ܦܝܼܫܠܵܗ̇ ܩܪܝܼܬܐ ܡܕܝܼܢ݇ܬܐ ܕܟܘܿܟ݂ܐ ܒܫܸܡ: ܣܝܼܠܘܿܣܝܵܐ (ܡܕܝܼܢ݇ܬܐ ܝܲܘܢܵܝܬܐ ܥܲܬܝܼܺܩܬܐ): ܕܦܝܼܫܠܵܗ̇ ܡܫܘܼܬܐܲܣܬܐ ܒܝܲܕ ܣܝܼܠܘܿܩܘܿܣ ܩܲܕܡܵܝܵܐ: ܚܲܒ݂ܪܵܐ ܕܐܸܣܟܲܢܕܲܪ ܪܲܒܵܐ ݂ ܡܫܘܼܚܠܸܦܠܵܗ̇ ܣܝܼܠܘܿܣܝܵܐ ܠܟܘܿܟ݂ܐ (ܣܝܼܠܘܿܣܝܵܐ ܚܕܲܬܐ) ܒܵܬܲܪ ܚܲܕ ܡܸܬܚܵܐ ܡܼܢ ܫܲܦܠܘܼܬܐ (انحطاط): ܡܼܢ ܩܕܵܡ ܕܦܵܝܫܵܐ ܬܒ݂ܝܼܥܬܐ ܠܫܘܼܠܛܵܢܵܐ ܕܐܲܪܕܵܫܹܝܪ ܩܲܕܡܵܝܵܐ: ܡܫܲܬܐܸܣܵܢܵܐ ܕܫܲܪܒܬܐ ܦܵܪܣܵܝܬܐ ـ ܣܵܣܵܢܵܝܬܐ ܓܲܘ ܦܲܠܓܵܐ ܩܲܕܡܵܝܵܐ ܡܼܢ ܕܵܪܵܐ ܬܠܝܼܬܵܝܵܐ ݂ ܟܘܿܟ݂ܐ ܦܝܼܫܬܐ ܝܗ݇ܘܵܐ ܡܘܼܥܡܸܕܬܐ ܚܲܕܬܵܐܝܼܬ ܒܫܸܡ: ܦܹܗ ـ ܐܲܪܕܵܫܹܝܪ ݂

ܓܲܘ ܒܹܝܬ ܘܲܥܕܵܐ (ملتقى) ܕܡܲܥܒ̇ܕܵܢ̈ܘܵܬܐ ܗܹܝܠܝܼܢܸܣܬܵܝܹ̈ܐ ܘܦܵܖ̈ܣܵܝܹܐ: ܡܫܘܼܬܐܸܣܠܹܗ ܓܸܠܝܵܢܵܐ (ظهور) ܘܛܘܼܘܵܪܵܐ ܕܲܡܫܝܼܚܵܝܘܼܬܐ ܓܲܘ ܟܘܿܟܹܐ ܡܨܲܘܬܵܢܬܐ ܒܠܸܫܵܢܵܐ ܐ݇ܣܘܼܪܝܵܝܵܐ: ܚܲܕ ܩܲܘܡܵܐ ܡܲܪܕܘܼܬܵܢܵܝܵܐ ܪܲܒܵܐ ݂ ܒܥܸܠܬܐ ܕܦܘܿܠܝܼܛܝܼܩܝܼ ܕܬܲܥܪܲܒܬܐ (تعريب) ܕܲܦܢܝܼܬܐ ܒܵܬܲܪܟܸܢ: ܦܝܼܫܠܵܗ̇ ܡܫܘܼܚܠܲܦܬܐ ܚܕܵܐ ܓܵܗܵܐ ܐ݇ܚܹܪܬܐ ܠ(ܒܸܗܪܵܣܝܼܪ) ݂

ܟܘܿܟܹܐ ܘܣܝܼܠܘܿܣܝܵܐ ܢܵܦܠܝܼ ܐܸܕܝܘܿܡ ܠܝܵܬ ܣܸܦܬܐ ܕܢܲܗܪܵܐ ܕܕܸܩܠܵܬ: ܐܝܼܢܵܐ ܩܛܝܼܣܦܘܿܢ ܥܲܬܝܼܩܬܐ ܢܵܦܠܵܐ ܥܲܠ ܣܸܦܬܐ ܡܲܕܢܚܵܝܬܐ ݂ ܡܫܘܼܚܠܸܦܠܹܗ ܐܵܗܵܐ ܩܵܐܹܡ ܒܫܲܢ݇ܬܐ ܕ116 ܠܡܵܪܲܢ ܐܝܼܡܲܢ ܕܲܡܫܘܼܚܠܸܦܠܹܗ ܢܲܗܪܵܐ ܕܕܸܩܠܵܬ ܠܐܘܼܪܚܹܗ: ܒܗܿܝ ܕܟܘܿܟܹܐ ܒܕܲܥܒܲܪ ܢܵܦܠܵܐ ܗ݇ܘܵܐ ܥܲܠ ܣܸܦܬܐ ܡܲܕܢܚܵܝܬܐ ܐܲܝܟ݂ ܩܛܝܼܣܦܘܿܢ[1] ݂

ܡܬܲܢܹܐ ܚܲܕ ܓܘܼܫܡܵܐ ܥܲܬܝܼܩܵܐ[2] ܕܐܝܼܡܲܢ ܕܐܬܹܐ ܠܹܗ ܫܠܝܼܚܵܐ ܡܵܐܪܝܼ ܠܟܘܿܟ݂ܐ: ܢܵܦܠܵܐ ܗ݇ܘܵܐ ܥܲܠ ܝܵܬ ܣܸܦܬܐ ܕܢܵܦܠܵܐ ܓܵܘܵܗ̇ ܩܛܝܼܣܦܘܿܢ: ܘܐܵܗܵܐ ܡܫܲܪܘܿܪܹܐ ܝܠܹܗ ܕܗܿܘ ܐܬܹܐ ܠܹܗ ܠܗܵܢ ܕܘܼܟܵܐ ܡܼܢ ܩܕܵܡ ܫܲܢ݇ܬܐ ܕ116: ܘܣܘܼܒܵܪܵܐ ܠܗܵܕܹܐ ܡܢܵܬܐ ܡܼܢ ܒܹܝܬ ܢܲܗܖ̈ܝܼܢ: ܕܵܥܹܪ ܠܫܘܼܪܵܝܵܐ ܕܕܵܪܵܐ ܬܪܲܝܵܢܵܐ ݂

ܘܙܲܘܕܵܐ ܠܗܵܢ ܡܲܒܘܼܥܵܐ: ܝܼܠܹܗ ܝܘܼܒܵܠܵܐ ܕܟܹܐ ܝܵܗܹܒ݂ ܢܵܡܘܿܣܵܝܘܼܬܐ ܠܐܸܣܵܐ ܫܠܝܼܚܵܝܵܐ ܕܥܹܕܬܐ ܡܲܕܢܚܵܝܬܐ ݂ ܐܵܡܹܪ ܗܵܢ ܝܘܼܒܵܠܵܐ ܕܩܲܕܝܼܫܵܐ ܬܐܘܿܡܵܐ: ܕܝܼܠܹܗ ܚܲܕ ܡܼܢ ܫܠܝܼܚܹ̈ܐ ܕܲܡܫܝܼܚܵܐ: ܐܬܹܐ ܠܹܗ ܠܣܝܼܠܘܿܣܝܵܐ ـ ܩܛܝܼܣܦܘܿܢ ܒܥܸܕܵܢ ܚܙܘܿܩܝܹܗ ܠܗܸܢܕܘܿ: ܠܗܵܕܲܟ݂ ܟܹܐ ܦܵܐܹܫ ܚܫܝܼܒ݂ܵܐ ܡܣܲܒ݂ܪܵܢܵܐ (ܡܲܫܚܸܕܵܢܵܐ) ܕܒܹܝܬ ܢܲܗܖ̈ܝܼܢ: ܘܐܵܦ ܝܼܠܹܗ ܡܫܲܬܐܸܣܵܢܵܐ ܕܐܲܦܸܣܩܘܿܦܘܼܬܐ ܩܲܕܡܵܝܬܐ ܕܥܹܕܬܐ ܕܡܲܕܢܚܵܐ (ܫܸܡܵܐ ܪܘܼܫܡܵܝܵܐ ܕܥܹܕܬܐ ܒܝܲܘܡܵܢܵܐ: ܝܼܠܹܗ ܥܹܕܬܐ ܕܡܲܕܢܚܵܐ ܕܐܵܬܘܿܖܵܝܹܐ): ܘܦܝܼܫܠܹܗ ܡܫܘܼܡܗܵܐ ܟܘܼܪܣܝܵܐ ܩܲܕܡܵܝܵܐ ܕܣܝܼܠܘܿܣܝܵܐ ـ ܩܛܝܼܣܦܘܿܢ ܒܫܸܡܹܗ ݂

“ܡܒܲܝܬܝܹܐ (يُنسب) ܝܘܼܒܵܠܵܐ ܠ(ܐܲܕܝܼܣܵܐ): ܚܲܕ ܕܲܘܪܵܐ ܣܲܪܢܵܝܵܐ ܓܲܘ ܦܪܝܼܣܘܼܬܐ ܕܲܡܫܝܼܚܷܵܘܼܬܐ ܓܲܘ ܡܲܕܢܚܵܐ: ܥܒܲܪ ܬܲܫܥܝܼܬܐ ܕܲܬܠܵܬܐ ܦܲܖ̈ܨܘܿܦܹܐ ܫܠܝܼܚܵܝܹ̈ܐ: ܐܲܕܲܝ ܘܡܵܐܪܝܼ ܘܬܐܘܿܡܵܐ[3]” ݂ ܒܲܫܪܵܪܵܐ: ܐܬܹܐ ܠܗ݇ܘܿܢ ܪܵܒܵܐ ܡܼܢ ܬܲܠܡܝܼܕܹ̈ܐ ܕܩܲܕܝܼܫܵܐ ܬܐܘܿܡܵܐ ܡܼܢ ܐܲܕܝܼܣܵܐ: ܡܗܘܼܡܢܹ̈ܐ ܒܥܹܕܬܐ ܕܐܲܢܛܝܘܿܟ݂ܝ: ܠܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ܘܲܦܪܝܼܫܵܐܝܼܬ ܠܣܝܼܠܘܿܣܝܵܐ ـ ܩܛܝܼܣܦܘܿܢ (ܟܘܿܟ݂ܐ): ܘܦܝܼܫܠܵܗ̇ ܡܫܘܼܬܐܲܣܬܐ ܡܫܝܼܚܵܝܘܼܬܐ ܐ݇ܣܘܼܪܝܵܝܬܐ ܓܲܘ ܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ܒܛܲܝܒܘܼܬܐ ܕܗܵܠܹܝܢ ܡܣܲܒ݂ܖ̈ܵܢܹܐ ݂

ܡܬܲܢܹܐ ܚܲܕ ܬܘܼܢܵܝܵܐ ܟܬܝܼܒ݂ܵܐ ܒܠܸܫܵܢܵܐ ܐ݇ܣܘܼܪܝܵܝܵܐ ܒܕܵܪܵܐ ܪܒ݂ܝܼܥܵܝܵܐ: ܝܼܕܝܼܥܐ ܒܐܘܼܪܚܵܐ ܕܲܡܬܲܫܥܝܼܬܵܢܵܐ ܝܲܘܢܵܝܵܐ ܐܘܿܣܝܼܦܘܿܣ ܩܲܝܨܲܪ (260 ـ 340): ܘܡܼܢ ܒܹܝܬ ܦܪܵܣܵܐ ܐ݇ܣܘܼܪܝܵܝܵܐ ܡܼܢ ܕܵܪܵܐ ܚܡܝܼܫܵܝܵܐ: ܕܐܲܝܟ݂ ܡܲܠܟܵܐ ܐܲܒ݂ܓܲܪ ܚܡܝܼܫܵܝܵܐ (13 ـ 50) ܫܡܸܥܠܹܗ ܒܐܝܼܬܘܼܬܐ ܕܚܲܕ ܓܲܒ݂ܪܵܐ ܠܵܐ ܥܝܵܕܵܝܵܐ ܓܲܘ (ܦܲܠܣܛܝܼܢ) ܡܲܟܪܘܿܙܹܐ ܓܲܘ ܟܖ̈ܝܼܗܹܐ ܘܲܡܒܲܣܘܿܡܲܝܗܝ: ܩܲܡ ܩܵܪܹܐ ܠܹܗ (ܟ̰ܵܝܹܕܠܹܗ) ܠܡܲܠܟܘܼܬܹܗ: ܘܲܒܥܹܐ ܠܹܗ ܡܸܢܹܗ ܕܲܡܫܲܘܬܸܦ ܓܲܘ ܡܲܠܟܘܼܬܹܗ ܥܲܡܹܗ ݂ ܠܵܐ ܩܒܸܠܠܹܗ ܝܼܫܘܿܥ ܠܲܚܒ݂ܝܼ̈ܫܵܬܐ ܕܗܵܕܹܐ ܐܸܓܲܪܬܐ: ܐܝܼܢܵܐ ܝܗܸܒ݂ܠܹܗ ܩܲܘܠܵܐ ܘܘܲܥܕܵܐ ܕܲܡܫܲܕܸܪ ܚܲܕ ܡܼܢ ܬܲܠܡܝܼܕܹ̈ܗ ܡܼܢ ܒܵܬܲܪ ܩܝܵܡܬܐ ݂ ܘܠܲܐܟ݂ܵܐ ܡܲܠܘܿܠܹܐ ܝܘܲܚ ܥܲܠ ܐܲܕܲܝ: ܚܲܕ ܡܼܢ ܬܲܠܡܝܼܕܹ̈ܐ ܕ(72): ܕܦܝܼܫܠܗ݇ܘܿܢ ܡܫܲܕܖܹ̈ܐ ܒܝܲܕ ܬܐܘܿܡܵܐ ܫܠܝܼܚܵܐ ܠ(ܐܲܕܝܼܣܵܐ) ܒܵܬܲܪ ܣܘܼܠܵܩܵܐ ݂ ܦܝܼܫܠܹܗ ܘܲܥܡܸܪܹܗ ܓܲܘ ܒܲܝܬܐ ܕܚܲܕ ܝܗܘܼܕܵܝܵܐ ܫܸܡܹܗ ܬܘܿܒܝܼܬ: ܐܲܝܟܵܐ ܕܩܝܼܡܠܹܗ ܒܡܲܫܚܲܕܬܐ ܕܡܲܠܟܵܐ ܘܲܚܘܵܖ̈ܕܲܩܢܹܐ ݂ ܘܐܵܦ ܩܝܼܡܠܹܗ ܒܡܲܥܡܘܿܕܝܼܬܐ ܘܲܒܢܵܝܬܐ ܕܥܹܕܵܬܐ: ܘܲܡܛܲܟܘܿܣܹܐ ܠܲܟܢܘܼܫܝܵܐ ܕܐܲܕܝܼܣܵܐ ܒܫܲܘܬܵܦܘܼܬܐ ܥܲܡ ܓܲܒ݂ܖ̈ܲܝ ܬܲܘܕܝܼܬܐ ݂

ܘܐܬܹܐ ܠܹܗ ܒܵܬܪܹܗ (ܩܲܡ ܬܵܒܹܥܠܹܗ) ܡܵܐܪܝܼ: ܚܲܕ ܡܼܢ ܬܲܠܡܝܼܕܹ̈ܐ ܕܡܵܪܲܢ ܗܿܘ ܕܲܫܒܸܩܠܹܗ ܠ(ܐܲܕܝܼܣܵܐ) ܘܐ݇ܙܸܠܠܹܗ ܠܲܢܨܝܼܒ݂ܝܼܢ: ܘܡܼܢ ܬܵܡܵܐ ܥܒܸܪܹܗ ܠܟܠܹܗ ܪܵܓ݂ܘܿܠܵܐ ܕܕܸܩܠܵܬ: ܘܚܲܪܬܐ ܠܒܲܪܩܵܩܵܐ ܥܲܪܒ݂ܵܝܵܐ ݂ ܟܹܐ ܡܲܟܪܸܙ ܗ݇ܘܵܐ ܒܟܠ ܕܘܼܟܵܢܹ̈ܐ ܘܩܵܝܹܡ ܗ݇ܘܵܐ ܒܣܘܼܒܵܪܵܐ ܘܡܲܥܡܘܿܕܝܼܬܐ ܘܲܡܫܲܬܐܲܣܬܐ ܕܲܟܢܘܼܫܝܹ̈ܐ ܘܲܒܢܵܝܬܐ ܕܥܹܕܵܬ̈ܐ: ܘܲܦܪܝܼܫܵܐܝܼܬ ܓܲܘ ܟܘܿܟ݂ܐ ܩܘܼܪܒܵܐ ܠܲܩܛܝܼܣܦܘܿܢ: ܕܦܝܼܫܠܵܗ̇ ܩܸܢܛܪܘܿܢ ܩܲܕܡܵܝܵܐ ܠܟܘܼܪܣܝܵܐ ܦܵܛܪܝܼܵܪܟܵܐ: ܘܠܸܒܵܐ ܕܥܹܕܬܐ ܕܡܲܕܢܚܵܐ[4] ݂ ܐܵܗܵܐ ܚܲܕ ܛܘܼܦܣܵܐ ܛܵܒ݂ܵܐ ܝܠܹܗ ܥܲܠ ܛܝܼܡܵܐ ܪܸܡܙܵܝܵܐ ܘܝܵܪܬܘܼܬܵܢܵܝܵܐ ܕܥܹܕܬܐ ܕܟܘܿܟ݂ܹܐ[5] ݂

  ܟܘܿܟܹܐ ܝܼܗ݇ܘܵܐ ܩܸܢܛܪܘܿܢ ܦܵܛܪܝܼܵܪܟܵܝܵܐ ܕܥܹܕܬܐ ܡܲܕܢܚܵܝܬܐ: ܐܲܝܟܵܐ ܕܝܬܸܒ݂ܠܗ݇ܘܿܢ ܪܵܒܵܐ ܦܵܛܪܝܼܵܖ̈ܟܹܐ  ܡܼܢ ܫܲܢ݇ܬܐ ܕ310 ܠܥܲܕ 780: ܘܝܼܗ݇ܘܵܐ ܢܘܼܩܙܵܐ ܕܫܘܼܪܵܝܵܐ ܩܵܐ ܪܵܒܵܐ ܘܵܠܝܵܬ݂̈ܐ ܕܣܘܼܒܵܪܵܐ ܠܐܲܬ݂ܖ̈ܵܘܵܬ݂ܐ ܕܦܵܪܹܣ ܘܗܸܢܕܘܿ ܘܨܝܼܢ: ܡܼܢ ܩܕܵܡ ܕܵܖܹ̈ܐ ܡܼܢ ܫܘܼܪܵܝܵܐ ܕܲܡܫܲܕܖ̈ܵܬܐ ܩܵܬ݂ܘܿܠܝܼܩܵܝܵܬܵܐ ܘܲܦܪܘܿܬܸܣܬܵܢܝܵܬ݂ܐ ܓܲܘ ܡܲܕܢܚܵܐ ݂ ܒܫܲܢ݇ܬܐ ܕ780: ܦܝܼܫܠܹܗ ܡܫܘܼܢܝܵܐ ܟܘܼܪܣܝܵܐ ܦܵܛܪܝܼܵܪܟܵܝܵܐ ܠܒܲܓ݂ܕܵܕ: ܘܥܲܡ ܗܵܕܹܐ ܦܝܼܫܠܵܗ̇ ܥܹܕܬܐ ܕܟܘܿܟ݂ܐ ܗܵܝ ܕܘܼܟܬܐ ܕܦܵܐܹܫ ܣܝܼܡܵܐ ܦܵܛܪܝܼܵܪܟܵܐ ܩܵܬ݂ܘܿܠܝܼܩܵܐ ܕܥܹܕܬܐ ܕܡܲܕܢܚܵܐ ܝܸܡܵܐ ݂

ܒܕܵܪܵܐ ܕܥܸܣܪܝܼܢ ܘܚܲܕ: ܦܝܼܫܠܹܗ ܠܟܘܿܟ݂ܐ ܚܲܕ ܫܲܘܦܵܐ ܪܘܼܚܵܢܵܝܵܐ ܥܸܠܵܝܵܐ ܐܲܝܟܵܐ ܠܗܵܫܵܐ ܚܲܖ̈ܒ݂ܵܬܐ ܕܒܸܢܝܵܢܵܐ ܕܥܹܕܬܐ ܡܸܬܚܲܙܝܵܢܵܐ ܝܠܹܗ: ܘܐܝܼܬ ܓܲܘ ܦܢܝܼܬܐ ܩܘܼܪܒܵܐ ܠܥܸܣܪܝܼܢ ܩܲܒ݂ܖܹ̈ܐ ܠܖܹ̈ܫܵܢܹܐ ܕܥܹܕܬܐ (ܦܵܛܪܝܼܵܖ̈ܟܹܐ ܩܵܬ݂ܘܿܠܝܼܩܹ̈ܐ) ݂

__________

[1] ܡܲܒܘܼܥܵܐ: ܓ̰ܵܐܢ ܡܘܿܪܝܼܣ ܦܝܼܝܹܗ: ܣܗܸܕܠܹܗ ܐܸܒܹܗ ܪܝܼܡܘܿܢܕ ܠܘܿܟܘܿܙ ܓܲܘ “ܬܲܫܥܝܼܬܐ ܕܥܹܕܬܐ ܕܡܲܕܢܚܵܐ “: ܠܘܿ ܣܝܼܪܦ: ܐܝܼܠܘܿܠ 1995: ܦ 21 ݂

[2] ܡܲܒܘܼܥܵܐ ܥܒ݂ܝܼܪܵܐ ݂

[3]  ܦܪܲܢܣܘܵܐ ܒܪܝܼܟܝܼܠ ܫܵܬܘܿܢܝܹܝܗ: ܓܲܘ “ܡܫܝܼܚܵܝܹ̈ܐ ܕܡܲܕܢܚܵܐ: 2000 ܫܸܢܹ̈ܐ ܡܼܢ ܬܲܫܥܝܼܬܐ”: ܐܝܼܠܘܿܠ 2017: ܦ 34: ܝܼܠܝܼܕܘܼܬܐ ܘܛܘܼܘܵܪܵܐ ܕܥܹܕܵܬܐ ܒܥܵܠܡܵܐ ܐ݇ܣܘܼܪܝܵܝܵܐ ݂

[4] ܦܪܲܢܣܘܵܐ ܒܪܝܼܟܝܼܠ ܫܵܬܘܿܢܝܹܝܗ: ܓܲܘ “ܡܫܝܼܚܵܝܹ̈ܐ ܕܡܲܕܢܚܵܐ: 2000 ܫܸܢܹ̈ܐ ܡܼܢ ܬܲܫܥܝܼܬܐ”: ܐܝܼܠܘܿܠ 2017: ܦ 34: ܝܼܠܝܼܕܘܼܬܐ ܘܛܘܼܘܵܪܵܐ ܕܥܹܕܵܬܐ ܒܥܵܠܡܵܐ ܐ݇ܣܘܼܪܝܵܝܵܐ ݂

[5] ܪܝܼܡܘܹܢܕ ܠܘܿܟܘܿܙ: ܓܲܘ “ܬܲܫܥܝܼܬܐ ܕܥܹܕܬܐ ܕܡܲܕܢܚܵܐ”: ܠܘܿ ܣܝܼܪܦ: ܐܝܼܠܘܿܠ 1995: ܦ  21 ݂

ܡܛܵܝܵܐ ܠܕܘܼܟܵܐ ܕܥܹܕܬܐ ܒܫܸܢܹ̈ܐ ܐ݇ܚܵܖ̈ܵܝܹܐ: ܦܝܼܫܠܹܗ ܡܸܬܡܲܨܝܵܢܵܐ: ܘܲܕܥܸܪܘܼܢ ܣܝܼܥܵܬܹ̈ܐ ܕܚܲܓܵܝܹ̈ܐ ܘܣܵܥܘܿܖܹ̈ܐ ܠܟܘܿܟ݂ܐ ܡܼܢ ܙܲܒ݂ܢܵܐ ܕܲܫܡܵܛܬܐ ܕ(ܕܵܥܹܫ) ݂

ܒܲܚܙܝܼܪܵܢ 2018: ܩܝܼܡܠܵܗ̇ ܚܕܵܐ ܣܝܼܥܬܐ ܡܼܢ ܡܫܝܼܚܵܝܹ̈ܐ ܡܼܢ ܒܲܓ݂ܕܵܕ ܥܲܡ ܐܲܒ݂ܵܐ (ܡܲܢܨܘܼܪ ܐܲܠܡܘܼܚܲܠܠܲܨܝܼ) ܡܼܢ (ܩܸܢܛܪܘܿܢ ܕܗܸܖ̈ܓܹܐ ܡܲܕܢܚܵܝܹ̈ܐ ـ ܒܲܓ݂ܕܵܕ): ܒܣܵܥܘܿܪܘܼܬܐ ܠܕܘܼܟܵܐ ܕܟܘܿܟ݂ܐ ܒܲܙܡܝܼܢܘܼܬܐ ܡܼܢ ܚܕܵܐ ܣܝܼܥܬܐ ܡܲܫܠܡܵܢܝܼܬܐ ܕܘܼܟܬܵܢܵܝܬܐ: ܘܝܲܬܝܼܪܵܐܝܼܬ  ܡܼܢ (ܩܲܫܝܼܫܵܐ (شيخ) ܣܲܥܲܕ ܬ݂ܵܐܒܸܬ ܐܲܠܓ̰ܹܝܒܘܼܪܝܼ) ݂ ܒܪܹܐ ܠܹܗ ܡܼܢ ܗܵܕܹܐ ܣܵܥܘܿܪܘܼܬܐ: ܚܕܵܐ ܬܲܪܡܝܼܬܐ ܠܚܘܼܕܵܬܐ ܘܪܘܼܡܵܡܵܐ ܕܕܘܼܟܵܐ ܕܥܹܕܬܐ: ܟܲܕ ܝܼܠܹܗ ܠܦܘܼܬ݂ ܫܘܼܠܛܵܢܵܐ ܥܝܼܪܵܩܵܝܵܐ ܚܲܕ ܫܲܘܦܵܐ ܡܲܪܕܘܼܬܵܢܵܝܵܐ ܪܵܒܵܐ ܐܵܢܲܢܩܵܝܵܐ ܕܐܵܬܝܼ ܠܹܗ ܐ݇ܢܵܫܹ̈ܐ ܘܣܵܥܘܿܖܹ̈ܐ ݂

ܐܵܡܹܪ ܩܵܫܵܐ (ܡܲܝܣܵܐܪ) ܡܼܢ ܥܹܕܬܐ ܟܲܠܕܵܝܬܐ ܕܡܵܪܝ ܓܝܼܘܲܪܓܝܼܣ ܕܝܼܠܵܗ̇ ܩܘܼܪܒܵܐ ܠܟܘܿܟܹܐ: ܗܵܕܹܐ ܬܲܪܡܝܼܬܐ ܒܸܕ ܦܵܝܫܵܐ ܪܸܡܙܵܐ ܠܚܘܼܕܵܬܐ ܕܚܘܼܒܵܐ ܘܐܲܘܝܘܼܬܐ ܒܹܝܬ ܡܫܝܼܚܵܝܹ̈ܐ ܠܡܲܫܠܡܵܢܹ̈ܐ: ܒܵܬܲܪ ܦܘܼܠܵܓ݂ܵܐ ܕܲܒܪܹܐ ܠܹܗ ܒܥܸܠܬܐ ܕܥܸܢܦܵܐ ܘܲܚܪܵܒ݂ܵܐ ܕܦܝܼܫܠܹܗ ܥܒ݂ܝܼܕܵܐ ܒܝܲܕ ܕܵܥܹܫ ( ݂ ݂ ݂ ) ܟܒܲܪ ܗܵܘܹܐ ܚܘܼܕܵܬܐ ܕܗܵܕܹܐ ܥܹܕܬܐ: ܢܘܼܩܙܵܐ ܕܫܘܼܪܵܝܵܐ ܚܲܕܬܐ ܠܥܘܼܕܪܵܢܵܐ ܘܩܘܼܪܒܵܝܘܼܬܐ ܒܹܝܬ ܡܲܫܠܡܵܢܹ̈ܐ ܠܲܡܫܝܼܚܵܝܹ̈ܐ ܚܕܵܐ ܓܵܗܵܐ ܐ݇ܚܹܪ݇ܬܐ[1] ݂

__________ 

[1] ܚܙܝܼ: ܚܲܕ ܡܹܐܡܪܵܐ (ܒܠܸܫܵܢܵܐ ܦܪܲܢܣܵܝܵܐ) ܒܝܲܕ: ܦܝܼܬܘܿܪܝܵܐ ܬܪܵܦܝܼܪܣܘܿ: ܐܲܠܬܝܼܵܐ: ܓܲܘ ܐܲܠܬܝܼܵܐ: 5 ܒܐܝܼܠܘܿܠ 1995:

https://fr.aleteia.org/2018/09/05/irak-chretiens-et-musulmans-au-chevet-de-lune-des-plus-anciennes-eglises-du-monde/