ܟܵܬܸܕܪܵܐܝܼܵܐ ܕܠܸܒܵܐ ܕܝܼܫܘܿܥ ܕܡܲܪܥܝܼܬܐ ܕܟܲܪܟܘܼܟ
ܢܵܦܠܵܐ ܟܵܬܸܕܪܵܐܝܼܵܐ ܕܠܸܒܵܐ ܕܝܼܫܘܿܥ ܕܡܲܪܥܝܼܬܐ ܕܟܲܪܟܘܼܟ ܥܲܠ ܣܸܪܛܵܐ ܕ 69 39 27 ݂ 35 ܓܲܪܒܝܵܐܝܼܬ: ܘܥܲܠ ܣܸܪܛܵܐ ܕ 47 46 22 ݂ 44 ܡܲܕܢܚܵܐܝܼܬ: ܘܥܲܠ ܪܵܡܘܼܬܐ ܕ(339) ܡܝܼܬܖܹ̈ܐ ܡܼܢ ܫܲܘܝܘܼܬ݂ ܫܸܛܚܵܐ ܕܝܲܡܵܐ ݂
ܡܫܘܼܪܹܐ ܠܹܗ ܦܘܼܠܚܵܢܵܐ ܓܲܘ ܒܢܵܝܬܐ ܕܟܵܬܸܕܪܵܐܝܼܵܐ ܕܠܸܒܵܐ ܕܝܼܫܘܿܥ ܕܡܲܪܥܝܼܬܐ ܕܟܲܪܟܘܼܟ ܒܝܲܘܡܵܐ ܕܚܲܕ ܒܲܚܙܝܼܪܵܢ ܫܲܢ݇ܬܐ ܕ1997: ܘܲܦܪܸܩܠܹܗ ܒܝܲܘܡܵܐ ܕ 22 ܒܲܚܙܝܼܪܵܢ ܫܲܢ݇ܬܐ ܕ2001: ܘܲܒܗܵܢܵܐ ܥܲܡܠܵܐ ܕܥܸܪܵܗ̇ ܚܲܝܘܼܬܐ ܡܫܝܼܚܵܝܬܐ ܕܘܼܟܬܵܢܵܝܬܐ ܓܲܘ ܗܵܕܹܐ ܦܢܝܼܬܐ ܚܕܲܬܐ ܡܼܢ ܡܕܝܼܢ݇ܬܐ ܕܟܲܪܟܘܼܟ ݂
ܦܝܼܫܠܵܗ̇ ܡܫܘܼܡܲܗܬܐ ܗܵܕܹܐ ܥܹܕܬܐ ܒܬܘܼܟ݂ܠܵܢܵܐ ܥܲܠ ܠܸܒܵܐ ܕܝܼܫܘܿܥ: ܘܗܵܘ ܫܘܼܡܵܗܵܐ ܩܦܝܼܣܵܐ ܝܠܹܗ ܘܲܫܩܝܼܠܵܐ ܡܼܢ ܢܙܝܼܪܬܐ (ܨܘܿܦܵܝܬܐ) ܦܪܲܢܣܵܝܬܐ ܕܕܵܪܵܐ ܕ(17): ܩܲܕܝܼܫܬܐ ܡܲܪܓ݂ܪܹܝܬ ܡܵܐܪܝܼ ܐܲܠܟܘܿܟ ݂ ܐܝܼܬ ܠܵܗ̇ ܟܵܬܸܕܪܵܐܝܼܵܐ ܚܲܕ ܟܘܼܢܵܫܵܐ ܡܫܲܚܠܦܵܐ ܡܼܢ ܣܘܼܟܵܡܵܐ ܘܬܘܼܩܵܢܵܐ ܕܝܵܗܹܒ݂ܠܵܗ̇ ܚܕܵܐ ܗܝܼܵܝܘܼܬܐ ܦܪܝܼܫܬܐ: ܦܵܬܵܐ ܕܥܹܕܬܐ ܡܼܢ ܡܲܚܵܪܘܼܬܐ ܟܠܵܣܝܼܟܷܵܬܐ: ܘܣܘܼܟܵܡܵܐ (تصميم) ܕܲܩܪܵܫܵܗ̇ ܡܼܢ ܡܲܚܵܪܘܼܬܐ ܒܵܒ݂ܠܵܝܬܐ ܚܕܲܬܐ: ܘܒܘܼܪܓܵܐ ܕܢܵܩܘܼܫܵܗ̇ ܡܼܢ ܐܵܕܫܵܐ ܝܘܼܒܵܠܵܝܵܐ ݂
ܠܲܝܬ ܓܲܘ ܗܵܕܹܐ ܥܹܕܬܐ ܓܘܿܪܢܵܐ ܕܡܲܥܡܘܿܕܝܼܬܐ: ܐܸܠܵܐ ܢܵܦܹܠ ܓܲܘ ܚܕܵܐ ܥܹܕܬܐ ܙܥܘܿܪܬܐ ܫܒ݂ܵܒ݂ܬܐ ܠܩܸܢܛܪܘܿܢ ܕܪܹܫܵܐ ܕܐܲܦܸܣܩܘܿܦܹ̈ܐ: ܦܵܝܫܵܐ ܩܪܝܼܬܐ ܒܫܸܡ: ܒܹܝܬ ܨܠܘܿܬܐ ܕܣܵܗܕܹ̈ܐ (ܒܹܝܬ ܣܵܗܕܹ̈ܐ: ܒܠܸܫܵܢܵܐ ܐ݇ܣܘܼܪܝܵܝܵܐ): ܕܲܦܪܝܼܣܵܐ ܝܠܹܗ ܘܡܘܼܦܠܚܵܐ ܗܵܢ ܫܸܡܵܐ ܓܲܘ ܐܘܼܚܕܵܢܵܐ ܕܒܹܝܬ ܢܲܗܖ̈ܝܼܢ ݂
ܕܘܼܟܵܐ:
ܢܵܦܠܵܐ ܟܵܬܸܕܪܵܐܝܼܵܐ ܕܠܸܒܵܐ ܕܝܼܫܘܿܥ ܕܡܲܪܥܝܼܬܐ ܕܟܲܪܟܘܼܟ ܥܲܠ ܣܸܪܛܵܐ ܕ 69 39 27 ݂ 35 ܓܲܪܒܝܵܐܝܼܬ: ܘܥܲܠ ܣܸܪܛܵܐ ܕ 47 46 22 ݂ 44 ܡܲܕܢܚܵܐܝܼܬ: ܘܥܲܠ ܪܵܡܘܼܬܐ ܕ(339) ܡܝܼܬܖܹ̈ܐ ܡܼܢ ܫܲܘܝܘܼܬ݂ ܫܸܛܚܵܐ ܕܝܲܡܵܐ: ܒܲܚܕܵܐ ܦܢܝܼܬܐ ܚܕܲܬܐ ܐ݇ܚܝܵܢܵܐܝܼܬ ݂
ܘܢܵܦܠܵܐ ܟܲܪܟܘܼܟ ܐܵܪܸܫܟ݂ܵܝܬܐ ܕܗܹܘܦܲܪܟܝܼܵܐ ܕܛܵܥܢܵܐ ܝܵܬ ܫܸܡܵܐ: ܠܡܲܕܢܚܵܐ ܕܙܵܒ݂ܵܐ ܙܥܘܿܪܵܐ: ܕܝܼܠܹܗ ܚܲܕ ܢܲܗܪܘܿܢܵܐ ܫܘܼܚܠܵܦܵܝܵܐ ܕܨܵܠܹܐ ܓܲܘ ܢܲܗܪܵܐ ܕܕܸܩܠܵܬ: ܘܥܵܒܹܪ ܓܲܘ ܡܕܝܼܢ݇ܬܐ ܢܲܗܪܵܐ ܕ(ܚܵܨܵܐ) ܡܼܢ ܓܹܒܵܐ ܡܲܕܢܚܵܝܵܐ ܕܲܡܕܝܼܢ݇ܬܐ ݂ ܦܝܼܫܠܵܗ̇ ܩܪܝܼܬܐ ܦܢܝܼܬܐ ܕܢܵܦܠܵܐ ܓܵܘܵܗ̇ ܡܕܝܼܢ݇ܬܐ ܕܟܲܪܟܘܼܟ ܕܝܲܘܡܵܢܵܐ: ܒܫܸܡܵܐ ܥܲܬܝܼܩܵܐ ܕ(ܒܹܝܬ݂ ܓܲܪܡܵܝ): ܕܝܼܠܵܗ̇ ܒܓܲܪܒܝܵܐ ܡܲܕܢܚܵܝܵܐ ܕܥܝܼܪܵܐܩ: ܕܲܥܡܝܼܖܹ̈ܐ ܝܗ݇ܘܵܘ ܓܵܘܵܗ̇ ܒܲܩܕܝܼܡ: ܓܲܖ̈ܡܵܝܹܐ ܕܡܸܬܗܲܘܝܵܢܬܐ ܝܠܵܗ̇ ܕܗܵܘܹܐ ܫܸܪܫܲܝܗܝ ܡܼܢ “ܚܕܵܐ ܫܲܪܒܬܐ ܦܵܪܣܵܝܬܐ ܫܟܝܼܢܬܐ ܒܗܵܕܹܐ ܦܢܝܼܬܐ ܡܼܢ ܩܕܵܡ ܡܲܫܠܡܵܢܘܼܬܐ”[1]: ܘܐܵܦ ܡܸܬܗܲܘܝܵܢܬܐ ܝܠܵܗ̇ ܕܗܵܘܝܼ ܡܼܢ ܥܵܡܘܿܖܹ̈ܐ ܕܢܝܼܢܘܹܐ ܘܟܲܠܕܵܝܹ̈ܐ ܕܡܲܠܠܝܼ ܒܠܸܫܵܢܵܐ ܐܵܪܵܡܵܝܵܐ[2] ݂
__________
[1] ܐܵܫܘܿܪ ܡܫܝܼܚܵܝܬܐ: ܕܘܼܒܵܩܵܐ ܬܠܝܼܬܵܝܵܐ: ܦ 15: ܓ̰ܵܐܢ ܡܘܿܪܝܼܣ ܦܝܼܪܹܗ: ܒܲܝܪܘܼܬ 1968 ݂
[2] ܐܵܫܘܿܪ ܡܫܝܼܚܵܝܬܐ: ܕܘܼܒܵܩܵܐ ܬܠܝܼܬܵܝܵܐ: ܦ 15: ܓ̰ܵܐܢ ܡܘܿܪܝܼܣ ܦܝܼܪܹܗ: ܒܲܝܪܘܼܬ 1968 ݂
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
ܕܝܼܡܘܿܓ݂ܪܵܦܝܵܐ ܘܓ̰ܝܘܿܦܘܿܠܝܼܛܝܼܩܝܵܐ:
ܡܼܢ ܡܸܢܝܵܢܵܐ ܕ (2 ݂1) ܡܸܠܝܘܿܢܹ̈ܐ ܢܸܫܡܹ̈ܐ ܡܼܢ ܥܵܡܘܿܖܹ̈ܐ ܕܟܲܪܟܘܼܟ: ܩܘܼܖ̈ܕܵܝܹܐ ܡܛܲܦܣܝܼ ܣܲܓܝܼܐܘܼܬܐ ܪܲܒܬܐ: ܘܥܵܡܘܿܖܹ̈ܐ ܐ݇ܚܖ̈ܵܢܹܐ ܡܼܢ ܬܘܼܖ̈ܟܡܵܢܹܐ (ܫܝܼܥܵܐ ܘܣܘܼܢܵܐ) ܘܥܲܖ̈ܒ݂ܵܝܹܐ (ܣܘܼܢܵܐ) ܘܲܡܫܝܼܚܵܝܹ̈ܐ (ܒܣܘܿܓ݂ܐܵܐ ܟܲܠܕܵܝܹ̈ܐ: ܘܒܲܒܨܝܼܪܘܼܬܐ ܐܵܖ̈ܡܢܵܝܹܐ) ݂ ܘܐܝܼܬ ܗ݇ܘܵܐ ܐܵܦ ܝܗܘܼܕܵܝܹ̈ܐ: ܐܸܠܵܐ ܒܝܲܘܡܵܢܵܐ ܠܲܝܬ ܦܝܵܫܵܐ ܟܢܘܼܫܝܵܐ ܝܗܘܼܕܵܝܵܐ ݂ ܒܫܲܢ݇ܬܐ ܕ 2018: ܐܝܼܬ ܗ݇ܘܵܐ 5000 ܐܲܠܦܹ̈ܐ ܡܫܝܼܚܵܝܹ̈ܐ ܟܲܠܕܵܝܹ̈ܐ ܓܲܘ ܟܲܪܟܘܼܟ ܒܲܠܩܘܼܒ݂ܠ 7000 ܐܲܠܦܹ̈ܐ ܓܲܘ ܟܠܹܗ ܩܠܹܝܡܵܐ ܕܡܲܪܥܝܼܬܐ[1] ݂
ܒܫܲܢ݇ܬܐ ܕ 1838: ܒܲܠܩܘܼܒ݂ܠ ܟܠ 15000 ܐܲܠܦܹ̈ܐ ܢܸܫܡܹ̈ܐ: ܐܝܼܬ ܗ݇ܘܵܐ ܩܘܼܪܒܵܐ ܠ (300) ܟܲܠܕܵܝܹ̈ܐ ܓܲܘ ܟܲܪܟܘܼܟ: ܒܚܘܼܬܵܡܵܐ ܕܕܵܪܵܐ ܕ(19): ܟܲܠܕܵܝܹ̈ܐ ܦܵܠܛܝܼ ܗ݇ܘܵܘ (800) ܢܸܫܡܹ̈ܐ ܒܲܠܩܘܼܒ݂ܠ 30000 ܐܲܠܦܹ̈ܐ ܢܸܫܡܹ̈ܐ ݂ ܐܵܗܵܐ ܡܸܢܝܵܢܵܐ ܙܥܘܿܪܵܐ ܕܲܡܫܝܼܚܵܝܹ̈ܐ ܟܲܠܕܵܝܹ̈ܐ: ܝܲܬܝܼܪ ܝܗ݇ܘܵܐ ܒܚܲܡܫܵܐ ܓܵܗܹ̈ܐ ܠܡܸܢܝܵܢܵܐ ܕܫܲܢ݇ܬܐ ܕ 2018 ݂
ܒܫܘܼܪܵܝܵܐ ܕܕܵܪܵܐ ܕܥܸܣܪܝܼܢ ܘܚܲܕ: ܥܦܸܦܠܹܗ ܟܘܼܬܵܫܵܐ ܘܒܥܸܠܕܒ݂ܵܒ݂ܘܼܬܐ ܬܲܘܕܝܼܬܵܢܵܝܬܐ ܓܲܘ ܟܲܪܟܘܼܟ: ܕܝܼܠܵܗ̇ ܩܸܢܛܪܘܿܢ ܪܹܫܵܝܵܐ ܕܢܸܦ̮ܛܵܐ ܓܲܘ ܓܲܪܒܝܵܐ ܕܥܝܼܪܵܐܩ: ܘܲܥܦܸܦܠܵܗ̇ ܒܥܸܠܕܒ݂ܵܒ݂ܘܼܬܐ ܒܥܸܠܬܐ ܕܲܩܪܵܒ݂ܵܐ ܕܒܲܪܩܵܩܵܐ ܓܲܘ ܬܸܫܥܝܼܢܵܝܵܬ݂ܐ: ܘܲܢܦܵܠܬܐ ܕܛܲܟܣܵܐ ܕܨܲܕܵܐܡ ܚܘܼܣܲܝܢ ܒܫܲܢ݇ܬܐ ܕ 2003 ݂ ܘܲܒܥܘܼܕܪܵܢܵܐ ܕ(ܡܲܣܥܘܿܕ ܒܲܪܵܙܵܢܝܼ): ܪܹܫܵܢܵܐ ܥܒ݂ܝܼܪܵܐ ܕܲܩܠܹܝܡܵܐ ܕܟܘܼܪܕܸܣܬܵܐܢ ܕܥܝܼܪܵܐܩ: ܟܲܪܟܘܼܟ ܢܛܝܼܪܬܐ ܝܗ݇ܘܵܐ ܒܝܲܕ ܚܲܝܠܵܘܵܬ݂ܐ ܕ(ܦܝܼܫܡܲܪܓܵܐ) ܐܝܼܡܲܢ ܕܦܝܼܫܠܵܗ̇ ܓܙܝܼܡܬܐ ܒܝܲܕ (ܕܵܥܹܫ): ܕܲܒܥܹܐ ܠܹܗ ܕܫܲܠܛܸܢ ܥܲܠ ܟܲܪܟܘܼܟ ܒܲܚܙܝܼܪܵܢ 2014 ݂
ܒܝܘܿܡ 25 ܒܐܝܼܠܘܿܠ ܒܫܲܢ݇ܬܐ ܕ 2017: ܦܘܼܢܥܵܡܵܐ (استفتاء) ܥܲܠ ܚܸܠܩܵܐ ܕܟܘܼܪܕܸܣܬܵܐܢ ܕܥܝܼܪܵܐܩ: ܚܒܸܫܠܹܗ ܐܵܦ ܗܹܘܦܲܪܟܝܼܵܐ ܕܟܲܪܟܘܼܟ: ܐܸܠܵܐ ܦܪܸܩܠܹܗ 16 ܒܬܸܫܪܝܼܢ ܩܲܕܡܵܝܵܐ ܒܫܘܼܠܛܵܢܘܼܬܐ ܓܲܝܣܵܝܵܬܐ ܘܦܘܿܠܝܼܛܝܼܩܵܝܵܬܐ ܥܲܠ ܟܲܪܟܘܼܟ: ܒܝܲܕ ܚܲܝ̈ܠܵܘܵܬ݂ܐ ܓܲܝܣܵܝܹ̈ܐ ܥܝܼܖ̈ܵܩܵܝܹܐ: ܘܫܘܼܬܐܵܣܹ̈ܐ ܣܒ݂ܝܼܗ ܓܲܝܣܵܝܹ̈ܐ ܕܲܦܠܸܚܠܗ݇ܘܿܢ ܥܲܡ ܓܲܝܣܵܐ ܪܘܼܫܡܵܝܵܐ ݂
__________
[1] ܡܲܒܘܼܥܵܐ: ܡܲܛܪܵܢ ܝܲܘܣܸܦ ܬܐܘܿܡܵܐ ܡܲܪܩܘܿܣ: ܪܹܫ ܐܲܦܸܣܩܘܿܦܹ̈ܐ ܕܟܲܪܟܘܼܟ
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
ܚܲܕ ܦܸܣܩܵܐ ܥܲܠ ܬܲܫܥܝܼܬܐ ܡܫܝܼܚܵܝܬܐ ܓܲܘ ܒܹܝܬ ܓܲܪܡܵܝ ܘܟܲܪܟܘܼܟ:
ܟܒܲܪ ܡܫܝܼܚܵܝܘܼܬܐ ܡܘܼܒܝܲܢܬܐ ܝܗ݇ܘܵܐ ܡܼܢ ܙܲܒ݂ܢܵܐ ܒܲܥܝܼܕܵܐ ܓܲܘ ܒܹܝܬ ܓܲܪܡܵܝ: ܗ: ܕ: ܡܼܢ ܒܵܬܲܪ ܣܒ݂ܲܪܬܐ ܕܲܫܠܝܼܚܵܐ ܩܲܕܝܼܫܵܐ ܬܐܘܿܡܵܐ ܘܬܵܒ݂ܘܿܥܹ̈ܗ ܐܲܕܲܝ ܘܡܵܐܪܝ ݂ ܠܦܘܼܬ݂ ܝܘܼܒܵܠܹ̈ܐ: ܬ݂ܝܘܿܩܪܝܼܬܘܿܣ[1] ܝܼܗ݇ܘܵܐ ܐܲܦܸܣܩܘܿܦܵܐ ܩܲܕܡܵܝܵܐ ܝܼܕܝܼܥܵܐ ܓܲܘ ܟܲܪܟܘܼܟ: ܡܸܬܗܲܘܝܵܢܝܼܬܐ ܝܠܵܗ̇ ܕܗܵܘܹܐ ܡܼܢ ܐܲܬܪܵܐ ܝܲܘܢܵܢܵܝ ܪܗܘܿܡܵܢܵܝܵܐ: ܡܨܹܐ ܠܹܗ ܕܚܵܙܹܐ ܒܹܝܬ ܓܲܘܣܵܐ ܓܲܘ ܐܲܬ݂ܪܵܐ ܕܦܵܪܹܣ: ܘܲܗܘܹܐ ܠܵܗ̇ ܐܲܦܸܣܩܘܿܦܵܝܘܼܬܹܗ ܒܫܘܼܪܵܝܵܐ ܕܕܵܪܵܐ ܡܫܝܼܚܵܝܵܐ ܬܪܲܝܵܢܵܐ ܒܹܝܬ 117 ܘ 138 ݂
ܓܲܘ ܬܲܫܥܝܼܬܐ ܕܟܲܪܟ݂ܵܐ[2]: “ܥܹܕܬܐ ܕܦܝܼܫܠܵܗ̇ ܒܢܝܼܬܐ ܓܲܘ ܡܲܘܬܒ݂ܵܐ ܐܲܘ ܫܲܘܦܵܐ ܕܒܲܝܬܐ ܕܝܲܘܣܸܦ: ܕܝܼܠܹܗ ܗܿܘ ܐܲܬ݂ܪܵܐ ܡܫܝܼܚܵܝܵܐ ܝܲܬܝܼܪ ܥܲܬܝܼܩܵܐ ܘܲܡܩܲܕܫܵܐ ܓܲܘ ܡܕܝܼܢ݇ܬܐ” ݂ ܠܵܐ ܢܵܦܹܠ ܗܵܢܵܐ ܫܲܩܨܵܐ (ܡܲܣܥܪܵܐ: مزار) ܕܠܲܝܬ ܠܹܗ ܦܝܵܫܵܐ ܫܲܘܦܵܐ ܐܲܘ ܐܲܬ݂ܪܵܐ ܓܲܘ ܚܸܣܢܵܐ ܕܟܲܪܟܘܼܟ: ܐܸܠܵܐ ܥܲܠ ܪܸܚܩܵܝܘܼܬܐ ܕ (2) ܟܠܡ ܓܲܘ ܩܘܿܪܝܵܐ: ܕܝܼܠܵܗ̇ ܚܕܵܐ ܡܼܢ ܡܲܫܖ̈ܵܝܵܬ݂ܐ ܕܲܡܕܝܼܢ݇ܬܐ ܕܟܲܪܟܘܼܟ ݂
ܒܫܲܢ݇ܬܐ ܕ445: ܦܝܼܫܠܵܗ̇ ܝܼܕܝܼܥܬܐ ܬܲܫܥܝܼܬܐ ܡܫܝܼܚܵܝܬܐ ܕܟܲܪܟܘܼܟ ܒܐܘܼܪܚܵܐ ܕܲܪܕܘܼܦܝܵܐ ܕܦܝܼܫܠܹܗ ܥܒ݂ܝܼܕܵܐ ܒܝܲܕ ܡܲܠܟܵܐ ܣܵܣܵܢܵܝܵܐ ܝܲܙܕܝܼܓܲܪܕ ܬܪܲܝܵܢܵܐ: ܗܿܘ ܕܠܵܐ ܩܛܸܠܠܹܗ ܒܲܠܚܘܿܕ (12000) ܐܲܠܦܹ̈ܐ ܦܲܖ̈ܨܘܿܦܹܐ: ܐܸܠܵܐ ܐܵܦ ܟܠܲܝܗܝ ܬܵܒ݂ܘܿܥܹ̈ܗ[3] ݂ ܓܲܘ ܩܪܵܒܹܗ ܕܲܠܩܘܼܒ݂ܠ ܐܸܡܦܪܵܛܘܿܪܘܼܬܐ ܪܗܘܿܡܵܢܵܝܬܐ ܡܲܕܢܚܵܝܬܐ ܕܲܚܦܸܩܠܵܗ̇ ܠܲܡܫܝܼܚܵܝܘܼܬܐ: ܚܫܸܒ݂ܠܹܗ ܡܲܠܟܵܐ ܦܵܪܣܵܝܵܐ ܕܲܡܫܝܼܚܵܝܹ̈ܐ ܦܝܼܫܠܗ݇ܘܿܢ ܒܥܸܠܕܒ݂ܵܒܹ̈ܐ ܐܸܠܹܗ: ܘܲܒܥܹܐ ܠܹܗ ܒܝܵܬ ܥܸܕܵܢܵܐ ܕܣܵܐܹܡ ܐܲܘ ܪܵܫܹܡ ܗܲܝܡܵܢܘܼܬܐ ܙܲܪܕܵܫܬܵܝܬܐ ܒܟܠܵܗ̇ ܐܸܡܦܪܵܛܘܿܪܘܼܬܹܗ ݂ ܡܼܢ ܒܵܬܲܪ ܕܲܥܒ݂ܵܪܬܐ ܕ(6) ܫܸܢܹ̈ܐ ܥܲܠ ܣܵܗܕܘܼܬܐ ܕܲܡܫܝܼܚܵܝܹ̈ܐ ܕܟܲܪܟܘܼܟ: ܨܦܸܚܠܗ݇ܘܿܢ ܚܲܝ̈ܠܵܘܵܬܹܗ ܥܲܠ ܐܵܖܸ̈ܡܢܵܝܹܐ ܘܩܲܡ ܡܲܥܪܸܩܠܗ݇ܘܿܢ ܓܲܘ ܫܸܛܚܵܐ ܕ(ܐܵܦܪܵܝܲܪ) ݂ ܒܗܵܕܹܐ ܙܒܲܢ݇ܬܐ (مرة): ܘܐܲܝܟ݂ ܕܲܒܪܹܐ ܠܹܗ ܒܓܵܗܵܬ݂ܐ ܐ݇ܚܖܹ̈ܢܹܐ: ܠܵܐ ܡܨܹܐ ܠܹܗ ܝܲܙܕܝܼܓ݂ܲܪܕ ܕܙܲܟܹܐ ܥܲܠ ܡܫܝܼܚܵܝܘܼܬܐ ܓܲܘ ܐܸܡܦܪܵܛܘܿܪܘܼܬܐ ܦܵܪܣܵܝܬܐ: ܐܸܠܵܐ ܒܗܸܦܟܵܐ ܡܠܘܼܒܸܒ݂ܠܹܗ ܣܘܼܟܵܠܵܐ ܕܣܵܗܕܘܼܬܐ ܕܲܠܝܲܘܡܵܢܵܐ ܐܝܼܬ ܠܘܵܬ݂ ܡܫܝܼܚܵܝܹ̈ܐ ܕܒܹܝܬ݂ ܢܲܗܖ̈ܝܼܢ ݂ ܠܗܵܠܵܐ ܥܹܕܬܐ ܘܒܹܝܬ ܩܒ݂ܘܼܪܵܐ ܕܛܲܗܡܲܙܓܸܪܕ ܓܲܘ ܟܲܪܟܘܼܟ: ܣܵܗܕܝܼ ܥܲܠ ܪܕܘܼܦܝܵܐ ܕܲܥܒܸܕܠܹܗ ܝܲܙܕܝܼܓܲܪܕ ܬܪܲܝܵܢܵܐ ݂ ܩܘܼܪܒܵܐ ܠܫܲܢ݇ܬܐ ܕ 470: ܗ: ܕ: ܡܼܢ ܒܵܬܲܪ ܡܲܘܬܐ ܕܡܲܠܟܵܐ ܦܵܪܣܵܝܵܐ: ܩܛܸܪܘܼܢ ܡܫܝܼܚܵܝܹ̈ܐ ܕܟܲܪܟܘܼܟ ܚܲܕ ܙܘܼܝܵܚܵܐ ( ܠܐܲܡܝܼܢܘܼܬ݂ ܕܘܼܟ݂ܪܵܢܵܐ ܕܙܵܟ݂ܘܼܬܐ ܕܕܸܒ݂ܚܹ̈ܐ)[4] ݂ ܘܝܲܘܡܵܢܵܐ ܦܵܐܹܫ ܚܫܝܼܒ݂ܵܐ ܡܲܘܬܒ݂ܵܐ ܕܛܲܗܡܲܙܓܸܪܕ ܕܢܵܦܹܠ ܥܲܠ ܓܹܒܵܐ ܡܲܕܢܚܵܝܵܐ ܕܚܸܣܢܵܐ: ܡܼܢ ܡܲܘܬܒܹ̈ܐ ܡܫܝܼܚܵܝܹ̈ܐ ܝܲܬܝܼܪ ܥܲܬܝܼܩܹ̈ܐ ܕܐܝܼܬ ܓܲܘ ܟܲܪܟܘܼܟ ݂ ܒܝܘܿܡ 25 ܒܐܝܼܠܘܿܠ ܡܼܢ ܟܠ ܫܲܢ݇ܬܐ: ܟܹܐ ܡܙܲܝܚܝܼ ܡܫܝܼܚܵܝܹ̈ܐ ܕܟܲܪܟܘܼܟ ܒܕܘܼܟ݂ܪܵܢܵܐ ܕܣܵܗܕܹ̈ܐ ܕܛܲܗܡܲܙܓܸܪܕ ݂
ܘܒܵܬܲܪ ܗܵܕܹܐ: ܘܲܒܚܘܼܬܵܡܵܐ ܕܕܵܪܵܐ ܚܡܝܼܫܵܝܵܐ ܩܘܼܪܒܵܐ ܠܫܲܢ݇ܬܐ ܕ 484/ 485: ܗܘܹܐ ܠܗ݇ܘܿܢ ܐ݇ܣܘܼܖ̈ܵܝܹܐ ܕܒܹܝܬ݂ ܓܲܪܡܵܝ: ܐܲܠܝܼܨܹ̈ܐ ܕܟܵܠܝܼ ܕܲܠܩܘܼܒ݂ܠ ܖܸ̈ܥܝܵܢܹܐ ܕܒܲܪܨܲܘܡܵܐ: ܡܝܼܛܪܵܦܘܿܠܹܝܛܐ ܢܸܣܛܘܿܪܢܵܝܵܐ ܕܲܢܨܝܼܒ݂ܝܼܢ ݂ ܗܵܠܹܝܢ ܕܠܵܐ ܒܥܹܐ ܠܗ݇ܘܿܢ ܕܕܵܥܪܝܼ ܐܲܘ ܡܫܲܢܝܼ ܠܢܸܣܛܘܿܪܢܵܝܘܼܬܐ: ܝܲܢ ܟܠܹܐ ܠܗ݇ܘܿܢ ܕܲܠܩܘܼܒ݂ܠ ܐܲܘ ܦܝܼܫܠܗ݇ܘܿܢ ܩܛܝܼܠܹ̈ܐ ܐܲܘ ܦܝܼܫܠܗ݃ܘܿܢ ܡܐܲܠܨܹ̈ܐ ܕܥܵܪܩܝܼ ݂ ܘܥܲܡ ܥܒ݂ܘܿܪܝܵܐ ܕܕܵܖܹ̈ܐ: ܘܥܲܡ ܬܢܵܝܬܐ ܕܲܡ̈ܚܵܘܵܬ݂ܐ (أزمات) ܘܥܲܣ̈ܩܵܬܐ: ܦܝܼܫܠܵܗ̇ ܢܸܣܛܘܿܪܢܵܝܘܼܬܐ ܫܸܪܫܵܝܬܐ ܓܲܘ ܒܹܝܬ ܓܲܪܡܵܝ: ܠܥܲܕ ܫܘܼܬܐܵܣܵܐ ܕܥܹܕܬܐ ܟܲܠܕܵܝܬܐ ܢܲܩܝܼܦܬܐ (ܬܒ݂ܝܼܥܬܐ) ܠܥܹܕܬܐ ܕܪܗܘܿܡܵܐ ܡܼܢ ܫܲܢ݇ܬܐ ܕ 1553: ܕܲܗܘܹܐ ܠܗ݇ܘܿܢ ܢܲܩܝܼܦܹ̈ܐ ܐܸܠܵܗ̇ ܡܫܝܼܚܵܝܹ̈ܐ ܕܟܲܪܟܘܼܟ ܒܣܘܼܪܗܵܒ݂ܵܐ: ܐܵܦܸܢ ܥܹܕܬܐ ܟܲܠܕܵܝܬܐ ܕܘܼܟܬܵܢܵܝܬܐ ܠܵܐ ܦܝܼܫܠܵܗ̇ ܚܙܝܼܬܐ ܓܲܠܝܵܐܝܼܬ ܐܸܠܵܐ ܒܕܵܪܵܐ ܕ (18) ݂
__________
[1] ܫܸܡܵܐ ܡܵܪܹܐ ܫܸܪܫܵܐ ܝܲܘܢܵܝܵܐ ܬ݂ܝܘܿܩܪܝܼܛ / ܬ݂ܝܘܿܩܪܝܼܛܝܼ / ܣܘܼܟܵܠܹܗ: ܚܲܝܠܵܐ ܕܐܲܠܵܗܵܐ ݂
[2] ܟܲܪܟ݂ܵܐ: ܝܼܠܹܗ ܫܸܡܵܐ ܐ݇ܣܘܼܪܝܵܝܵܐ ܥܲܬܝܼܩܵܐ ܕܟܲܪܟܘܼܟ ܕܝܲܘܡܵܢܵܐ: ܒܣܘܼܟܵܠܵܐ ܕܲܡܕܝܼܢ݇ܬܐ ܟܪܝܼܟ݂ܬܐ ܒܫܘܼܖ̈ܵܢܹܐ: ܐܲܘ ܩܲܠܥܵܐ ܘܚܸܣܢܵܐ ݂
[3] ܐܵܫܘܿܪ ܡܫܝܼܚܵܝܬܐ: ܦ 17: ܓ̰ܵܐܢ ܡܘܿܪܝܼܣ ܦܝܼܝܹܗ: ܒܲܝܪܘܼܬ 1968 ݂
[4] ܐܵܫܘܿܪ ܡܫܝܼܚܵܝܬܐ: ܦ 17: ܓ̰ܵܐܢ ܡܘܿܪܝܼܣ ܦܝܼܝܹܗ: ܒܲܝܪܘܼܬ 1968 ݂
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
ܬܲܫܥܝܼܬܐ ܕܟܵܬܸܕܪܵܐܝܼܐ ܕܠܸܒܵܐ ܕܝܼܫܘܿܥ ܕܓܲܘ ܟܲܪܟܘܼܟ:
ܡܫܘܼܪܹܐ ܠܹܗ ܦܘܼܠܚܵܢܵܐ ܓܲܘ ܒܢܵܝܬܐ ܕܟܵܬܸܕܪܵܐܝܼܵܐ ܕܠܸܒܵܐ ܕܝܼܫܘܿܥ ܕܡܲܪܥܝܼܬܐ ܕܟܲܪܟܘܼܟ ܒܝܲܘܡܵܐ ܕܚܲܕ ܒܲܚܙܝܼܪܵܢ ܫܲܢ݇ܬܐ ܕ1997: ܘܲܦܪܸܩܠܹܗ ܒܝܲܘܡܵܐ ܕ 22 ܒܲܚܙܝܼܪܵܢ ܫܲܢ݇ܬܐ ܕ2001: ܬܚܘܿܬ ܪܵܥܝܘܼܬܐ ܕܝܘܿܚܵܢܲܢ ܦܲܘܠܘܿܣ ܬܪܲܝܵܢܵܐ: ܘܦܵܛܪܝܼܵܪܟܵܐ ܪܘܼܦܵܐܹܝܠ ܒܝܼܕܵܘܝܼܕ ܩܲܕܡܵܝܵܐ: ܒܙܲܒ݂ܢܵܐ ܕܡܲܛܪܵܢ ܐܲܢܕܪܵܐܘܿܣ ܨܲܢܵܐ: ܪܹܫܵܢܵܐ ܕܐܲܦܸܣܩܘܿܦܹ̈ܐ ܕܟܲܪܟܘܼܟ ݂ ܓܵܘܵܐ ܕܒܸܢܝܵܢܵܐ: ܘܥܲܠ ܓܘܼܕܵܐ ܕܝܼܠܹܗ ܠܝܲܡܝܼܢܵܐ ܕܬܲܪܥܵܐ ܩܕܵܡܵܝܵܐ: ܐܝܼܬ ܢܸܩܫܹ̈ܐ ܒܠܸܫܵܢܵܐ ܥܲܪܒ݂ܵܝܵܐ ݂ ܘܲܒܗܵܢܵܐ ܥܲܡܠܵܐ ܕܒܸܢܝܵܢܵܐ ܕܥܹܕܬܐ: ܕܥܸܪܵܗ̇ ܚܲܝܘܼܬܐ ܡܫܝܼܚܵܝܬܐ ܕܘܼܟܬܵܢܵܝܬܐ ܠܗܵܕܹܐ ܦܢܝܼܬܐ ܚܕܲܬܐ ܡܼܢ ܡܕܝܼܢ݇ܬܐ ܕܟܲܪܟܘܼܟ ݂
ܦܝܼܫܠܵܗ̇ ܡܫܘܼܡܲܗܬܐ ܗܵܕܹܐ ܥܹܕܬܐ ܒܬܘܼܟ݂ܠܵܢܵܐ ܥܲܠ ܠܸܒܵܐ ܕܝܼܫܘܿܥ: ܘܗܵܘ ܫܘܼܡܵܗܵܐ ܩܦܝܼܣܵܐ ܝܠܹܗ ܘܲܫܩܝܼܠܵܐ ܡܼܢ ܢܙܝܼܪܬܐ (ܨܘܿܦܵܝܬܐ) ܦܪܲܢܣܵܝܬܐ ܕܕܵܪܵܐ ܕ(17): ܩܲܕܝܼܫܬܐ ܡܲܪܓ݂ܪܹܝܬ ܡܵܐܪܝܼ ܐܲܠܟܘܿܟ ݂
ܦܪܸܣܠܹܗ ܣܘܼܟܵܠܵܐ ܕܓܲܐܝܘܼܬܐ (التبجيل) ܓܲܘ ܥܝܼܪܵܐܩ ܒܝܲܕ ܡܣܲܒ݂ܖ̈ܵܢܹܐ ܩܵܬ݂ܘܿܠܝܼܩܵܝܹ̈ܐ: ܙܲܘܕܵܐ ܠ “ܐ݇ܪܵܙܵܐ ܕܡܸܬܓܲܫܡܵܢܘܼܬܐ ܕܝܼܠܹܗ ܪܵܒܵܐ ܐܵܢܲܢܩܵܝܵܐ ܓܲܘ ܡܲܕܢܚܵܐ”[1] ݂
__________
[1] ܡܲܒܘܼܥܵܐ: ܡܲܛܪܵܢ ܝܲܘܣܸܦ ܬܐܘܿܡܵܐ ܡܲܪܩܘܿܣ: ܪܹܫ ܐܲܦܸܣܩܘܿܦܹ̈ܐ ܕܟܲܪܟܘܼܟ
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
ܡܫܲܡܗܘܼܬ݂ ܟܵܬܸܕܪܵܐܝܼܵܐ ܕܠܸܒܵܐ ܕܝܼܫܘܿܥ ܕܓܲܘ ܟܲܪܟܘܼܟ:
ܐܝܼܬ ܠܵܗ̇ ܟܵܬܸܕܪܵܐܝܼܵܐ ܚܲܕ ܟܘܼܢܵܫܵܐ ܡܫܲܚܠܦܵܐ ܡܼܢ ܣܘܼܟܵܡܵܐ ܘܬܘܼܩܵܢܵܐ ܕܝܵܗܹܒ݂ܠܵܗ̇ ܚܕܵܐ ܗܝܼܵܝܘܼܬܐ ܦܪܝܼܫܬܐ: ܦܵܬܵܐ ܕܥܹܕܬܐ ܡܼܢ ܡܲܚܵܪܘܼܬܐ ܟܠܵܣܝܼܟܵܝܬܐ: ܘܣܘܼܟܵܡܵܐ ܕܲܩܪܵܫܵܗ̇ ܡܼܢ ܡܲܚܵܪܘܼܬܐ ܒܵܒ݂ܠܵܝܬܐ ܚܕܲܬܐ: ܘܒܘܼܪܓܵܐ ܕܢܵܩܘܿܫܵܗ̇ ܡܼܢ ܐܵܕܫܵܐ ܝܘܼܒܵܠܵܝܵܐ ݂
ܠܓܹܒ ܡܲܥܠܵܢܵܐ: ܘܥܲܠ ܬܪܲܝܗܘܿܢ ܓܹܒܵܢܹ̈ܐ ܕܬܲܪܥܵܐ ܩܲܝܣܵܝܵܐ ܩܸܢܛܪܘܿܢܵܝܵܐ ܡܣܲܩܠܵܐ ܦܫܝܼܛܵܐܝܼܬ: ܐܝܼܬ ܥܲܡܘܼܕܹ̈ܐ ܕܣܵܢܕܝܼ ܚܲܕ ܠܘܼܚܵܐ ܡܣܘܼܩܠܵܐ ܒܲܨܠܝܼܒ݂ܵܢܹ̈ܐ ܟܖ̈ܝܼܟܹܐ ܒܚܲܕ ܚܘܼܕܪܵܐ ܥܲܠ ܐܸܣܟܹܝܡܵܐ ܡܲܚܪܵܝܵܐ ܬܸܢܝܵܐ ݂ ܓܲܘ ܙܵܘܝܵܬ݂̈ܐ ܕܦܵܬܐ ܕܥܹܕܬܐ: ܐܝܼܬ ܬܪܹܝܢ ܒܘܼܖ̈ܓܹܐ ܕܢܵܩܘܿܫܵܐ ܕܐܝܼܬ ܠܹܗ ܚܲܕ ܐܸܣܵܐ ܡܪܲܒܥܵܐ ܒܐܸܣܟܹܝܡܵܐ: ܒܪܹܫܹܗ ܐܝܼܬ ܦܘܼܢܣܹ̈ܐ (فوانيس) ݂
ܟܵܬܸܕܪܵܐܝܼܵܐ ܦܝܼܫܠܵܗ̇ ܒܢܝܼܬܐ ܡܼܢ ܫܡܸܢܬܐ ܦܲܪܙܠܵܝܬܐ: ܘܦܝܼܫܠܵܗ̇ ܡܟܘܼܣܲܝܬܐ ܡܢܵܬܵܐܝܼܬ ܡܼܢ ܒܲܪܵܐ ܒܟܹܐܦܹ̈ܐ: ܐܝܼܢܵܐ ܡܼܢ ܓܵܘܵܐ ܦܝܼܫܠܵܗ̇ ܡܟܘܼܣܲܝܬܐ ܒܫܝܼܫܵܐ: ܡܵܪܹܐ ܣܘܼܟܵܡܵܐ ܒܵܙܝܼܠܝܼܟܵܝܵܐ ܥܲܠ ܕܘܼܡܝܵܐ ܕܚܲܕ ܐܵܘܵܢܵܐ ܡܵܖ̈ܲܝ ܬܠܵܬܐ ܗܲܝܟܠܹ̈ܐ: ܣܢܝܼܕܹ̈ܐ ܒܐܲܪܒܥܵܐ ܥܲܡܘܼܕܹ̈ܐ ܡܖ̈ܲܒܥܲܝ ܐܸܣܟܹܝܡܵܐ ݂ ܐܝܼܬ ܒܪܹܫ ܗܿܘ ܬܲܪܥܵܐ ܩܕܝܼܡܵܝܵܐ ܚܲܕ ܡܕܲܪܓ݂ܵܐ (مدرج) ݂ ܥܒ݂ܵܪܵܐ ܠܡܲܕܒܚܵܐ ܕܝܼܠܹܗ ܪܵܡܵܐ ܩܲܠܝܼܠܵܐܝܼܬ ܒܸܕ ܗܵܘܹܐ ܒܐܘܼܪܚܵܐ ܕܚܲܕ ܬܲܪܥܵܐ ܟܹܐܦܵܝܵܐ: ܘܐܝܼܬ ܚܲܕ ܩܸܛܪܵܐ ܟܹܐܦܵܝܵܐ ܓܲܘ ܕܵܪܬܐ ܡܩܘܼܕܲܫܬܐ: ܡܣܲܩܠܵܐ ܒܐܵܬܘܵܬܵܐ ܡܼܢ ܐܹܘܲܢܓܲܠܝܼܘܿܢܹ̈ܐ ܟܬܝܼܒܹ̈ܐ ܒܠܸܫܵܢܵܐ ܥܲܪܒ݂ܵܝܵܐ: ܘܐܵܦ ܟܹܐ ܚܵܒܹܫ ܐܲܪܒܥܵܐ ܢܝܼܫܵܢܩܹ̈ܐ ܡܛܲܦܣܝܼ ܐܹܘܲܢܓܵܠܝܼܣܛܹ̈ܐ ݂ ܦܝܼܫܠܹܗ ܒܸܢܝܵܐ ܡܲܕܒܚܵܐ ܪܹܫܵܝܵܐ ܡܼܢ ܫܝܼܫܵܐ (رخام) ܘܐܝܼܬ ܥܲܠܠܹܗ ܡܲܠܲܐܟܹ̈ܐ ݂ ܐܝܼܢܵܐ ܒܵܬܪܹܗ: ܘܥܲܠ ܓܘܼܕܵܐ ܓܸܢܝܵܐ: ܐܝܼܬ ܚܲܕ ܨܠܝܼܒ݂ܵܐ ܩܲܝܣܵܝܵܐ ܪܲܒܵܐ ܡܼܢ ܩܲܝܣܵܐ ܕܩܲܕܝܼܫܵܐ ܬܐܘܿܡܵܐ: ܘܝܼܠܹܗ ܚܲܕ ܨܠܝܼܒ݂ܵܐ ܡܫܲܒܚܵܐ ܕܠܵܐ ܡܫܝܼܚܵܐ ܨܠܝܼܒ݂ܵܐ: ܘܝܼܠܹܗ ܚܲܕ ܛܘܼܦ̮ܣܵܐ ܩܵܐ ܨܠܝܼܒ݂ܵܐ ܝܘܼܒܵܠܵܝܵܐ ܕܥܹܕܬܐ ܕܡܲܕܢܚܵܐ ݂ ܡܲܥܒ̇ܖܹ̈ܐ ܕܥܹܕܬܐ ܡܗܲܕܝܼ ܠܲܬܪܹܝܢ ܡܲܕܒܚܹ̈ܐ ܓܹܒܵܢܵܝܹ̈ܐ: ܚܲܕ ܡܸܢܲܝܗܝ ܦܪܝܼܫܵܐ ܝܠܹܗ ܩܵܐ ܡܲܪܝܲܡ ܒܬܘܼܠܬܐ: ܘܗܿܘ ܐ݇ܚܹܪ݇ܢܵܐ ܩܵܐ ܩܲܕܝܼܫܵܐ ܝܲܘܣܸܦ ݂
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
ܓܘܿܪܢܵܐ ܕܡܲܥܡܘܿܕܝܼܬܐ:
ܠܲܝܬ ܚܲܕ ܕܘܼܟܵܐ ܦܪܝܼܫܵܐ ܠܓܘܿܪܢܵܐ ܕܡܲܥܡܘܿܕܝܼܬܐ ܓܲܘ ܒܸܢܝܵܢܵܐ ܕܟܵܬܸܕܪܵܐܝܼܵܐ: ܐܸܠܵܐ ܝܼܠܹܗ ܓܲܘ ܗܵܝ ܥܹܕܬܐ ܙܥܘܿܪܬܐ ܕܝܼܠܵܗ̇ ܒܲܫܒ݂ܵܒ݂ܘܼܬܐ: ܘܦܵܐܹܫ ܩܸܪܝܵܐ ܒܹܝܬ ܨܠܘܿܬܐ ܕܣܵܗܕܹ̈ܐ (ܒܹܝܬ ܣܵܗܕܹ̈ܐ ܒܠܸܫܵܢܵܐ ܐ݇ܣܘܼܪܝܵܝܵܐ): ܕܝܼܠܹܗ ܦܪܝܼܣܵܐ ܘܡܘܼܦܠܸܚܵܐ ܓܲܘ ܥܹܕܵܬ̈ܐ ܕܒܹܝܬ ܢܲܗܖ̈ܝܼܢ ݂ ܗܲܝܟܠܵܐ ܕܗܵܕܹܐ ܥܹܕܬܐ ܙܥܘܿܪܵܐ ܝܠܹܗ: ܘܲܡܬܝܼܚ ܐܸܣܟܹܝܡܵܐ ܘܲܚܕܵܢܲܝ ܗܲܝܟܠܵܐ ݂ ܐܝܼܬ ܚܝܼܠܬܐ ܥܲܠ ܐܲܪܥܵܐ: ܘܚܵܒ݂ܫܵܐ ܠܘܼܚܹ̈ܐ ܨܘܼܒܬܵܝܹ̈ܐ ܡܬܲܖ̈ܨܹܐ ܡܼܢ ܡܵܐܢܹ̈ܐ ܡܖ̈ܲܟܒܹܐ ݂ ܒܸܕ ܚܵܙܹܝܚ ܥܲܠ ܡܲܕܒܚܵܐ ܬܲܪܬܹܝܢ ܨܘܼܖ̈ܝܵܬ݂ܐ ܡܼܢ ܦܸܣܦܸܣܵܐ (فسيفساء) ܒܹܝܙܲܢܛܵܝܵܐ: ܗܵܝ ܩܲܕܡܵܝܬܐ ܝܼܠܵܗ̇ ܩܵܐ ܡܫܝܼܚܵܐ: ܘܗܵܝ ܬܪܲܝܵܢܝܼܬܐ ܩܵܐ ܒܬܘܼܠܬܐ ܘܫܲܒ݂ܪܵܐ ܝܼܫܘܿܥ ݂ ܐܝܼܬ ܚܲܕ ܠܘܼܚܵܐ ܬܠܝܼܬܵܝܵܐ ܥܲܠ ܐܸܣܟܹܝܡܵܐ ܕܵܪܵܝܵܐ: ܦܝܼܫܠܹܗ ܪܫܝܼܡܵܐ ܒܝܲܕ ܚܲܕ ܟܵܗܢܵܐ ܐܲܠܡܵܢܵܝܵܐ ܕܝܼܠܹܗ ܩܵܐ ܚܫܵܡܝܼܬܐ ܐ݇ܚܵܪܵܝܬܐ ݂ ܨܘܼܪܬܐ ܠܵܐ ܡܲܚܙܝܵܐ ܡܫܝܼܚܵܐ ܚܲܝܵܐ: ܐܸܠܵܐ ܟܹܐ ܡܲܚܙܝܵܐ ܐܝܼܕܵܬܹܗ ܘܥܲܠܠܲܝܗܝ ܝܲܕܥܹ̈ܐ ܕܲܨܠܵܒ݂ܬܐ ܒܵܬܲܪ ܩܝܵܡܬܐ ݂ ܡܲܒܝܸܢܵܐ ܦܵܬܐ ܕܲܡܫܝܼܚܵܐ ܐܲܝܟ݂ ܟܘܼܪܵܟ݂ܵܐ ܓܲܘ ܚܲܕ ܩܲܕܚܵܐ ܕܚܲܡܪܵܐ: ܐܝܼܢܵܐ ܦܲܖ̈ܨܘܿܦܹܐ ܕܐܝܼܬ ܓܲܘ ܨܘܼܪܬܐ: ܠܵܐ ܡܲܡܬܸܠܝܼ ܫܠܝܼܚܹ̈ܐ: ܐܸܠܵܐ ܡܲܡܬܸܠܝܼ ܥܲܡܡܹ̈ܐ ܕܡܸܬܥܲܡܪܵܢܝܼܬܐ: ܐܝܼܢܵܐ ܦܵܬܘܿܪܵܐ ܡܸܠܝܵܐ ܝܠܹܗ ܬܘܼܪܨܵܝܵܐ ܘܡܹܐܟ݂ܠܵܬܐ ܝܘܼܒܵܠܵܝܹ̈ܐ ݂
شباط 2018 © باسكال ماغيسيان / ميزوبوتاميا.
شباط 2018 © باسكال ماغيسيان / ميزوبوتاميا.
ܣܵܗܕܘܼܬܐ ܕܡܲܛܪܵܢ ܝܲܘܣܸܦ ܬܐܘܿܡܵܐ ܡܲܪܩܘܼܣ: ܪܹܫܵܐ ܕܐܲܦܸܣܩܘܿܦܹ̈ܐ ܕܟܲܪܟܘܼܟ ܘܣܘܼܠܲܝܡܵܢܝܼܵܐ:
ܡܲܛܪܵܢ ܝܲܘܣܸܦ ܬܐܘܿܡܵܐ ܡܲܪܩܘܼܣ: ܝܼܠܹܗ ܐܲܦܸܣܩܘܿܦܵܐ ܕܚܲܡܫܝܼܢ ܘܬܠܵܬܐ ܕܟܲܪܟܘܼܟ ݂ ܗܿܘ ܩܲܕܡܵܝܵܐ ܝܼܠܹܗ ܬ݂ܹܝܘܿܩܪܝܼܬܘܿܣ: ܚܝܹܐ ܠܹܗ ܒܫܲܢ݇ܬܐ ܕ130 ݂ ܦܝܼܫܠܹܗ ܝܼܠܝܼܕܵܐ ܓܲܘ ܡܲܘܨܸܠ 21 ܒܲܚܙܝܼܪܵܢ ܫܲܢ݇ܬܐ ܕ1949 ܓܲܘ ܚܲܕ ܒܲܝܬܘܼܬܐ ܡܼܢ ܙܵܟ݂ܘܿ ܒܫܸܪܫܵܐ: ܒܓܲܪܒܝܵܐ ܪܸܚܩܵܐ ܕܥܝܼܪܵܐܩ ݂ ܘܲܩܪܹܐ ܠܹܗ ܒܡܲܕܪܲܫܬܐ ܕܘܼܡܢܝܼܟܵܝܬܐ ܕܡܵܪܝ ܝܘܿܚܵܢܲܢ ܓܲܘ ܡܲܘܨܸܠ: ܩܪܹܐ ܠܹܗ ܠܬܹܐܘܿܠܘܿܓ݂ܝܼܵܐ ܘܬܲܫܥܝܼܬܐ ܘܐܲܢܬ݂ܪܘܿܦܘܿܠܘܿܓ̰ܝܵܐ ܘܠܸܫܵܢܵܝܵܬܐ ܓܲܘ ܦܪܲܢܣܵܐ ݂ ܝܼܠܹܗ ܪܹܫ ܣܵܝܘܿܡܘܼܬܐ ܕܲܥܒܲܪ ܠܲܡܓ݂ܠܬܐ ܕ”ܪܸܢܝܵܐ ܡܫܝܼܚܵܝܵܐ”: ܘܲܒܫܲܢ݇ܬܐ ܕ2014: ܦܝܼܫܠܹܗ ܣܝܼܡܵܐ ܪܹܫ ܐܲܦܸܣܩܘܿܦܹ̈ܐ ܕܟܲܪܟܘܼܟ ܘܣܘܼܠܲܝܡܵܢܝܼܵܐ: ܚܠܵܦ ܠܝܼܘܝܼܣ ܣܵܟܘܿ: ܕܦܝܼܫܠܹܗ ܦܵܛܪܝܼܵܪܟܵܐ ܕܥܹܕܬܐ ܟܲܠܕܵܝܬܐ ݂ ܡܬܘܼܪܓܸܡܠܹܗ ܠܠܸܫܵܢܵܐ ܥܲܪܒ݂ܵܝܵܐ ܥܲܡܠܹ̈ܐ ܣܵܦܖ̈ܵܝܹܐ ܕܐܲܒ݂ܵܐ ܓ̰ܵܐܢ ܡܘܿܪܝܼܣ ܦܝܼܝܹܗ: ܘܝܲܬܝܼܪܵܐܝܼܬ ܬܠܵܬܐ ܕܘܼܒܵܝܹ̈ܐ ܕܲܟܬܵܒ݂ܵܐ ܕ(ܐܵܫܘܿܪ ܡܫܝܼܚܵܝܬܐ): ܘܥܲܡܠܹ̈ܗ ܬܲܫܥܝܼܬܵܢܵܝܹ̈ܐ ܘܝܵܖ̈ܬܘܼܬܵܢܵܝܹܐ ܖ̈ܲܒܹܐ ݂
ܝܵܪܬܘܼܬܐ ܪܘܼܚܵܢܵܝܬܐ:
” ܠܵܐ ܝܠܵܗ̇ ܡܸܬܗܲܘܝܵܢܝܼܬܐ ܠܲܦܪܵܫܵܐ ܝܵܪܬܘܼܬܐ ܡܫܝܼܚܵܝܬܐ ܕܓܲܘ ܥܝܼܪܵܐܩ: ܡܼܢ ܟܠܵܗ̇ ܬܲܫܥܝܼܬܐ ܬܲܘܕܝܼܬܵܢܵܝܬܐ ܩܲܕܝܼܫܬܐ ݂ ܐܲܪܥܵܐ ܕܥܝܼܪܵܐܩ ܝܼܠܵܗ̇ ܐܲܪܥܵܐ ܩܲܕܝܼܫܬܐ ݂ ܝܼܫܘܿܥ ܝܼܠܹܗ ܝܵܪܘܿܬ݂ܵܐ ܕܙܲܘܥܵܐ ܪܘܼܚܵܢܵܝܵܐ ܕܝܗܘܼܕܵܝܹ̈ܐ ܕܦܝܼܫܠܹܗ ܒܸܪܝܵܐ ܓܲܘ ܬܪܹܝܢ ܫܸܒ݂ܝܹ̈ܐ: ܗܿܘ ܩܲܕܡܵܝܵܐ ܠܓܲܪܒܝܵܐ ܕܒܹܝܬ ܢܲܗܖ̈ܝܼܢ ܒܫܲܢ݇ܬܐ ܕ721 ܡܼܢ ܩܕܵܡ ܡܫܝܼܚܵܐ: ܐܲܝܟܵܐ ܕܦܝܼܫܠܗ݇ܘܿܢ ܡܘܼܝ݇ܬܝܹ̈ܐ ܪܵܒܵܐ ܝܗܘܼܕܵܝܹ̈ܐ ܠܲܚܝܵܝܵܐ ܓܲܘ ܓܲܪܒܝܵܐ ܕܥܝܼܪܵܐܩ: ܘܗܿܘ ܬܪܲܝܵܢܵܐ ܠܒܵܒܸܠ: ܘܓܲܘ ܡܸܨܥܵܐ ܕܒܹܝܬ ܢܲܗܖ̈ܝܼܢ ܒܫܲܢ݇ܬܐ ܕ587 ܡܼܢ ܩܕܵܡ ܡܫܝܼܚܵܐ ݂ ܚܝܹܐ ܠܗ݇ܘܿܢ ܝܗܘܼܕܵܝܹ̈ܐ ܕܐܬܹܐ ܠܗ݇ܘܿܢ ܠܥܝܼܪܵܐܩ ܕܠܵܐ ܡܲܥܒܕܵܐ (ܒܹܝܬ ܣܓ݂ܵܕܵܐ) ܘܲܕܠܵܐ ܡܲܠܟܵܐ: ܐܸܠܵܐ ܐܝܼܬ ܗ݇ܘܵܐ ܠܗ݇ܘܿܢ ܩܵܢܘܿܢܵܐ: ܗ: ܕ: ܐܘܿܪܵܝܬܐ ݂ ܢܒܹܝܼܝܲܝܗܝ ܡܛܘܼܐܸܠ ܠܗ݇ܘܿܢ ܚܲܕ ܕܲܘܪܵܐ ܪܲܒܵܐ ܓܲܘ ܝܼܠܝܼܕܘܼܬܐ ܕܲܡܫܝܼܚܵܝܘܼܬܐ ݂ ܒܵܬܲܪ ܕܥܵܪܬܐ ܕܲܡܫܲܒ݂ܝܹ̈ܐ: ܡܛܘܼܘܸܪܘܼܢ ܡܲܕܖ̈ܲܫܝܵܬܐ ܕܝܗܘܼܕܵܝܹ̈ܐ ܒܐܲܬ݂ܪܵܐ ܕܒܹܝܬ ܢܲܗܖ̈ܝܼܢ: ܚܲܕ ܪܸܥܝܵܢܵܐ ܢܒ݂ܝܼܵܝܵܐ ܩܵܐ ܟܬܵܒ݂ܵܐ ܩܲܕܝܼܫܵܐ ݂ ܡܵܨܹܝܚ ܕܐܵܡܪܲܚ ܕܲܬܪܹܝܢ ܬܘܼܠܬܹ̈ܐ ܕܕܝܼܵܬܹܩܹܐ ܥܲܬܝܼܩܬܐ (ܐܘܿܪܵܝܬܐ): ܦܝܼܫܠܵܗ̇ ܟܬܝܼܒ݂ܬܐ ܓܲܘ ܥܝܼܪܵܐܩ ” ݂
ܝܵܪܬܘܼܬܐ ܐܲܬ݂ܪܵܝܬܐ:
“ܥܝܼܪܵܐܩ ܥܲܬܝܼܪܵܐ ܝܠܹܗ ܒܚܲܕ (ܡܸܠܝܘܿܢ) ܫܲܘܦܵܐ ܘܡܲܘܬܒ݂ܵܐ ܐܲܬ݂ܪܵܝܵܐ ܕܐܝܼܬ ܓܵܘܹܗ ݂ ܦܝܼܫܠܹܗ ܫܟܝܼܚܵܐ ܒܲܠܚܘܿܕ 10000 ܐܲܠܦܹ̈ܐ ܡܲܘܬܒܹ̈ܐ ݂ ܐܝܼܬ ܓܲܘ ܥܝܼܪܵܐܩ ܐܲܬ݂ܖܹ̈ܐ ܐ݇ܢܵܫܵܝܹ̈ܐ ܕܕܵܥܪܝܼ ܠ 8 ـ 7 ܐܲܠܦܹ̈ܐ ܫܸܢܹ̈ܐ ܡܼܢ ܩܕܵܡ ܡܫܝܼܚܵܐ: ܥܲܡ ܡܕܝܼܢ̈ܘܵܬܐ ܫܒ݂ܝܼܚܹ̈ܐ ܐܲܝܟ݂ ܕܫܘܿܡܹܝܖ̈ܵܝܹܐ ܘܐܲܟܵܕܵܝܹ̈ܐ ܘܐܵܬܘܿܖ̈ܵܝܹܐ ܘܒܵܒ݂ܠܵܝܹ̈ܐ ܘܐܵܖ̈ܵܡܵܝܹܐ ܘܲܡܫܝܼܚܵܝܹ̈ܐ ܘܡܲܫܠܡܵܢܹ̈ܐ ( ݂ ݂ ݂ )
ܓܘܼܢܚܵܐ ܘܩܸܛܪܵܢܘܼܬܐ (تعصب) ܕ(ܕܵܥܹܫ) ܩܵܛܘܿܠܵܐ ܝܠܹܗ: ܐܝܼܢܵܐ ܠܵܐ ܡܛܹܐ ܠܹܗ ܠܢܝܼܫܹܗ: ܒܗܿܝ ܕܠܵܐ ܡܵܨܹܝܚ ܕܲܡܛܲܫܹܝܚ ܠܫܸܡܫܵܐ ݂ ܠܵܐ ܡܵܨܹܝܚ ܕܡܲܚܪܸܒܲܚ ܠܝܵܪܬܘܼܬܐ ܕܟܠܲܝܗܝ ܡܲܖ̈ܕܘܵܬܵܐ ܥܝܼܖ̈ܵܩܵܝܵܬܐ: ܥܲܠ ܐܝܼܕܵܬܐ ܕܲܚܕܵܐ ܟܢܘܼܫܬܐ ܡܼܢ ܐ݇ܢܵܫܹ̈ܐ ܩܸܛܖ̈ܵܢܹܐ ܘܦܵܢܵܛܝܼܩܵܝܹ̈ܐ ܓܲܘ ܬܠܵܬ ܫܸܢܹ̈ܐ ݂
ܦܠܵܛܹ̈ܐ ܕܡܲܚܪܲܒ݂ܬܐ ܕܝܵܪܬܘܼܬܐ ܡܫܝܼܚܵܝܬܐ ܥܲܬܝܼܩܬܐ: ܪܵܒܵܐ ܩܸܢܛܵܝܹ̈ܐ (خطيرة) ܝܢܵܐ: ܐܝܼܢܵܐ ܟܒܲܪ ܫܵܒ݂ܩܵܐ ܠܲܢ ܕܝܵܕܥܲܚ ܠܛܝܼܡܵܐ ܕܡܸܢܕܝܼ ܕܩܲܡ ܡܛܲܠܩܲܚܠܹܗ ݂ ܩܝܼܡܠܗ݇ܘܿܢ ܒܲܬܠܵܚܬܐ ܕܡܲܣܓ݂ܕܵܐ ܕ(ܝܲܘܢܵܢ ܢܒ݂ܝܼܵܐ) ܓܲܘ ܡܲܘܨܸܠ: ܕܝܼܗ݇ܘܵܐ ܡܼܢ ܩܕܝܼܡ ܚܲܕ ܕܲܝܪܵܐ ܡܫܝܼܚܵܝܵܐ: ܘܡܼܢ ܩܕܵܡ ܡܸܢܹܗ ܚܲܕ ܚܸܣܢܵܐ (ܩܲܠܥܵܐ) ܐܵܬܘܿܪܵܝܵܐ ܓܲܘ ܢܝܼܢܘܹܐ ݂ ܡܢܘܼܣܹܐ ܠܗ݇ܘܿܢ ܕܫܵܝܦܝܼ ܠܐܝܼܬܘܼܬܐ ܡܫܝܼܚܵܝܬܐ: ܐܝܼܢܵܐ ܟܹܐ ܚܵܫܒܲܚ ܕܐܝܼܬ ܦܠܵܛܹ̈ܐ ܠܵܐ ܛܵܒܹ̈ܐ ܘܲܡܖ̈ܝܼܡܵܢܹܐ ܠܡܵܐ ܕܲܒܪܹܐ ܠܹܗ ݂
ܠܵܐ ܡܸܫܬܲܐܠܵܢܘܼܬܐ ܘܠܵܐ ܡܬܲܚܡܲܢܬܐ: ܒܸܕ ܗܵܘܝܼ ܝܲܬܝܼܪ ܩܸܢܛܵܝܹ̈ܐ ܡܼܢ ܩܸܛܪܵܢܘܼܬܐ ܘܦܵܢܵܛܝܼܩܵܝܘܼܬܐ ݂ ܒܸܕ ܗܵܘܝܵܐ ܘܵܠܝܼܬܐ ܥܲܠ ܕܵܪܵܐ ܕܝܲܘܡܵܢܵܐ: ܘܕܵܖܹ̈ܐ ܐܵܬܘܿܝܹ̈ܐ: ܕܪܵܚܩܝܼ ܡܼܢ ܗܵܕܹܐ ܠܵܐ ܡܸܫܬܲܐܠܵܢܘܼܬܐ ܘܠܵܐ ܡܬܲܚܡܲܢܬܐ ܕܩܲܡ ܚܵܝܹܐ ܠܵܗ̇ ܕܵܖܹ̈ܐ ܥܒ݂ܝܼܖܹ̈ܐ ” ݂
أيار 2018 © باسكال ماغيسيان / ميزوبوتاميا.
شباط 2008 © باسكال ماغيسيان.
شباط 2008 © باسكال ماغيسيان.
شباط 2008 © باسكال ماغيسيان.
Monument's gallery
Contribuez à la sauvegarde de la mémoire des monuments.
Photos de famille, vidéos, témoignages, partagez vos documents pour enrichir le site.
Je participe