܢܵܝܹܐ (ܓܲܒ݂ܖܹ̈ܐ ܘܢܸܫܹ̈ܐ ܘܫܲܒ݂ܖܹ̈ܐ) ܕܦܝܼܫܠܗ݇ܘܿܢ ܛܖ̈ܝܼܕܹܐ ܡܼܢ ܕܝܼܵܪܒܲܟܪ: ܘܡܘܼܥܖܸ̈ܩܹܐ ܒܚܲܝܠܵܐ ܠܡܲܘܨܸܠ: ܦܝܼܫܠܗ݇ܘܿܢ ܩܛܝܼܠܹ̈ܐ ܒܐܘܼܪܚܵܐ: ܟܲܕ ܦܝܵܫܵܐ ܝܗ݇ܘܵܘ ܢܩܝܼܠܹ̈ܐ ܒܛܵܝܘܿܦܹ̈ܐ (طوافات) ܓܲܘ ܢܲܗܪܵܐ ܕܕܸܩܠܵܬ ݂ ܒܐܸܬܡܵܠܝ: ܛܵܝܘܿܦܹ̈ܐ ܡܛܹܐ ܠܗ݇ܘܿܢ ܣܦܝܼܩܹ̈ܐ: ܘܡܼܢ ܩܕܵܡ ܝܲܘܡܵܢܹ̈ܐ: ܛܥܝܼܢܵܐ ܝܗ݇ܘܵܐ ܢܲܗܪܵܐ ܕܕܸܩܠܵܬ: ܫܠܲܕܹ̈ܐ ܘܲܕܖ̈ܵܥܹܐ ܐ݇ܢܵܫܵܝܹ̈ܐ”[13] ݂

ܢܦܵܠܬܐ ܕܛܲܟ݂ܣܵܐ ܕܨܲܕܵܐܡ ܚܘܿܣܲܝܢ ܒܫܲܢ݇ܬܐ ܕ2003: ܘܢܘܼܦܵܩܵܐ (ظهور) ܕܡܝܼ̈ܠܝܼܫܝܵܬ݂ܐ ܐܸܣܠܵܡܵܝܹ̈ܐ: ܐܝܼܬ ܗ݇ܘܵܐ ܠܗ݇ܘܿܢ ܡܲܥܒ̇ܕܵܢܘܼܬ݂ܐ ܪܲܒܬܐ ܥܲܠ ܫܘܼܚܠܵܦܵܐ ܕܝܼܡܘܿܓ݂ܪܵܦܵܝܵܐ ܓܲܘ ܡܵܬ݂ܘܵܬ݂ܐ ܕܲܡܫܝܼܚܵܝܹ̈ܐ ܒܥܝܼܪܵܐܩ: ܘܲܦܪܝܼܫܵܐܝܼܬ ܓܲܘ ܡܲܘܨܸܠ ݂ ܒܝܲܘܡܵܐ ܩܲܕܡܵܝܵܐ ܡܼܢ ܝܲܪܚܵܐ ܕܐܵܒ 2004: ܨܦܵܚ̈ܝܵܬ݂ܐ ܡܛܲܟܣܹ̈ܐ ܥܲܠ ܚܲܡܸܫ ܥܹܕܵܬ̈ܐ ܕܓܲܘ ܡܲܘܨܸܠ ܘܒܲܓ݂ܕܵܕ: ܝܼܗ݇ܘܵܘ ܫܘܼܪܵܝܵܐ ܕܲܥܪܵܩܬܐ ܕܲܡܫܝܼܚܵܝܹ̈ܐ: ܡܼܢ ܡܲܘܨܸܠ ܠܦܸܢ̈ܝܵܬ݂ܐ ܒܸܫ ܫܲܝܢܵܝܹ̈ܐ ܓܲܘ ܫܸܛܚܵܐ ܕܢܝܼܢܘܹܐ: ܘܟܘܼܪܕܸܣܬܵܐܢ ܕܥܝܼܪܵܐܩ: ܘܐܵܦ ܠܒܲܪ ܐܲܬ݂ܪܵܐ ݂ ܘܫܸܢܹ̈ܐ ܕܐܬܹܐ ܠܗ݇ܘܿܢ ܒܵܬܲܪ ܐܲܢܲܝ ܖ̈ܕܘܼܦܝܹܐ ܘܲܛܠܘܼܡܝܹ̈ܐ: ܝܼܗ݇ܘܵܘ ܪܵܒܵܐ ܥܲܣܩܹ̈ܐ ܓܲܘ ܡܲܘܨܸܠ: ܩܸܛܠܹ̈ܐ ܘܲܚܛܵܦܝܵܬ݂ܐ ܕܲܡܫܝܼܚܵܝܹ̈ܐ ܡܲܥܒ݂ܘܿܕܹܐ ܝܠܲܝܗܝ ܘܲܡܗܲܕܘܿܝܹܐ ܠܲܥܪܵܩܬܐ ܟܢܘܼܫܝܵܝܬܐ ݂ ܒܝܘܿܡ 6 ܒܟܵܢܘܿܢ ܬܪܲܝܵܢܵܐ ܫܲܢ݇ܬܐ ܕ2008: ܒܝܲܘܡܵܐ ܕܥܹܐܕܵܐ ܕܕܸܢܚܵܐ: ܚܲܪܬܐ 9 ܒܟܵܢܘܿܢ ܬܪܲܝܵܢܵܐ: ܗܘܹܐ ܠܗ݇ܘܿܢ ܢܝܼܫܹ̈ܐ ܕܥܲܡܠܹ̈ܐ ܐܲܘ ܣܘܼܥܖ̈ܵܢܹܐ ܕ(ܕܵܥܹܫ) ܓܘܼܢܚܵܝܹ̈ܐ ܘܲܕܖ̈ܵܡܵܝܹܐ: ܡܲܚܪܲܒ݂ܬܐ ܕܪܵܒܵܐ ܒܸܢܝܵܢܹ̈ܐ ܕܲܡܫܝܼܚܵܝܹ̈ܐ ܓܲܘ ܡܲܘܨܸܠ ܘܟܲܪܟܘܼܟ ݂

ܒܗܵܢܵܐ ܡܘܼܙܵܓ݂ܵܐ ܡܲܙܕܥܵܢܵܐ: ܦܝܼܫܠܹܗ ܚܛܝܼܦܵܐ ܡܲܛܪܵܢ ܦܲܘܠܘܿܣ ܦܲܪܲܓ̰ ܪܲܗܘܿ: ܐܲܦܸܣܩܘܿܦܵܐ ܕܥܹܕܬܐ ܟܲܠܕܵܝܬܐ ܒܡܲܘܨܸܠ: ܒܝܘܿܡ 13 ܫܒ݂ܵܛ 2008: ܟܲܕ ܡܩܲܒܘܿܠܹܐ ܠܲܚܕܵܐ ܡܫܲܕܪܘܼܬ݂ܐ ܡܼܢ (ܦܵܟܸܣ ܟܪܝܼܣܬܝܼ) ܓܲܘ ܥܹܕܬܐ ܕܟܲܪܲܡܠܸܫ ܒܩܘܼܪܒܵܐ ܕܡܲܘܨܸܠ ̣ ܘܲܓܠܹܐ ܠܹܗ ܐܲܦܸܣܩܘܿܦܵܐ ܠܲܓܙܵܡܵܐ (تهديد) ܕܲܡܩܘܼܒܸܠ ܠܹܗ ܡܼܢ ܚܕܵܐ ܟܢܘܼܫܬܐ ܪܗܝܼܒ݂ܵܝܬܐ ܡܼܢ ܩܕܵܡ ܚܲܕܟܡܵܐ ܝܲܘܡܹ̈ܐ: ܐܡܸܪܘܼܢ ܐܸܠܹܗ: ” ܚܲܝܘܼܬܘܼܟ݂ ܐܲܘ ܚܲܡܫܵܐ ܡܵܐܐ ܐܲܠܦܹ̈ܐ ܕܘܿܠܵܖܹ̈ܐ: ܡܦܘܼܢܹܐ ܠܹܗ (ܡܓ̰ܘܼܘܸܒܠܹܗ): ܚܲܝܘܼܬܝܼ ܠܵܐ ܫܵܘܝܵܐ (ܕܵܩܪܵܐ) ܗܵܢܵܐ ܛܝܼܡܵܐ ݂ ܘܒܵܬܲܪ ܚܲܕ ܝܲܪܚܵܐ: ܒܝܲܘܡܵܐ ܕ(13) ܒܐܵܕܵܪ: ܦܝܼܫܠܹܗ ܚܸܙܝܵܐ ܡܲܛܪܵܢ (ܪܲܗܘܿ) ܩܛܝܼܠܵܐ ܩܘܼܪܒܵܐ ܠܡܲܥܠܵܢܵܐ ܕܲܡܕܝܼܢ݇ܬܐ “[14] ݂

ܒܹܝܬ ܚܙܝܼܪܵܢ 2014 ܠܬܲܡܘܼܙ 2017: ܢܦܸܠܠܵܗ̇ ܡܲܘܨܸܠ ܒܐܝܼܕܹ̈ܐ ܕܲܖ̈ܗܝܼܒ݂ܵܝܹܐ ܐܸܣܠܵܡܵܝܹ̈ܐ ܕ(ܕܵܥܹܫ) ݂ ܘܲܚܙܹܐ ܠܗ݇ܘܿܢ ܡܫܝܼܚܵܝܹ̈ܐ ܕܡܸܢܝܵܢܲܝܗܝ ܩܘܼܪܒܵܐ ܝܗ݇ܘܵܐ ܠـ (10000) ܐܲܠܦܹ̈ܐ ܢܸܫܡܹ̈ܐ ܕܗܵܠܵܐ ܒܸܚܝܵܝܵܐ ܝܗ݇ܘܵܘ ܓܲܘ ܡܕܝܼܢܬܐ ܕܡܲܘܨܸܠ: ܕܒܵܬܘܵܬܲܝܗܝ ܛܒ݂ܝܼܥܹ̈ܐ ܝܠܲܝܗܝ ܒܝܲܕܥܵܐ ܐܲܘ ܚܫܲܚܬܐ (ܚܲܒ̇ܪܵܐ) ܕܢܲܨܪܵܢܝܼ (ܐܲܠ ـ ܢܵܨܹܝܪܝܼ: ܬܲܠܡܝܼܕܹ̈ܐ ܕܲܡܫܝܼܚܵܐ) ݂ ܘܗܵܕܟ݂ܵܐ ܦܝܼܫܠܗ݇ܘܿܢ ܐܡܝܼܖܹ̈ܐ: ܘܦܝܼܫܠܗ݇ܘܿܢ ܩܸܖ̈ܝܹܐ ܕܫܲܚܠܦܝܼ ܗܲܝܡܵܢܘܼܬܲܝܗܝ ܡܫܝܼܚܵܝܬܐ ܠܡܲܫܠܡܵܢܘܼܬ݂ܐ: ܐܲܘ ܦܪܵܥܬܐ ܕܡܲܕܲܐܬܐ (ܓ̰ܸܙܝܵܐ): ܐܲܘ ܡܲܘܬܐ ݂ ܥܪܸܩܠܗ݇ܘܿܢ ܡܫܝܼܚܵܝܹ̈ܐ ܕܲܡܕܝܼܢ݇ܬܐ ܒܣܘܼܪܗܵܒ݂ܵܐ: ܘܦܝܼܫܠܗ݇ܘܿܢ ܡܐܲܠܨܹ̈ܐ ܕܫܵܒ݂ܩܝܼ ܠܣܘܿܓ݂ܐܵܐ ܕܝܵܪܬܘܼܬܲܝܗܝ ܡܫܝܼܚܵܝܬܐ: ܕܐܬܹܐ ܠܵܗ̇ ܠܲܓܢܵܒ݂ܵܐ ܘܠܲܚܪܵܒ݂ܵܐ ܘܠܲܡܫܲܚܬܘܿܢܹܐ ܒܚܲܕ ܕܲܪܓ݂ܵܐ ܟܲܒܝܼܪܵܐ ݂ ܩܪܵܒ݂ܵܐ (ܦܠܵܫܵܐ) ܕܡܲܘܨܸܠ: ܘܡܲܦ̈ܩܵܥܝܵܬ݂ܐ ܕܐܲܘܝܘܼܬܐ ܬܹܒܹܝܠܵܝܬܐ ܕܲܟܣܸܚܠܵܗ̇ ܠܲܖ̈ܗܝܼܒ݂ܵܝܹܐ ܕ(ܕܵܥܹܫ) ܒܚܲܝܠܵܐ ܕܢܘܼܪܵܐ: ܫܒܸܩܠܗ݇ܘܿܢ ܒܸܢܝܵܢܹ̈ܐ ܖ̈ܲܒܹܐ ܕܲܡܫܝܼܚܵܝܹ̈ܐ ܘܐܵܦ ܕܡܲܫܠܡܵܢܹ̈ܐ ܓܲܘ ܡܲܘܨܸܠ: ܕܚܵܕܪܝܼ ܠܥܲܦܪܵܐ ݂

__________

[1] ܗܵܢ ܦܵܣܘܿܩܵܐ ܒܣܘܿܓ݂ܐܹܗ ܬܟܝܼܠܵܐ ܝܠܹܗ ܥܲܠ ܥܲܡܠܵܐ ܕ(ܓ̰ܵܐܢ ܡܵܐܪܝܼ ܡܝܼܪܝܼܓ̰ܘܿ): ܗܿܘ ܕܲܚܝܹܐ ܠܹܗ ܓܲܘ ܥܝܼܪܵܐܩ (14) ܫܸܢܹ̈ܐ: ܡܼܢ 1968 ـ 1983 ܐܲܝܟ݂ ܚܲܕ ܗܲܕܵܡܵܐ ܓܲܘ ܡܫܲܕܪܘܼܬ݂ܐ ܕܐܲܒ݂ܵܗܵܬ݂ܐ ܕܘܿܡܢܝܼܟܵܝܹ̈ܐ ܠܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ܘܟܘܼܪܕܸܣܬܵܐܢ ܘܐܲܪܡܝܼܢܝܵܐ: ܘܩܸܢܛܪܘܿܢܵܗ̇ ܝܼܗ݇ܘܵܐ ܒܡܲܘܨܸܠ ݂ ܘܐܵܦ ܚܙܝܼ: ܬܪܹܝܢ ܟܬܵܒܹ̈ܐ ܡܼܢ ܥܲܡܠܹ̈ܗ: (ܙܸܠ (ܣܝܼ) ܠܢܝܼܢܘܹܐ/ ܣܘܼܘܵܕܵܐ ܥܲܡ ܥܝܼܪܵܐܩ): ܐܲܨܲܚܬܐ ܕܣܹܝܪܦ: ܬܸܫܪܝܼܢ ܩܲܕܡܵܝܵܐ 2000 ݂ ܚܙܝܼ: ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015 ݂

[2] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 88 ݂

[3] ܚܙܝܼ: ܐܵܫܘܿܪ ܡܫܝܼܚܵܝܬܐ: ܡܢܵܬ݂ܐ 2: ܓ̰ܵܐܢ ܡܘܿܪܝܼܣ ܦܝܼܝܹܗ: ܒܲܝܪܘܼܬ 1965: ܦ 115 ـ 116 ݂ ܚܙܝܼ ܐܵܦ (ܡܲܘܨܸܠ ܡܫܝܼܚܵܝܬܐ): ܓ̰ܵܐܢ ܡܘܿܪܝܼܣ ܦܝܼܝܹܗ ݂

[4] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 89 ݂

[5] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 92 ـ 93 ݂

[6] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 94 ݂

[7] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 95 ݂

[8] ܚܙܝܼ : ܚܲܝܹ̈ܐ ܘܡܲܘܬܐ ܡܫܝܼܚܵܝܹ̈ܐ ܕܡܲܕܢܚܵܐ: ܓ̰ܵܐܢ ܦܝܹܝܪ ܦܵܠܘܿܢ: ܦܵܝܵܐܪܕ 1994: ܦ 740 ݂

[9] ܡܼܢ (ܬܲܫܥܝܼܬܐ ܕܥܹܕܬܐ ܕܡܲܕܢܚܵܐ): ܪܝܼܡܘܹܢܕ ܠܘܿܟܘܿܙ: ܐܝܼܠܘܿܠ 1995: ܦ 328 ݂

[10] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 97 ݂

[11] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 102 ݂

[12] ܓܘܼܢܚܹ̈ܐ ܕܲܩܛܵܠ ـ ܥܲܡܵܐ: ܦܲܖ̈ܡܵܢܹܐ ܕܣܲܝܦܘܿ ݂ ܦܲܖ̈ܡܵܢܹܐ (ܦܘܼܣܩܵܢܹ̈ܐ ܖ̈ܘܼܫܡܵܝܹܐ ܕܵܢܦܸܩܠܲܝܗܝ ܡܼܢ ܫܘܼܠܛܵܢܵܐ ܥܘܼܬ݂ܡܵܢܵܝܵܐ) ݂ (ܡܬܲܪܓܡܵܢܵܐ)

[13] ܚܙܝܼ: (ܐܲܒܝܼܕܘܼܬ݂ܐ ܕܥܵܖ̈ܘܿܩܹܐ ܐܵܖܸ̈ܡܢܵܝܹܐ ܥܘܼܬ݂ܡܵܢܵܝܹ̈ܐ ܓܲܘ ܡܲܫܖ̈ܵܝܵܬ݂ܐ ܕܐܲܣܝܼܖܹ̈ܐ ܓܲܘ ܣܘܼܪܝܵܐ ܘܒܹܝܬ ܢܲܗܖ̈ܝܼܢ): ܡܸܢܝܵܢܵܐ ܕܝܼܠܵܢܵܝܵܐ ܡܼܢ ܡܓ݂ܠܬܐ ܕ(ܬܲܫܥܝܼܬܐ ܕܵܪܵܝܬܐ ܕܐܵܪܸܡܝܼܢܝܵܐ): ܡܢܵܬ݂ܐ 2: 1998: ܪܝܼܡܘܿܢܕ ܐܹܝܟ̰ ܟܝܼܦܘܪܟܝܵܐܢ: ܦ 15 ݂

[14] ܚܙܝܼ: ܡܫܝܼܚܵܝܹ̈ܐ ܕܡܲܕܢܚܵܐ: ܛܸܠܵܠܹ̈ܐ ܘܒܲܗܖܹ̈ܐ: ܦܵܣܟܵܠ ܡܵܓ݂ܝܼܣܝܵܐܢ: ܛܲܒ݂ܥܵܐ ܕܬ݂ܵܕܹܐ: ܐܝܼܠܘܿܠ 2013: ܘܛܲܒ݂ܥܵܐ 2: ܟܵܢܘܿܢ ܬܪܲܝܵܢܵܐ 2014: ܦ 260 ݂

 ܦܝܼܫܠܵܗ̇ ܕܟ݂ܝܼܪܬܐ ܥܹܕܬܐ ܕܩܲܕܝܼܫܬܐ ܡܸܣܟܹܢܬܐ ܓܲܘ ܚܲܕ ܟܬܵܒ݂ܵܐ ܕܦܝܼܫܠܹܗ ܣܝܼܡܵܐ ܒܫܲܢ݇ܬܐ ܕ1199 ܐܲܘ 1212: ܢܛܝܼܪܵܐ ܝܠܹܗ ܓܲܘ ܦܵܛܪܝܼܵܪܟܘܼܬܐ ܟܲܠܕܵܝܬܐ ݂ ܘܐܵܦ ܦܝܼܫܠܵܗ̇ ܕܟ݂ܝܼܪܬܐ ܓܲܘ ܚܲܕܟܡܵܐ ܣܖ̈ܝܼܛܵܬܐ ܢܲܩܝܼܦܹ̈ܐ ܠܦܵܛܪܝܼܵܪܟܘܼܬܐ ܟܲܠܕܵܝܬܐ ܠܫܸܢܹ̈ܐ 1667 ܘ 1681 ܘ 1708 ܘ 1766 ܘ 1827 ݂

ܥܹܕܬܐ ܕܡܸܣܟܹܢܬܐ ܚܕܵܐ ܥܹܕܬܐ ܙܥܘܿܪܬܐ ܝܗ݇ܘܵܐ ܠܗܲܠ ܦܲܠܓܵܐ ܕܕܵܪܵܐ ܕ(19) ݂ ܒܫܲܢ݇ܬܐ ܕ1851 ܘܲܡܚܲܫܚܲܬܐ ܕܦܵܛܪܝܼܵܪܟܵܐ ܟܲܠܕܵܝܵܐ ܝܲܘܣܸܦ ܐܘܿܕܘ: ܦܝܼܫܠܵܗ̇ ܡܚܘܼܕܲܬ݂ܬܐ ܓܡܝܼܪܵܐܝܼܬ ݂ ܒܵܬܲܪ ܫܘܼܢܵܝܵܐ ܕܦܵܛܪܝܼܵܪܟܘܼܬܐ ܟܲܠܕܵܝܬܐ ܡܼܢ ܕܝܼܵܪܒܲܟܪ (ܬܘܼܪܟܝܼܵܐ) ܠܡܲܘܨܸܠ ܒܫܲܢ݇ܬܐ ܕ1830: ܥܹܕܬܐ ܩܲܕܡܵܝܬܐ ܕܦܵܛܪܝܼܵܪܟܘܼܬܐ ܝܼܗ݇ܘܵܐ ܫܸܡܥܘܿܢ ܐܲܠ ـ ܨܲܦܵܐܐ ܘܚܲܪܬܐ ܥܹܕܬܐ ܕܡܸܣܟܹܢܬܐ ݂ ܪܵܒܵܐ ܐܵܢܲܢܩܵܝܬܐ ܝܗ݇ܘܵܐ ܡܚܲܕܲܬ݂ܬܵܗ̇: ܗܵܕܟ݂ܵܐ ܩܝܼܡܠܹܗ ܦܵܛܪܝܼܵܪܟܵܐ ܐܘܿܕܘܿ ܒܲܒܢܵܝܬܐ ܕܡܸܣܟܹܢܬܐ ܚܕܲܬܐ: ܕܠܵܐ ܬܠܵܚܵܐ ܠܗܵܝ ܥܲܬܝܼܩܬܐ ܕܦܝܼܫܠܵܗ̇ ܐܣܝܼܪܬܐ ܐܸܒܵܗ̇ ݂ ܒܫܘܼܪܵܝܵܐ ܕܕܵܪܵܐ ܕܥܸܣܪܝܼܢ: ܘܒܲܝܢܲܝ ܫܸܢܹ̈ܐ 1904 ܘ 1907: ܩܝܼܡܠܹܗ ܦܵܛܪܝܼܵܪܟܵܐ ܕܟܲܠܕܵܝܹ̈ܐ ܥܲܡܵܢܘܼܐܹܝܠ ܬܐܘܿܡܵܐ ܬܪܲܝܵܢܵܐ ܒܡܲܪܘܲܚܬܐ ܕܒܸܢܝܵܢܵܐ ݂

ܒܫܲܢ݇ܬܐ ܕ1950 ܘܒܵܬܲܪ ܫܘܼܢܵܝܵܐ ܕܦܵܛܪܝܼܵܪܟܘܼܬܐ ܟܲܠܕܵܝܬܐ ܡܼܢ ܡܲܘܨܸܠ ܠܒܲܓ݂ܕܵܕ: ܦܝܼܫܠܵܗ̇ ܥܹܕܬܐ ܕܡܸܣܟܹܢܬܐ ܩܸܢܛܪܘܿܢ ܕܦܵܛܪܝܼܵܪܟܘܼܬܐ ܟܲܠܕܵܝܬܐ ܓܲܘ ܡܕܝܼܢ݇ܬܐ ܡܼܢ ܩܕܵܡ ܕܲܡܫܲܪܹܐ ܡܲܛܪܵܢ ܓܝܼܘܲܪܓܝܼܣ ܓܲܪܡܘܿ: ܪܹܫ ܐܲܦܸܣܩܘܿܦܹ̈ܐ ܕܡܲܘܨܸܠ ܠܟܲܠܕܵܝܹ̈ܐ (1980 ـ 1999) ܒܫܘܼܢܵܝܵܗ̇ ܠܥܹܕܬܐ ܕ(ܐܲܠܛܵܗܝܼܪܵܐ) ݂

ܒܫܲܢ݇ܬܐ ܕ2000 ܣܥܸܪܵܗ̇ (ܢܲܪܡܝܼܢ ܥܲܠܝܼ ܐܲܡܝܼܢ) ܥܹܕܬܐ ܕܡܸܣܟܹܢܬܐ: ܘܥܲܡ ܚܒ݂ܵܠ: ܫܓ݂ܘܼܫܝܵܐ ܦܘܿܠܝܼܛܝܼܩܵܝܵܐ ܕܒܵܬܲܪ ܫܲܢ݇ܬܐ ܕ2003: ܦܬܸܚܠܹܗ ܚܲܕ ܙܲܒ݂ܢܵܐ ܡܼܢ ܪܕܘܼܦܝܵܐ ܕܲܠܩܘܼܒ݂ܠ ܡܫܝܼܚܵܝܹ̈ܐ ܕܓܲܘ ܡܲܘܨܸܠ: ܕܲܡܗܘܼܕܹܐ ܠܹܗ ܠܓܵܠܘܼܬܐ ܘܲܥܪܵܩܬܐ ܟܢܘܼܫܝܵܝܬܐ ܕܥܵܡܘܿܖܹ̈ܐ ܕܦܝܼܫܠܗ݇ܘܿܢ ܢܝܼܫܵܐ ܕܖ̈ܵܕܘܿܦܹܐ ܘܩܵܛܘܿܠܹ̈ܐ: ܡܼܢ ܩܕܵܡ ܦܠܵܫܵܐ ܕܲܠܩܘܼܒ݂ܠ (ܕܵܥܹܫ) ܒܲܝܢܲܝ ܫܸܢܹ̈ܐ ܕ2014 ܠܫܲܢ݇ܬܐ ܕ2017: ܕܐܝܼܬ ܗ݇ܘܵܐ ܠܹܗ ܡܲܥܒܕܵܢܘܼܬܐ ܓܵܠܘܿܙܬܐ ܥܲܠ ܝܵܪܬܘܼܬܐ ݂ ܘܐܵܦ ܥܹܕܬܐ ܕܡܸܣܟܹܢܬܐ ܠܵܐ ܦܠܸܛܠܵܗ̇ ܒܲܫܠܵܡܵܐ ܡܼܢ ܗܵܢ ܡܣܵܡ ـ ܒܪܹܫܵܐ (عقوبة): ܓܵܠܘܼܬܐ ܘܲܥܪܘܿܩܝܵܐ ܘܲܚܪܵܒ݂ܵܐ ݂

ܡܫܲܡܗܘܼܬ݂ ܥܹܕܬܐ ܟܲܠܕܵܝܬܐ ܕܩܲܕܝܼܫܬܐ ܡܸܣܟܹܢܬܐ ܓܲܘ ܡܲܘܨܸܠ:

ܥܹܕܬܐ ܕܡܸܣܟܹܢܬܐ ܡܼܢ ܩܕܵܡ ܫܲܢ݇ܬܐ ܕ1851: ܝܼܗ݇ܘܵܐ ܚܲܕ ܒܸܢܝܵܢܵܐ ܙܥܘܿܪܵܐ ܚܕܵܢܲܝ̈ ܗܲܝܟܠܵܐ ܡܵܛܹܐ ܗ݇ܘܵܐ ܝܘܼܪܟ݂ܹܗ ܠ (10) ܡܝܼܬܖܹ̈ܐ X  (3) ܡܝܼܬܖܹ̈ܐ: ܥܲܡ ܚܲܕ ܡܲܥܠܵܢܵܐ ܠܡܲܥܪܒ݂ܵܐ ܕܣܲܪܢܵܐ ܕܗܲܝܟܠܵܐ: ܘܓܲܘ ܚܘܼܬܵܡܹܗ ܐܝܼܬ ܡܲܕܒܚܵܐ: ܘܥܲܠ ܝܲܡܝܼܢܹܗ ܓܘܿܪܢܵܐ ܕܡܲܥܡܘܿܕܝܼܬܐ ݂ ܘܐܵܦ ܚܵܒ݂ܫܵܐ ܥܹܕܬܐ ܩܲܒ݂ܖ̈ܵܘܵܬܐ ܕܚܲܕܟܡܵܐ ܐܲܦܸܣܩܘܿܦܹ̈ܐ ݂

ܡܵܛܹܐ ܝܘܼܪܟ݂ܵܐ ܕܥܹܕܬܐ ܚܕܲܬܐ ܘܪܲܒܬܐ ܕܩܲܕܝܼܫܬܐ ܡܸܣܟܹܢܬܐ ܠ(36) ܡܝܼܬܖܹ̈ܐ ܘܦܸܬ݂ܘܵܗ̇ ܠ(18) ܡܝܼܬܖܹ̈ܐ ݂ ܘܗܵܝ ܒܢܝܼܬܐ ܝܠܵܗ̇ ܒܚܲܕ ܙܢܵܐ ܣܲܪܢܵܝܵܐ ܡܫܲܚܠܦܵܐ: ܡܼܢ ܓܲܪܒܝܵܐ ܡܲܥܪܒ݂ܵܝܵܐ ܠܬܲܝܡܢܵܐ ܡܲܕܢܚܵܝܵܐ ܐܲܝܟܵܐ ܕܝܼܠܹܗ ܡܲܕܒܚܵܐ ݂ ܥܹܕܬܐ ܛܡܝܼܪܬܐ ܝܠܵܗ̇ ܒܥܘܼܡܩܵܐ ܓܲܘ ܐܲܪܥܵܐ ݂ ܐܝܼܬ ܬܪܹܝܢ ܬܲܖ̈ܥܵܢܹܐ: ܚܲܕ ܩܵܐ ܓܲܒ݂ܖܹ̈ܐ ܘܚܲܕ ܩܵܐ ܢܸܫܹ̈ܐ: ܕܝܼܠܲܝܗܝ ܓܲܘ ܕܵܪܬܐ ܓܲܪܒܝܵܝܬܐ ܡܲܕܢܚܵܝܬܐ: ܟܹܐ ܡܗܲܕܝܼ ܠܲܥܒ݂ܵܪܵܐ ܠܥܹܕܬܐ ܡܼܢ ܓܹܒܵܐ ܕܡܲܥܒܪܵܐ ܣܸܡܵܠܵܝܵܐ ݂ ܦܵܐܹܫ ܚܫܝܼܒ݂ܵܐ ܙܢܵܐ ܕܒܸܢܝܵܢܵܐ ܚܲܕ ܛܘܼܦ̮ܣܵܐ ܠܡܲܚܵܪܘܼܬܐ ܐܲܪܕܸܟ݂ܠܵܝܬܐ ܐܵܬܘܿܪܵܝܬܐ ܟܲܠܕܵܝܬܐ ܕܕܵܪܵܐ ܕ(19) ݂  ܐܝܼܬ ܗܲܝܟܠܵܐ ܐܸܣܵܝܵܐ: ܥܲܡ ܗܲܝܟܠܵܐ ܡܬܲܠܬܵܐ ܘܚܲܡܫܵܐ ܡܢܵܘܵܬܐ ݂ ܩܘܼܒܬܐ ܕܥܹܕܬܐ ܣܢܝܼܕܬܐ ܝܠܵܗ̇ ܒ (4) ܙܲܘܓܹ̈ܐ ܕܥܲܡܘܼܕܹ̈ܐ ܡܖ̈ܲܒܥܹܐ ܚܠܝܼܡܹ̈ܐ ݂ ܩܘܼܕܵܫ ܩܘܼܕܫܹܐ ܟܪܝܼܟ݂ܵܐ ܝܠܹܗ ܚܕܵܐ ܩܘܼܒܬܐ ܦܲܠܓܘܿ ܚܘܼܕܪܵܢܵܝܬܐ ݂ ܐܝܼܬ ܚܲܕ ܒܹܐܡܵܐ ܕܥܵܠܹܐ ܒܲܚܕܵܐ ܣܩܘܿܦܬܐ: ܘܢܵܦܠܵܐ ܡܢܵܬܐ ܩܲܕܡܵܝܬܐ ܡܼܢ ܗܲܝܟܠܵܐ ܩܸܢܛܪܘܿܢܵܝܵܐ ܚܲܕ ܪܹܫܵܐ ܩܕܵܡܵܐ ܕܬܲܪܥܵܐ ܡܲܠܟܵܝܵܐ ݂

ܐܝܼܬ ܪܵܒܵܐ ܡܲܕܒܚܹ̈ܐ ܓܲܘ ܩܘܼܕܵܫ ܩܘܼܕܫܹܐ: ܘܡܲܘܣܸܦܲܚ (ܡܲܙܝܸܕܲܚ) ܬܪܹܝܢ ܐ݇ܚܖ̈ܵܢܹܐ ܕܐܝܼܬ ܒܲܠܩܘܼܒ݂ܠ ܡܲܥܒܪܵܐ ܝܲܡܝܼܢܵܝܵܐ ݂

ܦܝܼܫܠܗ݇ܘܿܢ ܡܛܘܼܡܖܹ̈ܐ ܬܪܹܝܢ ܦܵܛܪܝܼܵܖ̈ܟܹܐ ܟܲܠܕܵܝܹ̈ܐ ܓܲܘ ܥܹܕܬܐ ܕܡܸܣܟܹܢܬܐ: ܐܹܠܝܼܵܐ ܥܲܝܘܿ ܐܲܠܝܲܘܢܵܢ ܕ(12) ܕܢܝܼܚܠܹܗ ܒܫܲܢ݇ܬܐ ܕ1894: ܘܥܲܡܵܢܘܼܐܹܝܠ ܬܐܘܿܡܵܐ ܬܪܲܝܵܢܵܐ ܕܢܝܼܚܠܹܗ ܒܫܲܢ݇ܬܐ ܕ1947 ݂

ܐܵܦ ܐܝܼܬ ܚܲܕ ܐܸܣܛܘܼܟ݂ܣܵܐ ܨܘܼܒܵܬܵܝܵܐ ܚܕܵܢܲܝ ܐܵܕܫܹܗ[1]: ܘܝܼܠܹܗ ܒܲܕܡܘܼܬ݂ ܠܘܼܚܹ̈ܐ ܟܬܝܼܒܹ̈ܐ ܒܠܸܫܵܢܵܐ ܥܲܪܒ݂ܵܝܵܐ ܓܠܝܼܦܹ̈ܐ ܘܲܖ̈ܫܝܼܡܹܐ ܘܲܣܕܝܼܖܹ̈ܐ ܚܲܕ ܒܵܬܲܪ ܗܿܘ ܐ݇ܚܪܹܢܐ ܥܲܠ ܝܘܼܪܟ݂ܘܼܬܐ ܕܡܲܥܒܪܵܐ ܕܲܢܦܝܼܠܵܐ ܝܠܹܗ ܬܚܘܿܬܐ ܩܸܫܬܵܬ݂ܐ (ܩܸܛܖܹ̈ܐ) ܕܗܲܝܟܠܵܐ ݂

__________

[1] ܕܵܡܹܐ ܠܬܘܼܩܵܢܵܐ ܕܐܸܣܛܘܼܟ݂ܣܵܐ ܕܐܝܼܬ ܓܲܘ ܥܹܕܬܐ ܕܡܵܪܝ ܬܐܘܿܡܵܐ ܕܐ݇ܣܘܼܖ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܡܲܘܨܸܠ: ܗܵܝ ܥܹܕܬܐ ܕܦܝܼܫܠܹܗ̇ ܒܢܝܼܬܐ ܒܵܬܲܪ ܫܸܢܹ̈ܐ ܡܼܢ ܒܢܵܝܬܐ ܕܡܸܣܟܹܢܬܐ ܚܕܲܬܐ ݂