ܠܦܘܼܬ݂ ܫܘܿܥܝܼܬܐ ܕܲܗܒ݂ܵܢܵܝܬܐ ـ ܡܣܲܦܝܵܢ̈ܘܵܬ݂ܐ ـ ܕܵܥܹܪ ܫܸܪܫܵܐ ܕܡܵܪܝ ܡܲܬܲܝ (ܡܵܬ݂ܝܘܿ) ܠܲܦܢܝܼܬܐ ܕܕܝܼܵܪܒܲܟܸܪ (ܐܵܡܹܕ ܒܠܸܫܵܢܵܐ ܐ݇ܣܘܼܪܝܵܝܵܐ) ܓܲܘ ܬܲܝܡܢܵܐ ܡܲܕܢܚܵܝܵܐ ܕܬܘܼܪܟܝܼܵܐ ܕܝܲܘܡܵܢܵܐ ݂ ܘܡܵܪܝ ܡܲܬܲܝ ܪܲܒܵܢܵܐ ܝܗ݇ܘܵܐ ܡܼܢ ܩܕܵܡ ܕܦܝܼܫܠܹܗ ܐܲܠܝܼܨܵܐ ܘܥܸܨܝܵܐ ܕܥܵܪܹܩ ܡܼܢ ܪܕܘܼܦܝܵܐ ܕܐܸܡܦܪܵܛܘܿܪܵܐ ܪܗܘܿܡܵܢܵܝܵܐ ܓ̰ܘܼܠܝܵܐܢ: ܕܲܒܥܹܐ ܠܹܗ ܕܩܵܛܹܠ ܠܲܡܫܝܼܚܵܝܹ̈ܐ: ܒܨܝܼܪܵܐܝܼܬ ܡܼܢ ܩܕܵܡ (50) ܫܸܢܹ̈ܐ ܥܲܠ ܬܝܵܒ݂ܘܼܬܐ (ܬܲܘܒܵܐ) ܕܥܲܡܹܗ (ܡܵܡܹܗ) ܩܸܣܛܲܢܛܝܼܢ ܩܲܕܡܵܝܵܐ ݂ ܦܝܼܫܠܹܗ ܡܫܘܼܬܐܸܣܵܐ ܕܲܝܪܵܐ ܕܡܵܪܝ ܡܲܬܲܝ ܒܫܲܢ݇ܬܐ ܕ 363: ܘܲܒܬܲܦܩܘܿ ܗܵܕܹܐ ܫܲܢ݇ܬܐ: ܝܼܠܵܗ̇ ܫܲܢ݇ܬܐ ܕܡܲܘܬܐ ܕܓ̰ܘܼܠܝܵܐܢ ܡܼܢ ܒܵܬܲܪ ܚܲܕ ܩܪܵܒ݂ܵܐ ܕܲܠܩܘܼܒ݂ܠ ܦܵܪ̈ܣܵܝܹܐ ܣܵܣܵܢܵܝܹ̈ܐ ݂ ܫܲܪܒܵܐ ܕܚܲܝܹ̈ܐ ܕܩܲܕܝܼܫܵܐ ܡܵܪܝ ܡܲܬܲܝ: ܐܣܝܼܪܵܐ ܝܠܹܗ ܒܚܲܕ ܦܸܨܠܵܐ ܦܪܝܼܫܵܐ ܒܡܲܥܡܘܿܕܝܼܬܐ: ܘܲܒܣܵܗܕܘܼܬܐ ܕܒܸܗܢܵܡ ܘܚܵܬܹܗ ܣܵܪܵܐ: ܘܦܝܵܫܬܐ ܕܒܵܒܲܝܗܝ ܣܲܢܚܝܼܪܸܒ݂ ܡܲܠܟܵܐ ܕܢܸܡܪܘܿܕ ܡܫܝܼܚܵܝܵܐ (ܕܥܘܿܪ ܠܡܹܐܡܪܵܐ ܕܕܲܝܪܵܐ ܕܡܵܪܝ ܒܸܗܢܵܡ) ݂ ܠܦܘܼܬ݂ ܡܣܲܦܝܵܢ̈ܘܵܬ݂ܐ ܘܐܲܒ̈ܘܵܬ݂ܐ: ܩܝܼܡܠܹܗ ܡܲܠܟܵܐ ܣܲܢܚܝܼܪܸܒ݂ ܒܲܒܢܵܝܬܐ ܕܕܲܝܪܵܐ ܥܲܠ ܛܘܼܪܵܐ ܕܡܲܩܠܘܼܒ: ܒܒܥܵܘܼܬܐ ܕܡܵܪܝ ܡܲܬܲܝ: ܘܐܝܼܬ ܪܸܥܝܵܢܵܐ ܐ݇ܚܹܪ݇ܢܵܐ ܕܐܵܡܹܪ ܕܗܿܘ ܒܢܹܐ ܠܹܗ ܠܕܲܝܪܵܐ ܕܛܘܼܪ ܐܲܠܦܹ̈ܐ ܡܼܢ ܒܵܬܲܪ ܪܸܥܝܵܢܵܐ ܘܦܘܼܩܕܵܢܵܐ ܡܒܲܟܪܵܐ ܕܲܢܦܸܩ ܠܹܗ ܡܼܢ ܡܲܠܟܬܐ ܫܝܼܪܝܼܢ ݂

ܐܝܼܬ ܓܲܘ ܫܘܿܥܝܼܬܐ ܕܚܲܝܹ̈ܐ ܕܡܵܪܝ ܡܲܬܲܝ ܕܝܼܵܪܒܲܟܪܵܝܵܐ ܕܦܝܼܫܠܵܗ̇ ܡܫܘܼܢܝܼܬܐ ܒܐܘܼܪܚܵܐ ܕܲܡܣܲܦܝܵܢܘܼܬܐ: ܪܵܒܵܐ ܪܸ̈ܥܝܵܢܹܐ ܕܲܠܩܘܼܒ݂ܠܵܝܹ̈ܐ: ܕܟܹܐ ܡܲܕܟ݂ܸܪܘܼܢ ܡܸܬܡܲܕܢܚܵܢܵܐ (ܡܸܣܬܲܪܝܵܢܵܐ) ܓ̰ܵܐܢ ܡܘܿܪܝܼܣ ܦܝܼܝܹܗ ܓܲܘ ܟܬܵܒ݂ܹܗ (ܐܵܫܘܿܪ ܡܫܝܼܚܵܝܬܐ) ݂ ܟܲܕ ܕܟ݂ܸܪܹܗ ܠܚܘܼܫܬܐ ܥܸܠܡܵܝܬܐ ܦܪܝܼܫܬܐ ܐܸܒܹܗ: ܕܟ݂ܸܪܹܗ ܪܸ̈ܥܝܵܢܹܐ ܕܦܵܛܪܝܼܵܪܟܵܐ ܕܐ݇ܣܘܼܪ̈ܵܝܹܐ ܐܲܪ̈ܬܘܿܕܘܿܟܣܵܝܹܐ: ܩܲܕܝܼܫܘܼܬܹܗ ܕܡܵܪܝ ܐܸܓ݂ܢܵܛܝܘܿܣ ܝܲܥܩܘܼܒ݂ ܬܠܝܼܬܵܝܵܐ ݂ ܘܥܲܡ ܐܵܗܵܐ: ܡܫܘܼܪܸܪܹܗ ܓ̰ܵܐܢ ܡܘܿܪܝܼܣ ܦܝܼܝܹܗ ܠܢܘܼܩܙܵܐ (ܛܸܦܵܐ) ܕܩܘܼܪܒܵܝܘܼܬܐ ܕܐܝܼܬ݂ ܒܹܝܬ ܢܸܣܛܘܿܪ̈ܝܵܢܹܐ ܠܝܲܥܩܘܿܒܵܝܹ̈ܐ ܟܲܕ ܒܐܝܼܡܵܪܵܐ: ܒܫܸܪܫܵܐ ܐܝܼܬ ܐܲܘܝܘܼܬܐ ܒܹܝܬ ܢܸܣܛܘܿܪ̈ܝܵܢܹܐ ܠܝܲܥܩܘܿܒܵܝܹ̈ܐ ݂ ܒܕܵܪܵܐ ܪܒ݂ܝܼܥܵܝܵܐ ܐܲܘ ܒܫܘܼܪܵܝܵܐ ܕܕܵܪܵܐ ܚܡܝܼܫܵܝܵܐ ܦܝܼܫܠܹܗ ܒܸܢܝܵܐ ܕܲܝܪܵܐ ܕܡܵܪܝ ܡܲܬܲܝ ܒܝܲܕ ܚܲܕ ܪܲܒܵܢܵܐ ܝܲܘܢܵܝܵܐ ݂

ܡܼܢ ܒܵܬܲܪ ܕܦܝܼܫܠܹܗ ܕܲܝܪܵܐ ܬܒ݂ܝܼܥܵܐ ܠܲܡܕܲܒܪܵܢܘܼܬܐ ܕܥܹܕܬܐ ܕܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ: ܦܝܼܫܬܐ ܝܠܵܗ̇ ܐܡܝܼܪܬܐ ܕܕܲܝܪܵܐ ܚܵܒ݂ܹܫ ܗ݇ܘܵܐ ܐܲܠܦܹܵܐ ܕܪ̈ܲܒܵܢܹܐ ܒܚܘܼܬܵܡ ܕܵܪܵܐ ܪܒ݂ܝܼܥܵܝܵܐ ݂ ܘܲܠܗܵܕܹܐ ܥܸܠܬܐ ܦܝܼܫܠܹܗ ܩܸܪܝܵܐ ܐܲܘ ܡܫܘܼܡܗܵܐ ܒܫܸܡ: ܛܘܼܪܵܐ ܕܡܲܩܠܘܼܒ: ܘܲܡܫܲܡܗܵܐ ܘܝܼܕܝܼܥܵܐ ܒـ (ܛܘܼܪܵܐ ܕܐܲܠܦܹ̈ܐ): ܗܿܘ ܕܡܲܝܕܸܥ ܒܐܲܪ̈ܝܼܟ݂ܵܬܐ ܠܛܘܼܘܵܪܵܐ ܕܥܹܕܬܐ ܕܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ: ܘܲܠܛܘܼܘܵܪܵܐ ܕܕܲܝܪܵܐ ܕܡܵܪܝ ܡܲܬܲܝ ܒܓܲܪܒܝܵܐ ܕܐܲܬ݂ܪܵܐ ܕܒܹܝܬ ܢܲܗܪ̈ܝܼܢ ݂

ܦܝܼܫܠܹܗ ܕܲܝܪܵܐ ܕܘܼܟܬܐ ܕܲܫܪܵܝܬܐ (ܡܩܝܼܡܵܢܘܼܬܐ) ܕܡܲܦܪܝܵܢܵܐ ܕܡܲܕܢܚܵܐ ܡܼܢ ܒܵܬܲܪ ܫܒ݂ܵܩܬܹܗ ܠܲܡܕܝܼܢ݇ܬܐ ܕܬܸܟܪܝܼܬ (ܡܲܦܪܝܵܢܵܐ: ܝܼܠܹܗ ܫܘܼܡܵܗܵܐ ܐܲܘ ܟܘܼܢܵܝܵܐ ܕܦܵܐܹܫ ܗ݇ܘܵܐ ܝܗܝܼܒ݂ܵܐ ܠܲܡܕܲܒܪܵܢܵܐ ܕܥܹܕܬܐ ܕܐ݇ܣܘܼܪ̈ܝܵܝܹܐ ܐܲܪ̈ܬܘܿܕܘܿܟܣܵܝܹܐ ܒܐܲܬ݂ܪܵܐ ܕܒܹܝܬ݂ ܢܲܗܪ̈ܝܼܢ: ܘܦܝܼܫܠܹܗ ܡܒܲܛܠܵܐ ܟܘܼܢܵܝܵܐ ܕܡܲܦܪܝܵܢܵܐ ܕܡܲܕܢܚܵܐ ܒܫܲܢ݇ܬܐ ܕ 1859) ݂ ܐܝܼܬ ܗ݇ܘܵܐ ܠܹܗ ܕܲܝܪܵܐ ܕܡܵܪܝ ܡܲܬܲܝ ܫܩܵܠ ـ ܝܗܵܒ݂ܵܐ ܩܡܘܼܛܵܐ ܥܲܡ ܥܹܕܬܐ ܕ (ܣܝܼܪܘܿ ܡܲܠܵܢܟܵܪܵܐ) ܓܲܘ ܗܸܢܕܘܿ ݂ ܡܼܢ ܒܵܬܲܪ ܨܦܵܚ̈ܝܵܬ݂ܐ ܕܩܘܼܪ̈ܕܵܝܹܐ ܘܲܦܪܝܼܫܵܐܝܼܬ ܒܕܵܪܹ̈ܐ ܐܲܪܒܲܥܣܝܼܪܵܝܵܐ ܘܚܲܡܫܲܥܣܝܼܪܵܝܵܐ: ܗܘܹܐ ܠܹܗ ܕܲܝܪܵܐ ܕܘܼܟܵܐ ܠܕܲܠܩܘܼܒ݂ܠܵܝܘܼܬܐ ܐܲܘ ܠܣܲܩܘܼܒ݂ܠܵܝܘܼܬܐ: ܘܒܸܫ ܝܲܬܝܼܪ ܦܝܼܫܠܹܗ ܒܹܝܬ ܓܲܘܣܵܐ ܠܪܵܒܵܐ ܥܵܡܘܿܪܹ̈ܐ ܕܘܼܟܬܵܢܵܝܹ̈ܐ ܘܲܡܫܝܼܚܵܝܹ̈ܐ ܕܲܦܢܝܼܬܐ: ܐܵܢܝܼ ܕܦܝܼܫܠܗ݇ܘܿܢ ܥܸܨܝܹ̈ܐ ܘܲܪ̈ܕܝܼܦܹܐ ݂ ܘܗܵܕܟ݂ܵܐ ܗܘܹܐ ܠܹܗ ܐܵܦ ܦܵܛܪܝܼܵܪܟܵܐ ܕܥܹܕܬܐ ܕܡܲܕܢܚܵܐ ܡܵܪܝ ܫܸܡܥܘܿܢ ܦܲܘܠܘܿܣ ܕ (22): ܥܸܨܝܵܐ ܕܚܵܝܹܐ ܚܲܕ ܡܸܬܚܵܐ ܡܼܢ ܚܲܝܲܘܗ̈ܝ ܓܲܘ ܕܲܝܪܵܐ ܕܡܵܪܝ ܡܲܬܲܝ ܒܥܸܠܬܐ ܕܟܘܼܪܗܵܢܵܐ: ܘܡܝܼܬ ܠܹܗ ܓܲܘ ܡܕܝܼܢ݇ܬܐ ܕܒܲܥܩܘܼܒܵܐ ܥܝܼܪܵܩܵܝܬܐ ܒܫܲܢ݇ܬܐ ܕ 1920 ݂

ܚܵܒ݂ܹܫ ܒܸܢܝܵܢܵܐ ܐܲܘ ܟܘܼܢܵܫܵܐ ܪܲܒܵܢܵܝܵܐ: ܥܹ̈ܕܵܬܵܐ ܡܫܲܚܠܦܹ̈ܐ ( ܗܵܝ ܪܹܫܵܝܬܐ ܓܵܘܲܝܗܝ ܦܪܝܼܫܬܐ ܝܠܵܗ̇ ܠܩܲܕܝܼܫܵܐ ܡܵܪܝ ܡܲܬܲܝ): ܘܐܝܼܬ ܒܵܬܲܝ̈ ܨܠܘܿܬܐ ܩܵܐ ܡܩܲܒܠܵܢܘܼܬܐ ܕܢܸܕܪܹ̈ܐ ݂ ܘܐܝܼܬ ܩܸ̈ܠܵܝܵܬ݂ܐ ܢܩܝܼܪܹ̈ܐ ܓܲܘ ܛܘܼܪܵܐ ܩܵܐ ܪ̈ܲܒܵܢܹܐ: ܟܲܕ ܡܲܩܪܘܿܒ݂ܹܐ ܣܵܗܕܘܼܬܐ ܚܲܝܬܐ ܕܗܲܝܡܵܢܘܼܬܐ ܫܸܪܫܵܝܬܐ ܕܐܸܕܝܘܿܡ: ܐܵܦܸܢ ܕܲܚܦܝܼܬܐ ܝܠܵܗ̇ ܘܲܢܘܝܼܠܬܐ: ܐܝܼܢܵܐ ܦܝܼܫܠܵܗ̇ ܡܦܘܼܨܹܝܬܐ ܡܼܢ ܨܦܵܚ̈ܝܵܬ݂ܐ ܘܲܪ̈ܕܘܼܦܝܹܐ ܪ̈ܗܝܼܒ݂ܵܝܹܐ ݂

ܟܠܹܐ ܠܵܗ̇ ܨܦܵܚܬܐ ܐ݇ܚܵܪܵܝܬܐ ܕܕܵܥܹܫ ܒܫܲܢ݇ܬܐ ܕ 2014: ܓܲܘ ܪܵܓ݂ܘܿܠܵܐ ܒܪܸܚܩܵܝܘܼܬܐ ܕܚܲܕܟܡܵܐ ܟܝܼܠܘܿܡܝܼܬܪܹ̈ܐ ܡܼܢ ܕܲܝܪܵܐ ܕܡܵܪܝ ܡܲܬܲܝ: ܘܦܝܼܫܠܗ݇ܘܿܢ ܡܣܘܼܦܩܹ̈ܐ ܡܵܬܘܵܬ݂ܐ ܕܝܼܗ݇ܘܵܘ ܠܬܲܚܬ ܕܲܝܪܵܐ: ܘܥܵܡܘܿܪ̈ܲܝܗܝ ܦܝܼܫܠܗ݇ܘܿܢ ܡܫܘܼܢܝܹܐ ܙܲܒ݂ܢܵܢܵܐܝܼܬ ܠܕܲܝܪܵܐ ܕܡܵܪܝ ܡܲܬܲܝ ݂ ܘܠܲܟܠܵܝܵܐ ܕܲܠܩܘܼܒ݂ܠ ܕܐܲܢܹܐ ܩܸܢܛܹ̈ܐ ܚܲܕܬܹ̈ܐ ܥܲܠ ܒܲܪܢܵܫܘܼܬܐ ܘܥܲܠ ܝܵܪܬܘܼܬܐ: ܦܝܼܫܠܗ݇ܘܿܢ ܡܦܘܼܨܝܹܐ (ܡܦܘܼܪ̈ܩܹܐ) ܟܬܵܒ݂ܹ̈ܐ ܕܒܹܝܬ ܐܲܪ̈ܟܹܐ ܕܕܲܝܪܵܐ ܒܥܘܼܕܪܵܢܵܐ ܕܲܟܢܘܼܫܬܐ ܕ (ܐܘܿܦܲܪ ܕܐܘܿܪܝܲܢܬ: ܬܸܫܡܸܫܬܐ ܕܡܲܕܢܚܵܐ) ݂ ܟܹܐ ܦܵܐܹܫ ܚܫܝܼܒ݂ܵܐ ܕܲܝܪܵܐ ܕܡܵܪܝ ܡܲܬܲܝ ܒܫܘܼܦܪܹܗ ܐܲܝܟ݂ ܚܲܕ ܢܘܼܩܙܵܐ ܓܲܘ ܝܲܡܵܐ: ܘܗܵܠܵܐ ܚܲܕ ܟܸܢܫܵܐ ܪܲܒܵܢܵܝܵܐ ܙܥܘܿܪܵܐ ܟܹܐ ܚܵܝܹܐ ܒܐܵܗܵܐ ܕܲܝܪܵܐ: ܟܲܕ ܝܼܨܵܦܵܐ ܥܲܠ ܝܵܪܬܘܼܬܐ ܥܲܬܝܼܪܬܐ ܕܐܲܒ݂ܵܗܵܬ݂ܐ: ܘܲܟܪܝܼܟ݂ܵܐ ܒܐ݇ܢܵܫܹ̈ܐ ܕܡܵܬܘܵܬ݂ܐ ܕܒܲܫܒ݂ܵܒ݂ܘܼܬܐ: ܘܗܵܠܵܐ ܪܵܒܵܐ ܣܵܥܘܿܪܹ̈ܐ ܘܚܲܓܵܝܹ̈ܐ ܟܹܐ ܐܵܬܝܼ ܘܣܵܥܪܝܼ ܠܐܵܗܵܐ ܕܲܝܪܵܐ ܘܲܒܗܵܝ ܚܸܡܬܐ ܘܚܘܼܒܵܐ ܩܕܝܼܡܵܝܹ̈ܐ ݂